قربت علي الانفجار ..الحقوني

**tamatemo** · 08-05-2011 08:23 PM

الموضوع اني من كتر الكبت قربت انفجر

انا كنت شغال سيستم ادمن في شركة من شركات الاتصالات وبعدها ربنا كرمني واشتغلت في احد الجامعات الاجنبية في مصر

وبعد 6 شهور تقريبا حصلت الثورة المباركة

وقعدت في البيت

وهنا كانت الطامة

انا بقالي في البيت من شهر فبراير يعني داخل علي 4 شهور دلوقتي ولسة مش لقيت شغل في مجال او في اي مجال قريب مني مجالي

مشكلة قعدة البيت بعد 6 سنين شغل متواصل في اماكن ليها وزنها مشكلة فظيعة

بتبدا تعمل حاجات بسيطة بحيث تشغل دماغك بيها وبعدين تفكر تعمل ايه تاني وتالت

لغاية ماتوصل لمرحلة ان مفيش حاجة ممكن تتعمل اكتر من كدا

ولا يبقي نفسك في حتي الخروج او ان تشوف اصحابك ولا تعمل اي نشاط

لما قعدت في البيت بلا هدف وحاجة تتعمل ولا حتي اي شغلانة ولا مشغلة

الاتجاه الاساسي في التلفزيون

وطبعا اكيد هاتشوف الاخبار

المهم ان اكتشتف ان الواحد كل يوم والتاني عمال بيتشحن من البرامج والاخبار كل يوم فيه شحن جديد وكل يوم فيه مشكلة جديدة

لدرجة لو نزلت مشوار بالعربية وحد استغبي في السواقة قدامي وكان هايخبطني مثلا بيبقي عندي كمية غضب وعصيبة كافية انها تبهدل الدنيا

بس ربنا بيستر وبتملك اعصابي

اخر موضوع بتاع امبابة اكتشتفت اننا بنتشحن زي البطاريات بالظبط

عاملين يشحنوا فينا ويشحنوا لغاية ما ننفجر وفي الاخر الاعلام يجي يصوت ويقولك ايه اللي حصل للشعب المصري

ايه اللي جرالنا
ومين السبب

زي الشحن اللي حصل بعدج ماتش الجزائر بالظبط

واحنا جدعان اوووووي وبنقع في المقالب بسرعة

اعمل ايه علشان مانفجرش من حياتي ومن كل شئ موجود؟؟؟؟؟؟!!!!!!

**aboalm** · 08-05-2011 08:52 PM

اعمل زيى لما باتخنق من التلفزيون باقلب المحطه عالطول و اهرب على ناشيونال جيوجرافيك و توابعها أرحم بكتير من الشحن الزائد اللى بنتعرض له بصراحه الواحد اعصابه مش ناقصه

**AmatoALLAH** · 08-05-2011 08:56 PM

اعمل زي ما بئتش اقرا اخبار و لا اتابع الا المهم و القليل فقط

جاتني نفس حالتك دي من شهر و كنت فعلا حاسه اني مش طبيعيه و اعصابي تعتب جدا لحد ما قللت من فرجتي علي الاخبار و برامج التوك شو

**Dr_Mido** · 08-05-2011 09:23 PM

نصيحه ومن غير تريقه اعمل زى اما قنوت دينيه محترمه او كارتون

**MOUSTAFA_SAAD** · 08-05-2011 09:26 PM

ايه يا عم تماتيمو روق امال وان شاء الله ربنا يفرجها علينا كلنا ما الواحد اهو شغال موظف محترم واللى جاى على اد اللى رايح ومش عارف احوش حاجه وبرده نفس الخنقه والزهق والملل سيبها على الله

**otefa** · 08-05-2011 09:30 PM

أعلام سطحي غبي موجه في معظمه
خد الخبر وأمشي عكسه هاتظبط على طول ههههههههه

**Ahmed_Ramadan** · 08-05-2011 09:36 PM

أنا زيك على فكرة بالظبط بس كنت رايح شركة بترول كبيرة و فعلا يا جماعة محدش هيحس بالى بيتكلم عليه غير اللى بيمر بنفس الموضوع.....أنا عن نفسى أخدت القرار بإنى مسافر بره البلد لبلد الناس فيها بتفهم (مش بلد قرر الإنتحار) ...و مبقتش بهتم بأخبار البلد و ماشى فى إجراءات السفر (مع العلم انى جالى عروض قبل كده بره مصر)