الموضوع: شهادة منقولة بخصوص احداث امبابة

المشاركة الأصلية كتبت بواسطة ehab_mansour

الله المستعان
أشك ان ممكن ده يحصل لأنه بقالك شهور بتتكلم في قضية كاميليا ولم يحدث ولن تستجيب الكنيسة لأي شيء لأنهم شايفين نفسهم فوق القانون
وياريت اللي عنده اثبات وحيد ان المسجد بيعامل زي الكنيسة في مصر يقلي وانا منتظر لأن للأسف اللي كان بيعتكف في المسجد في رمضان كان بيتاخد علي أمن الدولة واللي يقرب من الكنيسة بيتدبح
وشكرا

المشاركة الأصلية كتبت بواسطة أبومريم

غالبا مش هيحصل لأن الإعلام ساب ضرب النار من الكنيسة و البيوت اللي حواليها و مسك في السلفيين و إمبارح على قناة المحور مذيعة بتتكلم على الموضوع على أساس إنه إعتداء السلفيين على كنيسة بإمبابة بالسلاح و إن النصارى كانوا بيحاولوا يدافعوا عن نفسهم و في الراديو اتصلوا بمحافظ الجيزة و قال أحب أطمن الناس إن الكنيسة في أمان !!! و تم تأمينها وإن الحمد لله مفيش مصابين من الكنيسة !!!!! و أنا كلمت بنفسي الأنبا ابانوب و طمنته إن مفيش حد يقدر يتعرض للكنيسة !!!!!!!!!!
وهكذا تحول الأمر من قتل ناس مسلمين عزل إلى إننا بنسأل اللي اتقتل ايه اللي جابك قدام الرشاش ها؟

مفيش غير ان احنا نصبر شوية ونشوف لإنه لازم يتعمل تحقيقات عشان يبقي كلنا نعرف الحق من الأكاذيب
والإعلام كده كده معروف بفساده واللي باين أن فكر المنظومة الإعلامية بايظ
فميش غير التحقيقات ولازم تتعمل عشان نقفل الباب نهائي وميكونش متوارب
ولو أن لو التحقيقات اتعملت حنسمع في المرحلة اللي جاية فساد القضاء والنيابة
مهي ابتدت الأول بإن نظام مبارك لو سقط البلد حتضيع ولما عدي الموضوع دخلنا علي نغمة الإخوان وبعدين هدي الموضوع دخلنا علي نغمة السلفيين وأعمالهم الخارقة وهو تقريبا نفس الكلام اللي طلع علي الإخوان
ياتري الموجة اللي جاية ايه؟

أيام عبد الناصر لما عمل الإنقلاب كانت الناس بتقول إن أول 3 سنين كانت كويسة وكانت فيها طموحات وآمال زي الأيام اللي عايشينها دلوقتي وبعدين جت فترة القرارات العنترية اللي طالعة من واحد المفروض إنه عسكري وفاهم وضع البلد فجت النكسة اللي قضت علي كل حاجة فهل ظروفنا دلوقتي حتودينا لنفس النتيجة
أنا بقيت أحس إن الموضوع مبقاش فلول نظام أي ثورة مضادة الوضغ دلوقتي بيقول إن البلد حتدخل في نكسة جديدة

فغلشان كده لازم التحقيقات تتفتح
وبقت مطلوبة اكتر من تحقيقات مبارك وأعوانه
عشان نبقي عارفين راسنا من رجلينا في موضيع الفتنة

المشاركة الأصلية كتبت بواسطة tlrsiap

حدث فى امبابه



by mahmoud hafez on sunday, may 8, 2011 at 1:25am


الحكايه بقا اصلها ايه
اصلا البصراوي دى كمنطقه جوا امبابه الشرطه والمباحث بيخافو يدخلو هناك عشان فبها صعايده -احدع ناس طبعا - وتجار مخدرات ومسجلين خطر بالعبيط دا هما عادي كده وقبل كده فى ظابط شرطه وخمس عساكر حبوا يقبضوا على واحد جوا من عيله كبيره الظابط والعساكر خرجوا جثث دا بس عشان تعرفوا طبيعه المكان

واحده اصلا قبطيه اسلمت من فتره واتجوزت واحد مسلم ودا نقلا عن الناس هناك بلسانهم قالو انها اتصلت بي واحدمن سلفيين المنطقه بعد صلاه المغرب بربع ساعه وقالتلو ان اهلها خطفوها ورجعوها الكنيسه وقعدت تصوتلو فى التليفون الراجل طبعا خدته الشهامه ولم الناس وطلعو على الكنيسه واول ماوصلو ضرب نار اتفتح عليهم من فوق الكنيسه والعماره الاي قدامها وفى ناس جريت على الكنيسه وقالت الحقو السلفيين جاييين يهدو الكنيسه قاموا قافلين الكنيسه من جوا واتقطع النور عن المنطقه
وفى الزحمه الناس قعدت تلطش فى بعض
والجيش وصل


انا وصلى الخبر من تويتر وقت صلاه العشاء نزلت اصلى وطلعت على هناك وصلت تقريبا على 8:30 كان فى ناس متجمعه قدام الكنيسه من اهل المنطقه و3 مدرعات من الجيش وضرب نار كتير متواصل بين الجيش وناس مسلحين فوق الكنيسه وفوق بيت قدامها والكنيسه اصلا فى شارع صغير جانبى والجيش ماكانش عرف يتدخل من كتر الرصاص اللى كان جاي من فوق العماره دى والكنيسه وكانو معاهم مولوتوف حدفوه على كوم زباله كبيير قوى قدام الكنيسه فالنار ولعت فيه كله
شوفت بعينى 2 مصابين وكان هناك 3 عربيات اسعاف خدو مصابين ومشيوا
بعد كده فى قناصه من الداخليه جم كانو لابسين مدنى وخدوا اتنين من شباب المنطقه طلعوهم على سطوح اعلى من العماره ولما طلعوا ضرب النار بقى متواصل بغزاره من الجيش واستعملو رشاشات الالى بتاعت المدرعه وبعد كده فى فرقه حاولت تقتحم الكنيسه والمطافى جت وبدأت تطفى النار المولعه اللى قدامها وفضلنا نسمع صريخ من جوا الكنيسه لمده 10 دقايق والضرب بره بردو كان شغال على فترات وهديت الدنيا خالص بعد كده ورجع نور الكنيسه ينور ودخلت 3 مدرعات الشارع الصغير بتاعها واول ما دخلو المسلحين اللى كان على العماره بدأؤ يحدفو مولوتوف على المدرعات فابأو يرجعو تانى
اهل المنطقه لما لقو المدرعات بترجع اتجمعوا وبدأو يهتفوا "مسلم ومسيحى ايد واحده " وجرى قدامى واحد سلفى بدقن معاه سكان اقباط من البيت اللى قدام العماره اللى فيها المسلحين وكسروا الباب وخدوا معاهم عساكر شرطه عسكريه وطلعو فوق السطوح وشويه عيال عفاريت من المنطقه عملو مولوتوف فى ثوانى وطلعو وراهم وفضلو يحدفو على المسلحين اللى فوق العماره والناس اللى فى الشارع جابو موتوسيكلات وسلطو النور بتاع الكشافات على العمارهدى فالمسلحين مابقوش عارفين يضربوا نار خالص والمولوتوف فضل نازل عليهم لحد ما الجيش اقتحم العماره دى نفسها والقناصه والجيش انتشرو على كل بيت حوالين العماره دي وبعد كده الدنيا هديت تماما والامن المركزي اللى كان وصل على 9:30كده بدأ يعمل كردون حوالين المكان
والناس فضلت تهلل للجيش والكلام دا على الساعه 10:30
بعد كده انا مشيت والناس بدأت تروح بس الاغلبيه لسه واقفه


اللى انا مستغربله كميه الرصاص اللى اتدربت من المسلحين دول
وباب العماره اللى كانو قافلينو وحطين وراه متاريس كأنهم كانو مستنين حاجه تحصل
والناس مش عارفه اصلا هما مين
أقباط ومسلمين سلف وغيرهم كانو وقفين حنبى كله بيقول ميين دول
واشمعنا البنت دى تتصل بعد المغرب بربع ساعه الوقت اللى معظم السلفيين بيقضوه فى المسجد دروس ووعظ وكده

مش عارف انا هاروح تاني الصبح عشان اعرف الدنيا وصلت لحد فين

بس المهم ان اهل المنطقه اقباط ومسلمين كانو جنبى كتف فى كتف وهتفوا
لا اله الا الله
مسلم ومسيحي ايد واحده

وطز فيككو يا بتوع الطائفيه مش هتعرفوا تولوعو بيننا
-------------------------------------------------------------------
انتهت الشهادة
انا ما عنديش اثبات لصحة الكلام ده , ولا مؤشر على مدى صحته
بس انا شايفه منطقي جدا
او على الأقل هو متسق مع وجهة نظري , ان القصة دي مدبرة


و افتكروا كويس , مجرمين و تجار مخدرات = علاقات قوية مع قيادات الحزب الوطني و قيادات الداخلية الفاسدة

الكلام ده شبية من الكلام اللي في اللينك ده