صيانة الألف الأولى - ارجو الافادة بمعلومات عن كيفية وميعاد الحجز

السلام عليكم ورحمة الله وبركاته .. اخوانى الكرام

انا عامل بالعربية دلوقتى 540 كم ومتوقع ان شاء الله خلال 10 ايام مثلا اكون وصلت الالف كم فكنت عاوز اعرف معلومات عن الصيانة دى لان اول مرة اشترى عربية زيرو واعملها صيانة فياريت لو تفيدونى فى الاسأله التالية:

1. امتى المفروض اعمل الصيانة يعنى على الالف بالظبط ولا اكتر بشوية قليلة ولا شوية كتير يعنى عادى (بيدقوا على العداد فى التوكيل؟) المهم انها تكون بعد ما اعدى الالف؟

2. ازاى وامتى احجز ميعاد الصيانة يعنى عند كام كيلو احجز وكمان قبل الميعاد بأد ايه يعنى اقصد انا مثلا حابب تكون الصيانة يوم الجمعة او السبت عشان دول ايام اجازتى فالمفروض احجز قبلها بكام يوم عشان اظبط ميعادى على الجمعة او السبت

3. اماكن مراكز الخدمة انا اعرف ان الرئيسى فى ابو رواش لكن معرفش مكانه بالتحديد ياريت لو معلومات عن طريقه من اول ما اطلع الدائرى

4. ايه اللى بيتم فى الصيانة بالتحديد بالاضافة الى انى عندى بعض الملاحظات فى العربية زى ما انتوا عارفين وانا ناوى اقولهم عليها بالتفصيل

5. تكلفة الصيانة وبتستغرق اد ايه وقت خصوصا وانى عندى بعض الملاحظات زى ماقولتلكم


شكرا مقدما وفى انتظار ردودكم

اقتباس:

---

المشاركة الأصلية كتبت بواسطة khaled_saga

السلام عليكم ورحمة الله وبركاته .. اخوانى الكرام

1. امتى المفروض اعمل الصيانة يعنى على الالف بالظبط ولا اكتر بشوية قليلة ولا شوية كتير يعنى عادى (بيدقوا على العداد فى التوكيل؟) المهم انها تكون بعد ما اعدى الالف؟

كده كده العربية بتنورلك في التابلوه لمبة مفتاح انجليزي برتقالي و ده معناه معاد الصيانة ....لما تنور اتصل شوف المعاد اللي يناسبك ...و روح بعد ما تعمل الالف ...انا رحت علي 1700 تقريبا مش متذكر قوي .... و من جهة بيدقوا فاه هيدقوا لان ده مخرجهم في حالة ان فيمشكلة عويصة ...يحاول يقول ان انت السبب لعدم انتظامك في الصيانات الدورية بس ربنا ما يجيب لك مشاكل ان شاء الله

2. ازاى وامتى احجز ميعاد الصيانة يعنى عند كام كيلو احجز وكمان قبل الميعاد بأد ايه يعنى اقصد انا مثلا حابب تكون الصيانة يوم الجمعة او السبت عشان دول ايام اجازتى فالمفروض احجز قبلها بكام يوم عشان اظبط ميعادى على الجمعة او السبت

زي ما قلتلك ابدأ احجز بعد اللمبة ... من علي تليفون ابو الفتوح او ابو رواش و اختار المعاد التالي اللي يناسبك ....يعني بفرض نورت السبت ...كلمهم و شوف لو في معاد السبت اللي بعده ... فهمتني؟؟؟؟

ابو رواش :-3539124 – 35391240 – 35391241 – 535391243
توحة المختصر:- 19227

3. اماكن مراكز الخدمة انا اعرف ان الرئيسى فى ابو رواش لكن معرفش مكانه بالتحديد ياريت لو معلومات عن طريقه من اول ما اطلع الدائرى

ابو رواش .....
تنزل المحور من الدائري ...... او تنزل الصحراوي "قاهرة اسكندرية" من الدائري....
تفضل ماشي كأنك رايح البوابات
فبل البوابات في يافطة القرية الزكية ...... تدخل يمين معاها
هتلاقي القرية علي ايدك الشمال و الناس بتلف يو ترن علشان تدخل ...انت تكمل علي طول
هتلاقي تقاطع برضه تكمل علي طول
حبة كده 200 -300 متر و هتلاقي توحة علي اليمين و حمر زي اعلانات اسبيرانزا ... واضح ميتوهش


4. ايه اللى بيتم فى الصيانة بالتحديد بالاضافة الى انى عندى بعض الملاحظات فى العربية زى ما انتوا عارفين وانا ناوى اقولهم عليها بالتفصيل

ولا اي حاجة ... ربط تأكيد و غيار 5 لتر زيت موبيل 1 + فلتر
لو عندك شكاوي خليك واضح جدا وانت بتشرح و اكد عليها علشان مع العدد الدنيا بتيقي كنافة


5. تكلفة الصيانة وبتستغرق اد ايه وقت خصوصا وانى عندى بعض الملاحظات زى ماقولتلكم
الزيت و الفلتر كنت في ابو غالي عملو 336 .... يعني اعمل حسابك علي 350 مثلا .... المصنعية مجانا في صيانة ال 1000 فقط

الوقت بقي تروح بدري علشان لو امكن تخلص بدري .... بس برضه اعمل حسابك علي ان اليوم مضروب


شكرا مقدما وفى انتظار ردودكم

---

عفوا يا سيد الناس و ربنا يوفقك ان شاء الله

ربنا معاك ياخالد باشا فى صيانة الالف ويارب تلاقى حل لكل مشاكلك وعقبال اما يبقوا 10000000 الف

كنت عاوز اعرف .. هو انا المفروض بعمل صيانات لحد امتى لان متهيالى موضوع الصيانه الدورية دة مش فى كل السيارات ولا انتوا اية رايكم .. وكمان عاوز اعرف بعد صيانه الالف هيبقى صيانة الاية ؟؟ وبعدها وهكذا .. لان متهيالى موضوع الصيانه الدورية دة هيعد مع الواحد جامد فى الفلوس وهيخلى الميزانيات تخرم فعاوز اعرف علشان اعمل حسابى لما اجيبها وابقى عارف الدنيا ماشية ازاى وهيتصرف على تصيينها لحد امتى وامتى ييجى الوقت الى اركب فية عربيتى من غير ماعمل صيانه الا فى حالة لو ظهرت مشكله جامدة لاقدر الله .. وشكرا ليكم

اقتباس:

---

المشاركة الأصلية كتبت بواسطة hemaa_82

عفوا يا سيد الناس و ربنا يوفقك ان شاء الله

---

والله يا هيما مش عارف اشكرك ازاى انت بترد على كل كلمة مش كل سؤال
جزاك الله خير وتقبل حياتى

اقتباس:

---

المشاركة الأصلية كتبت بواسطة katoba

ربنا معاك ياخالد باشا فى صيانة الالف ويارب تلاقى حل لكل مشاكلك وعقبال اما يبقوا 10000000 الف

---

تسلم يا احمد على متابتعك معايا ومتابعتك لكل مواضيع المنتدى ويسمع من بؤك ربنا وتتحل
وعقبال يا سيدى مانقف جمبك لما تستلم على خير ان شاء الله ونتابع معاك زى ما بتعمل:S_thum1[1]:

اقتباس:

---

المشاركة الأصلية كتبت بواسطة katoba

كنت عاوز اعرف .. هو انا المفروض بعمل صيانات لحد امتى لان متهيالى موضوع الصيانه الدورية دة مش فى كل السيارات ولا انتوا اية رايكم .. وكمان عاوز اعرف بعد صيانه الالف هيبقى صيانة الاية ؟؟ وبعدها وهكذا .. لان متهيالى موضوع الصيانه الدورية دة هيعد مع الواحد جامد فى الفلوس وهيخلى الميزانيات تخرم فعاوز اعرف علشان اعمل حسابى لما اجيبها وابقى عارف الدنيا ماشية ازاى وهيتصرف على تصيينها لحد امتى وامتى ييجى الوقت الى اركب فية عربيتى من غير ماعمل صيانه الا فى حالة لو ظهرت مشكله جامدة لاقدر الله .. وشكرا ليكم

---

بص يا سيدي

انت هتقعد تعمل صيانة لغاية ما الضمان يخلص يعني 100 الف كيلو او 3 سنين ، يعني هتروح التوكيل تقريبا 20 مرة

ابتدي العد بأه

وطبعا لو مروحتش الضمان هيسقط

الصيانه كل تلات شهور او اول لمبه المفتاح تنور فى التبلوه

شكر يارجالة قسم الاسبرانزا ياللى بتحرجونا دايما بتعاونكم وذوقكم وعقبال اما نشوفكم كمان كام سنة فى قسم المرسيدس او البى ام ونبقى كلنا كدة بربطة المعلم ان شاء الله :Oc_sun1[1]:

الحمد لله حجزت النهاردة ليوم 21\5 الساعة 8:30 صباحا

انا رايح ان شاء الله يوم السبت بعد بعد بكرة توكيل جسر السويس اللي في شارع التلاجة بس الساعة 8 صباحا ....
اعمل صيانة ال 25 و اغير تيل و فيوز ولاعة علشان بنتي دمرتها من كتر الوقوف عليها شغالة و اشوف ايه حوار مكنة الزجاج اللي عليها عفريت دي

اقتباس:

---

المشاركة الأصلية كتبت بواسطة hemaa_82

انا رايح ان شاء الله يوم السبت بعد بعد بكرة توكيل جسر السويس اللي في شارع التلاجة بس الساعة 8 صباحا ....
اعمل صيانة ال 25 و اغير تيل و فيوز ولاعة علشان بنتي دمرتها من كتر الوقوف عليها شغالة و اشوف ايه حوار مكنة الزجاج اللي عليها عفريت دي

---

بالتوفيق يا هيما