كنت عايز اعرف ازاى انضف تلاجة التكيف اللى ورا التبلوة لان اداء التكييف اى كلام ولما سألت بتاع التكيف قالى التلاجة عايزة تنضف وبعدين نصحنى وقالى بلاش عشان كدة هنفك التبلوة وعمرة ما هيرجع زى الاول .
عرض للطباعة
كنت عايز اعرف ازاى انضف تلاجة التكيف اللى ورا التبلوة لان اداء التكييف اى كلام ولما سألت بتاع التكيف قالى التلاجة عايزة تنضف وبعدين نصحنى وقالى بلاش عشان كدة هنفك التبلوة وعمرة ما هيرجع زى الاول .
معلش فى حاجة تانية اول مابشغل التكيف بشم ريحة كمكمة او زى مايكون ريحة مياة وتراب
هي العربية موديل كام .. ريحة الكمكمة دي بتبقى في العربيات الجديدة و بتروح بعد تشغيل التكييف لفترة
و اكشف على شحن التكييف الاول قبل ما تنضف حاجة
مش عارف اقول لك ايه؟؟
بس اول سؤال...هو مش كنت تتم جميلك وتكتب السعر بالمرة
هي ابرو حاجتها ممتازة جدا...وانا مجرب لهم اسبراي تنضيف الكربيراتير...فوق النمرة واحد وبعشرين جنيه
بس انا عندي فالسويفت كانت المشكلة دي...وماعتقدش خاااااااااالص ان الاسبراي ده هينفع
اللي حصل اني رحت لواحد كنت متعشم فيه انه كويس وقال لي التلاجة بتاع المكيف ممكن تنضف وهي في مكانها
المهم خليته ظبط وعمل اللي هو عاوزه وخد اجرته وقال لي كده تمام والمكيف مفيهوش غلطة ونضيف زي الفل
المهم اسبوع والتاني والاقي الريحة اياها تطلع تاني
قلت عليا وعلى ولاد ال ــــــــــــــــ دول
رحت جايب صندوق العدة من بعد التراويح كده في رمضان ورحت نازل
فكيت باب التابلوه والكاسيت ووش الكونسول
وبعدين رحت متفحص التكييف كويس جدا لقيته واضح في تقسيمه... من اليمين البلاور وجنبه التلاجة وجنبه وحدة التوزيع ورا كاسيت العربية اللي بتوزع الهوا البارد
ولقيت البلاور متثبت ب 3 مساميـــر...فكيته وسقطته من مكانه وفكيت الفيش...ولسه بامد ايدي لقيت طين وقرف سمكه حوالي 1 الى 1.5 سم مغطي التلاجة بالكامل والعلبة اللي حواليها
فده استحالة تتفك باي نوع اسبراي من الانواع دي
المهم تفحصت العلبه لقيتها مقسومة نصين بالغرض مربوطين في بعض بكلبسات...حاولت افكها اتكت من ناحيتي ومن ناحية صدر العربية فضل كلبسين معرفتش افكهم فالعلبة بقت متواربة....رحت رايخ المغسلة بتاع العربيات وجبت مشمع غسيل وفردته تحت التلاجة ورفعت طرفه عالفتيس وطرفه عالكرسي والطرف الرابع خارج عالعتب والباب مفتوح...لما بقت الدواسه عامله زي الحوضوجبنا المسدس ودخلته من ناحية الكاسيت ونضرب الميه بالمسدس اكتر من نص ساعة وحوالي 200 لتر ميه على ما نزلت ميه نضيفة ورايقة بعد السواد الفاحم اللي كان نازل....ونشفنا بالهوا...وغسلت تاني بالمية والديتول وبعدين نشفت بالهوا....جيت للبلاور شرحته تماما وطلعت الموتور وكان خشن جدا وعملت له صيانة زي المارش وغيرت له الشربون واتشحم واتجمع تاني وركبته
النتيجة....ما اقولوكوش....برودة ممتازة وغير معتادة من مكيف السويفت مما ترتب عليه انه بقى بيفصل كتير ويوفر فالبنزين
التكلفه....المغسلة خدت 5 جنيه...و5 ساعات شغل (لو صنايعي كان خد له 100 جنيه)
الخلاصه...ممكن يكون الاسبراي كويس بس هو عاوز مكيف جديد....اللي زي حالتنا قديم مالوش الا الضرب بالنووي زي مانا عملت كده....
انا لقيت الكلام دة مكتوب فى احد المشركات هل ينفع فى الانوس
متابع باهتمام
راجع الموضوع ده ستجد اجابة لكل اسئلتك
http://www.nilemotors.net/Nile/208971-a.html
ياطارق دي نصيحة ناقصة اسمحلي يعني
لازم تقوله قبل مايبتدي في حاجة اللي هيشوفه
ولازم كمان تنصحه إنه يكون عنده صبر وطولت بال ودماغ رايقة
عشان الموضوع مش سهل بصراحة
إنت نسييت ولا إيه
:)
السلام عليكم
متابع باهتمامو ما شاء الله شغل الله ينور بس اذا سمحتوا :-
1 لازم اللى يفك الالفان كويل يكون عنده معلومات وافيه علشان لو ماسوره اتعصرت او اتهزت من مكانها هنحتاج نغير اويل سيلات و كده هنفقد الشحنه .
2 الحقيقه و عن تجربتى الشخصيه اكثر من مره بفضل رشاش المياه فى الاول بعدين صابون سائل بدون رائحه معطر و اخير ديتول بعدين هواء و الحقيقه عملت مسدس ميه فى الجراج بتاعى عن طريق شراء مسدس رش النباتات و الزهور ( بيتباع فى كارفور بحوالى 45 جم ) و فيه انواع بتيجى بالخرطوم بتاعها و ركبته على خرطوه ميه الجراج ( مركب موتور ميه 1 حصان ) و اوعى لا تقولى محطه و لا غيره .
3 - طبعا الكلام ده يستلزم ان البلاور ( الفانه ) كمان لازم تتفك و تتنظف .
4 بعد الهواء ( بالسيشوار او مكنسه من اللى فيها شفط و طرد - اللى عندى بيسيل امريكى ) نرجع كل حاجة و كله تمام ان شاء الله
طب سبب البلاوى اللى بتتكون دى منين و د ه الاهم علشان ما نعملش الصيانه دى على فترات متقاربه ؟
1 - ممكن الهوايه بتاعه دخول الهواء الخارجى تكون بنسبها مفتوحه و طبعا بتدخل عوادم السيارات و طبعا بعد ما نقفل الكباس الثلاجه بيبقى عليها ندى يلم تراب و خلافه.
2 و دى الاهم لما بنروح ننظف العربيه فى محطات الخدمه بنفرح لما العامل يدخل بالهواء و يقعد يدعك فى الفرش الال ايه بينظفه و دى الجريمه - لان الهواء المحمل بالتراب جزء كبير منه ما بيتشفطش للخارج و بيمسك اما فى السقف القطيفه - عدادات التابلوه واخير كويل التابلوه .طب نعمل ايه ؟؟؟؟؟
1 -ا لاحسن نستخدم المكنسه للشفط و فوطه منديه للقوائم و التابلوه. بعدين الملمع .
2 - استخدم سبراى معقم و مطهر الهواء ( من جونسون - اسمه اوست و بيتصنع فى السعوديه و متوفر فى الهايبرز ) داخل فتحات التكييف مع فتح البوابه لفتره 5 دقائق .و ده طبعا للعربيات اللى فيها كمكمه بس مافيهاش رواسب و شوائب .
3 نعرف ازاى اذا كان فى وساخه فى الكويل - بسيطه - لما الهواء يخرج مكتوم او ضعيف يبقى الكويل مسدود و نعمل الشغل العالى اللى فوق ده .
دمتم بود