الموضوع: اخبار العصابة المفترية ... العصابة الهونداوية .

السلام عليكم جميعاً يا أحلى عصابة .
طبعاً بما ان القسم نايم حبتين تلاتة فى الفترة اللى فاتت دى ... وبدأت الشكاوى تنهال علينا من إدارة المنتدى لضعف نشاط العصابة فى الاونة الاخيرة .
وبعد تفكير عميق ومتعمق ( حلوة متعمق دى ) قرر العبد لله نوكومنت انى أخرج عن حالة النو بتاعت الكومنت بتاعى وأخليها فرى كومنت .
وده طبعاً مش هيحقق الا إذا بقى فيه كلام يستاهل الكومنت ... والكلام ده مش هيحصل الا لو بقى فيه مشاركات منكم .
وعاوزين المشاركات دى تكون فى الاساس خاصة بقسم الهوندا بكافة موديلاته .وهتكون شكل المشاركات اللى هتنفتح هنا فى الموضوع ده اكننا عاملين مقابلة من مقابلاتنا وقاعدين مع بعض بنحكى فى مشاكلنا وطرق حلها .
وأكيد من خلال حكاوى القهاوى اللى هنعملها دى هنساعد بعض ونتبادل الخبرات مع بعض بس بشكل واخد طبع لمة الاصحاب على القهوة والكافيهات .
وبما اننا ذكرنا القهوة والكافيهات يبقى الموضوع برضوا اجتماعى يعنى هنعرف بيه اخبار بعض ونطمن على بعض بدل ما أحنا عمالين نتساقط واحد ورا التانى كدة .


وهيكون فيه أكيد شروط واشتراطات عامة للاشتراك فى عضوية موضوع أخبار العصابة المفترية ... العصابة الهونداوية .

والاشتراطات المبدأية للعضوية هتكون :-
1 - أن يكون العضو هونداوى أصيل ويكون عدى عليه 6 أشهر على الاقل فى قسم الهوندا ( القاعدة دى أكيد هيبقى فيها أستثناءات بالكوسة وكله يفتح مخه ) .
2 - ان يكون العضو هونداوى أصيل برضوا بس لظروف قهرية خارجة عن ارادته ترك قسم الهوندا مجبراً ( انا عارف انكم هتقولوا انى مفصل القاعدة دى لناس مخصوص ) .
3 - ان يكون العضو فعال ومشارك وليس متفرجاً من بعيد لبعيد ( ما انا هعرف يعنى هعرف مين اللى اللى هيختلس النظر ويمشى من غير ما يشارك ) .
4 - ان يتم الالتزام بالاداب العامة للقعدة اللى هنكون قاعدينها وأى تجاوز سيتم تطبيق اقصى العقوبة للعضو المخالف من باقى اعضاء العصابة المفترية ( طبعاً ذكرت كلمة المفترية بعد العصابة للتخويف والارهاب من اللى هيحصله ) .
5 - القواعد السابقة واللاحقة قابلة للتعديل والاضافة عن طريق طريق الاستفتاء العام .
والله الموفق والمستعان ،،،

آآآه مين هيشترك فى العضوية قبل ما أسعار الاشتراك تغلى ...!