لو عندك او ناوي تشتري سوزوكي سويفت يبقي لازم تقري النصائح دي
السويفت ببساطه خالص عربيه محترمه اوي اوي و ما تسمعش كلام اللي يقولك ورق و ما تجيش غير فابريكه و بس لانهم سوري ناس ما بتفهمش.
انا اهم حاجه عندي تكون العربيه فابريكه دواخل و حتي لو مش كده برضه ممكن تتظبط.
تعالي نبتدي واحده واحده
1.السقف ثم السقف ثم السقف تخلي بالك من البارومه بتاعه و انت فاكك حاليا تخلي السمكري ياخد باله من البارومه تحت البربيز (الزجاج) الامامي و الخلفي لان المكان دا في اي عربيه بيجيب بارومه و تقيس الزجاج بعد ما يعمل البارومه و يسروخ و لازم يكون محكم و بعد ما ترش و تركبه تمليي حواليه سيلكون كويس و تسيب السوليتيب علي الزجاج يومين علشان السيلكون يعضم كويس.
و تاني حاجه و الاخطر في السقف الاجناب بتاعه لان لما بتمسك فيها البارومه قول علي السقف يا رحمن يا رحيم للذلك خلي السمكري يفحصها و لو فيها بارومه في لسقف من فوق تتعمل بقصدير(لحام بواجير) لان السقف طري اوي و اللمبه لو اتحطط فيه تبهدله .
2.الفجاوي الخلفيه برضه بتجيب بارومه و حلها تتعمل و تاخد بلاك خام يعني خلي البوهيجي يديها بلاك مش متخفف بتنر يقولك ما ينفعش قوله حجيبلك علبتين من عندي لانه بيخففه علشان يوفر و بعد البلاك لخام تندق معجون و تترش لااااااااازم البلك لخام علشان تعيش اطول وقت.
دول اهم نقطتين في بارومه العربيه .
تعالي بقي نمسك العفشه
1.العفشه الخلفيه ما تشغلش دماغك بيها مش مؤثره في حاجه.
2.تعالي من قدام بقي
لو الاسكترا وحشه و فيها بوش يعني الدركسيون فيه بوش يبقي غيرها و هات واحده جديده تايواني ب 350 جنيه اوعي تجيب استعمال علشان بيقولو ياباني.
حاجات العفشه بالذات تيجي جديده مش استعمال
3.المساعدين لو وحشه هاتلك اتنين ياباني kyb ب 450 جنيه و انساهم خالص طول ما انت راكب العربيه
4.المقصات البيض بتاعها متبرشم فيها و لو البيض وحش غير المقصات باتنين جداد ب 300 جنيه و بكده تنسي العفشه دي خااااااالص.
5.الكبالن هات جديد حتي لو صيني ب 90 جنيه الواحد و بيعيشوا كويس و معايا ممتازين الصراحه بغيرهم كل سنه و نص تقريبا .
تعالي بقي للمكنه و مشتملاتها
1.الردياتير لو وحش هات واحد نحس الماني 3 ماسوره و بتاع الردياتيرات بقصه علي قدها و بيخلي الموتور متلج
2.الفرامل و الطنابير لو الميكانيكي قال وحشه غيرها و التيل كمان يبقي جديد اوعي تسمع كلام واحد يقولك اخرط الطنبير
خرط الطنابير = تسخين الطنابير = تسخين الشحم من الرولمان بلي = الرولمان بلي يتفرط و تبقي مصيبه :eek:.
3.الموتور ما فيهوش اي فنيات خالص و معمر و حلو و ضبط الكهربا بتاعه علي بنزين 80.
اه صحيح لو الموتور خفيف و عاوز عمره اشتري دمغك و هت واحد استيراد كامل بالفتيس ب 2000 جنيه بدل وجع قلب العمره و بعدين البلوك الومنيوم ممكن العمره تبهدله.
.............
شكل العربيه الخارجي
لو العربيه اكصدامتها وحشه هت اتنين جداد و الفوانيس الاماميه حتفرق كتير اوي في منظرها .
بــــــــــــس كده
المحافظه علي العربيه بقي:
1.بعد كل شتوايه تاخد العربيه المشحمه تغسلها و خصوصا من الفجاوي علشان البارومه.
2.فوطه و بايدك بعد كل شتوايه او ميه تنزل تنشف السقف و المجاري بتاعه من عند الكاوتش الجانبي علشان الميه ما تركنش فيه.
3.لما تفتح الشبطه حتلاقي فيها زاويتين في الاجناب برضه بيلمو ميه تبقي تنضفهم دايما و تنشفهم بعد كل غسيل او شتا.
4.كاوتش الكبالن ابقي اطمن عليه دايما و اي واحده تتقطع فورا غيرها.
بــــــــــــــــــــــــ ـس كده
و اتمني اني اكون افدتك و ابقي طمني عملت ايه
طبعا طبعا الكلام ده والنصائح الغاليه دي منقوله علي لسان الاستاذ المحترم المخضرم في امتلاك السويفت
الاستاذ / حازم خضر
وهو طلب مني نشر هذه النصائح لكي يستفيد الجميع ويارب يجعلها في ميزان حسناته
الف شكر لكل الاخوه الاعزاء الي شاركونا بالرد وشكرا استاذ حازم
اقتباس:
المشاركة الأصلية كتبت بواسطة hazem_khidr
الف شكر للاخ العزيز المحترم frup
و انا ما عملتش حاجه و لولا انه سالني فعلا مكنتش عصرت دماغي علشان افتكر دا كله :)
انا لو الاقي حد مهتم بالسويفت حكتب عنها كتير بس رغم وجودها في الشارع قليله اوي في المنتدي :(.
شكرا جزيلا علي التعليقات و الي لقـــــــــــــــــــــاء
السلام عليكم اخواني الاعزاء
طبعا الف شكر لكل شخص سواء من عائلة السويفت او من خارجها القي نظره علي الموضوع ويارب يكون عجبهم
وشكر خاص جدا لكل من رد علينا بكلمه شكر او تحيه او اعجاب وطبعا كل الكلمات الجميله الموجهه منكم نرسلها مباشره الي الاستاذ الجميل الرائع
حازم خضر
وده لانه صاحب النصايح وفعلا هو موسوعه وانا اتمني اكون في خبرته وكمان اتمني ان كلنا اي حد ينصح من اي زميل داخل او خارج المنتدي ينشرها علشان كلنا نستفيد او عنده مشكله وحلها برضك ينشرها علشان نستفيد منها
وإن شاء الله نفضل علي تواصل مستمر علشان ربنا يكرمنا جميعا ويوفقنا للخير
والف شكر لكم جميعا