طقوس المذاكرة و أيام الامتحانات

طبعا اليومين دول كل ما تكلم حد لسه بيدرس لازم تتكلم معاه عن المذاكرة و قرب الامتحانات.. لسه كنت باتكلم مع واحدة عن المذاكرة فجرنا الكلام لطرق المذاكرة و طقوسها.. رجعت ورا كام سنة كده لأيام المذاكرة و الامتحانات فجه في بالي سؤال للطلبة و اللي خلصوا مذاكرة.. ايه ذكرياتكوا مع ايام المذاكرة و الامتحانات؟ وكنتوا بتذاكروا ازاي؟ و ايه الحاجة اللي كنتوا متعودين عليها و انتوا بتذاكروا؟ و للطلبة نفس الأسئلة بس في الحاضر طبعا :)

انا عن نفسي كان لازم تكون قادمي كباية الشاي و الا ماعرفش اذاكر و كنت باعمل حاجة في منتهى الاستهبال و اني كنت لما انوي اذاكر... هذاكر اهه خلاص و مافيش اي حاجة تانية تتعمل غير المذاكرة... اقول لاااااا و كباية الشاي راحت فين؟ اقوم عاملة كباية شاي محترمة... كده بأه خلاص... مش فاضل حاجة غير المذاكرة... اقوم فجأه افتكر اني مثلا عايزة اكلم صاحبتي في التليفون اسألها على حاجة في المذاكرة... اقوم مكلماها و كباية الشاي في ايدي... و تكون النتيجة اننا نفضل نتكلم في التليفون و اشرب الشاي و انا باكلمها... و لما اخلص المكالمة افكر تاني في المذاكرة أقول يا خبر... ده لسه ما صلتش العشاء مثلا... اقوم اصلي و اخلص صلاة... و الاقي المذاكرة تاني في وشي... و طبعا كباية الشاي تلوح في الأفق... اقول بس هيه كباية شاي و اقعد القعدة اللي هيه و اخلص كل المذاكرة اللي ورايا... اعمل كباية الشاي و احطها على المكتب و اقعد... و يكون مصيرها زي اللي قبلها بس لسبب تاني غير الأولاني... و هكذا و تكون حصيلة اليوم... ييجي 5 كبايات شاي و محصلة المذاكرة..... صـــــــفـــــــر :D

هو انا من الآخر كده كنت بتاعة مذاكرة شهر الامتحان.. و بس :o

ما كنتش باعرف أذاكر مع مجموعة آآآآآآآآآآبدا.. نظام رايحة أذاكر مع واحدة صحبتي ده كان بيبقى يوم فاشل بكل المقاييس.. طبعا كنا بنقضيها رغي.. نبدأ بكبايتين الشاي و الأخبار و ياخدنا الكلام.. نلاحظ انه عدى ساعة من غير ما نفتح كتاب.. نقول لأ خلاص خلينا نركز بأه.. نيجي نفتح حاجة نلاقي حد فينا علق على حاجة و بعد كده إديها ضحك و رغي.. و طبعا من شاي لغدا للذي منه نبص نلاقي اليوم كله عدى من غير ما نعمل اي حاجة و نلاقي نفسها مضطرين نروح البيت نسهر على اللي كان المفروض خلاص ذاكرناه و خلصناه في اليوم ده :D

شهر بحاله؟؟ ده انت على كدة من النوع الدحاح :d
أنا بقى ماكانش لي طثوس، أنا اقرا أي حاجة في الدنيا ماعدا المقرر !!
المقرر بقى باقراه في الأجازة بعد الامتحانات في الروقان يعني :)
فاكر إن الهندسة التحليلية في سنة أولى ثانوي ذاكرتها كلها قبل الامتحان الصبح !! وجبت في الامتحان 6.25 من 10 :d:d
المهم أستاذ "سمير عوض" مدرس الرياضيات (راجل محترم جداً وشرحه ممتاز، بس اللي قاعد في الصف التالت مايسمعش صوته!) جه في أول يوم في الترم التاني قال: "اللي جايب 6 أو أقل يقوم يقف" نصف الفصل قام وقف وأنا بقى كنت من المتفوقين وجايب 6.25 :d:d
(دي كانت أول مرة في عمري أجيب النمرة دي)

وكتاب "الإنفجار" للأستاذ هيكل موجود في البيت من زمان، كل ماجي اذاكر "الاحتمالات والإحصاء" في تانية هندسة الاقي "الانفجار" حلو في عيني واقعد اقرا فيه !!
تصوروا خلصت الكتاب في 3 أيام !! و "الاحتمالات والإحصاء" بدأت مذاكرتها الساعة السادسة من صباح يوم الامتحان (الامتحان الساعة الواحدة ظهراً)
على ما افتكر جبت تقدير "جيد" في المادة.

بالنسبة لطقوس المذاكرة، كانت إني لازم اكون نايم كويس، وبعدين الهدوووووووووووء التاااااااااام ماحبش أي صوت جنبي ولا راديو ولا موزيكا ولا أي حاجة، وساعتين ابرك من عشرة، ومبدأي دايماً "سيبوني في حالي ساعتين ممكن ابني هرم" :)

اقتباس:

---

المشاركة الأصلية كتبت بواسطة OlaOsman

ما كنتش باعرف أذاكر مع مجموعة آآآآآآآآآآبدا.. نظام رايحة أذاكر مع واحدة صحبتي ده كان بيبقى يوم فاشل بكل المقاييس.. طبعا كنا بنقضيها رغي.. نبدأ بكبايتين الشاي و الأخبار و ياخدنا الكلام.. نلاحظ انه عدى ساعة من غير ما نفتح كتاب.. نقول لأ خلاص خلينا نركز بأه.. نيجي نفتح حاجة نلاقي حد فينا علق على حاجة و بعد كده إديها ضحك و رغي.. و طبعا من شاي لغدا للذي منه نبص نلاقي اليوم كله عدى من غير ما نعمل اي حاجة و نلاقي نفسها مضطرين نروح البيت نسهر على اللي كان المفروض خلاص ذاكرناه و خلصناه في اليوم ده :D

---

كانت ماما بتقول لي إن جدي كان بيقولها "one one, two one, three none" يعني اللي يذاكر لوحده ينجح، لو اتنين ذاكروا مع بعض واحد منهم ينجح، لو تلاتة يبقى ولا واحد هاينجح !!
وده مبدأ في العائلة عندنا وعمري ما ذاكرت مع حد، لأني باحب الهدوووووووووووووووووء (وطبعاً لأن ماحدش عنده جدول مذاكرة عظيم زي اللي انا باذاكر عليه :))

انا افتكر ايام الثانوية العامة كنت بقيس المذاكرة بعدد الساعات. يعني كنت لازم اذاكر في اليوم ما لا يقل عن 8 ساعات بس كان بيجي عليا وقت خلاص مش قادر كنت اعمل اية اعمل اية؟ اقضيها اكل او نوم بصراحة النوم كان لذيذ. المشكلة بقي كان جاري واحد عايد الثانوية العامة 3 سنين وكان والدي دايما يفكرني بية ويقولي شوف لو ما ذاكرتش مستقبلك اهوة انت حر. مش عارف لية لحاد النهاردة فاكر الكلام دة. كنت ساعات اسصيب المذاكرة واقعد مع اخواتي واصحابهم موجودين كان اخويا يقولي " انت اية اللي مقعدك معانا..احنا كلنا خلصنا مذاكرة وماورناش حاجة..قوم من هنا روح ذاكر"

اما ايام الجامعة بقي كنت مقضيها بالطول والعرض وماكنتش اذاكر الاقبل الامتحان باسبوع وماكنتش باحضر نص المحاضرات ومع ذلك كنت بجيب تقدير في الاربع سنين.
كانت ايام حلوة ياريت ترجع تاني...فكرتوني بالذي مضي
اسف جدا اني طولت عليكم

اما اخوكم في كليه الطب فمطحوووووووووووووووووون من كتر الحاجات اللي المفروض اخلصها
و الامتحانات لا تنتهي يعني هبدا امتحانات اخر السنه من 7/5 و هلخبص 22/6 تخيللو :( :(
زطبعا اسلوب مذاكرتي ثوري جدا
اني بقعد علي نايل موتورز :)

اخوكم بأه كان له صولات وجولات
بس انا قبل ما احكيلكم لازم اعترف انني كنت مخطئ وندمان اني لم ابذل اقصي جهد في المذاكره فارجو الا يقتدي بي احد..
- انا فاكر في ابتدائي كنت اقرأ كل حاجه ما عدا كتب المدرسه .. الشياطين ال13 المغامرون الخمسه .. ارسين لوبين .. اجاثا كريستي "قصص بوليسيه قويه".. سيف ابن ذي يزن (حوالي 4 مجلدات ضخمه )
ده طبعا غير سمير وميكي وبطوط وعبقرينو وسوبرمان وماجد
كنت ادخل علشان اذاكر وطبعا لو هذاكر فعلا يبقي هما خمس دقائق وتلاقيني خارج ..اخواتي لما كانو يلاقوني داخل اذاكر وطولت شويه من غير ما اخرج ..يقوموا طابين عليا ويقفشوني وانا قاعد اقرأ في المغامرين الخمسه ..
-في الإعداديه كنت بذاكر ( ال ايه بذاكر ) قدام التلفزيون ... فاكر ليله امتحان العربي "ثالثه اعدادي "
ولحد الساعه 10 باليل وانا لسه مفتحتش مواضيع القرآءه ولا القصه ... ولسه في موضوعات في النحو بفتحها لأول مره .. والدي الله يرحمه جالي وقالي انت لسالك ايه (وكان عارف المنهج ).. انا خفت اخضه ..قولت له
3 مواضيع قرآءه .. قالي طيب خلصهم ونام .. وخرج وسمعته راح لوالدتي رحمها الله وهو متنرفز وبيقولها : ينفع كده لحد الساعه 10 ولسه باقيله 3 مواضيع قرائه لسه مراجعهمش .. انا الضغط زاد عليا (علي رأي حسن عابدين) وقلت امال لو كنت قلتله ان لسه ابواب من النحو و12موضوع قراءه والقصه كلها متفتحوش من اساسه (مش مراجعه ) كان هايحصل ايه ..

انت هتحسوا انى متخلف بس معلش :confused: :rolleyes:
انا عندى طقوس خاصة جدا للمذاكرة بما انى نادرا ما بذاكر :D
انا ايام الامتحانات او ايام المزاكرة عموما كنت أشغل التراكات بتاعت نيد فور سبيد وخصوصا اندر جروند 2 :cool: وكباية النسكافية والسجارة (الحمد لله بطلطها)
وبعدين اسمى بالله وامسك الكتاب لمده لا تزيد عن ربع ساعه وبعيد أقوم اعمل اى حاجه لمده نص ساعه مثلا وبعيد ارجع تانى للمذاكرة ولو الموضوع اتعقد خالص اكلم اى حد من الناس المتفوقين علشان يشرحلى وامسك ورقة اكتب فيها نوتس وراه وكان الله بالسر عليم
بس عموما مكنش عندنا مذاكرة كتير كان كله رسم
والحمد لله اتخرجت بتقدير عام جيد وامتياز مشروع تخرج وسجلت ماجستير وهمتحن التمهيدى 31-5 وله مفتحتش كتاب :eek:
ربنا يستر
ادعولى

اما ايام الثانوية العامه فكنت افتح الكتاب وحطه علة جنب وامسك ورقة واعد ارسم عربيات والحمد لله دخلت فنون جميله بدعاء الوالدين

الثانويه العامه .. وكانت ايامي سنه واحده .. كنت مدمن تلفزيون ( والحمد لله اقلعت عنه ) ..كان فيه طبيب نفسي بيجبوه بين فقرات البرامج التعليميه ..كان بيدي ارشادات كتير لكيفيه المذاكره ..انا نسيتهم كلهم ما عدا واحده "لما تكون مجهد نام وارتاح لأنك لو ذاكرت وانت مجهد مش ها تستفاد حاجه"
كنت اقعد امام التلفزيون لحد السلام الجمهوري وادخل علشان اذاكر .. طبعا اكون مجهد افتكر الجمله الجميله بتاعت الدكتور وطبعا لازم اسمع الكلام ..
ليله امتحان العربي (موعود بالعربي ) ..برده مفتحتش القرآءه ولا القصه والساعه بقت 12 باليل والإمتحان الساعه 9 الصبح ..اعمل ايه ..القصه (ابو بكر الصديق للعقاد) كانت 12 فصل وطبعا عارفين كتابات العقاد ..وكان فيه قاعده ان اول 6 فصول بيجي سؤال وال 6 الأواخر بيجي فيهم سؤال .. وبيطلب تجاوب علي سؤال واحد بس .. فقلت اذاكر ملخصات اول 6 فصول واجاوب علي سؤالهم كأنه اجباري وماليش دعوه بالسؤال الثاني
وبعدين كانت مواضيع القراءه نصفها ادبيه ونصفها علميه والقاعده (دي غير تنظيم القاعده:)) بيجي سؤالين تختار واحد منهم .. سؤال في المواضيع العلميه والثاني في المواضيع الأدبيه
فقلت اذاكر ملخصات المواضيع العلميه واجاوب علي سؤالهم كأنه اجباري وماليش دعوه بالسؤال الثاني واعمل كأني مش واخد بالي منه خالص..
ورحت الإمتحان
وكان من اصعب المواقف التي مريت بها في حياتي ....
سؤالين القصه في اخر 6 فصول ( ماليش دعوه بيهم ..اسمع عنهم بس اهو الناس بتتكلم انما مفتحتهمش)
سؤالين القراءه في المواضيع الأدبيــه .(اللي انا سايبهم ).......
طبعا ما اوصفلكوش احساسي ودرجه حرارتي اللي وصلت 50
اتاري فتحي سرور (كان وزير التعليم ساعتها) جاب دكاتره جامعه وضعوا الإمتحانات وطبعا دكاتره الجامعه ميعرفوش القواعد دي ..ده غير انهم ليس لهم قواعد للإمتحانات من اساسه

اقتباس:

---

المشاركة الأصلية كتبت بواسطة ABOZAYED

"لما تكون مجهد نام وارتاح لأنك لو ذاكرت وانت مجهد مش ها تستفاد حاجه"

---

الله ينور عليك هي دي اهم قاعده عندي برضه

ههههههههههههههههه فكرتوني بالبلاوي
لأنا المفروض جاي ثانويه عامه من الكويت فأمتحان المستوى الرفيع بنمتحنه مع بتوع الدور التاني في شهر 8
(بندفع حوالي 560 جنيه :confused: ) ما علينا
المهم طول الصيف من ساعة ما جيت في شهر 6 يقولولي زاكر أقول لسه معنديش ورق والوقت لسه ماتقلاقوش
المهم زاكرتلي فاصلين حرتهم هم كان كلهم 5 فصول على ما أتذكر
والباقي جيت أخر أسبوع أذاكرهم
المهم الأمتحان كان الساعه 9 يوم 25/8
فليلتها الساعه 12 صاحبي بيكلمني جاي من الكويت برضو بيقولي زاكرت قلتله أه الحمد لله بس لسالي فاصلين كده وأخلص وأراجع
قالي راجع كده معايا .. قلت ماشي قالي أولا عرفت الفاصلين المتغيرين :eek: :eek:
وشي جاب ألوان ...................
فاصلين أيه طلع الفاصلين اللي كنت مبزاكرش غيرهم أتصدمت والله
كان والدي نايم جريت صاحيته قلتله بس بقى تفوقلي في فاصلين أتغيروا لسه عارف من صاحبي فوقلي وأشرحمهلي(هو مدرس أول جغرافيا)
المهم هو طبعا أتفزع ومش عاوز يبينلي عشان مقلقش قالي خد زاكر الفصول التانين لحد ما أقرأ الباقي بيتكلم عن أيه
المهم شرحلي وظبطلي التظابيط
ولخصلي الباقين كمان ونمت الساعه 5 الفجر الأمتحان نمت ساعتين وقمت الأمتحان وجاه معايا والدي
بس الحمد لله جبت 9.5 من 10 والغلطه الوحده كانت في الخريطه
من يومها والدي بقيت أثق أنه مدرس خيطر هههههههههههههه
بس مبقتش أحرم ولسه بزنق نفسي والبلاوي لا تنتهي بس ده اللي فاكرة جدا

المذاكرة بالنسبه لى هى ليلة الامتحان بس مش اليوم اللى قبل الامتحان كمان كنت بحط الكتب والورق و كل حاجه تخص الماده على السرير و اجيب كرسى الحمام الصغير و اقعد عليه شويه على السرير شوية على الارض شوية رايح جاى جاى رايح طبعا المكتب مالوش اى علاقة بالمذاكرة
و ليلة الامتحان بحس انى داخل على معركة حربية بروح المحارب و اهم حاجه الروح دى و تعرف المفاهيم اللى بتتكلم عنها الماده و طرق الحل و الحكايه ماشيه ازاى و الحمد لله النتائج كانت بتيقى حلوه جدا

مره واحده استسلمت فى ليلة امتحان الفيزياء بتاعة ثانويه عامه لانى كنت زهقان من الماده و المدرس أصلا مع انى بحب الفيزيا جدا المهم كانوا 6 أبواب قريت الاول و ملخص عن التانى و مقدرتش اكمل و استسلمت و نمت فى الامتحان بقى كان هاين عليا أصوت و انهار و اعيط و اقطع الورقه المهم تمالكت اعصابى و قلت خلاص اللى حصل حصل انا دلوقتى هانقذ ما يمكن انقاذه و اجمع درجات على قد ما اقدر و عصرت دماغى فى الامتحان و كانت النتيجه 36 من 50 وال 14درجه دول تقريبا يساووا اللى نقصتهم فى باقى المواد مجتمعين فى السنتين و دخلت هندسة الفيوم و حولت بعد اعدادى لعين شمس

موضوع حلو يا علا ....كالعادة ......ألف شكر:)

أنا للاسف الشديد دودة كتب ....nerd رسمي يعني هيهيهي:o

لحد تالتة إبتدائي أبويا الله يرحمه كان المسئول عن مذاكرتي من الألف للياء بعد كده ما حدش كان بيسألني على أي حاجة لحد الدكتوراة من جامعة القاهرة.... و حاليا في كندا ...المدام بقت بتسألني عن المذاكرة:rolleyes:

المذاكرة كانت يومية طبعا باخد بتاع شهر في أول السنة "باسخن" من غير مذاكرة فعلية يا دوبك الواجب و بعدين تزيد الساعات تدريجيا لحد قبل الامتحانات ب-٣ أو ٤ أسابيع..... معسكر مغلق ما بعملش حاجة غير المذاكرة :(

الطقوس طبعا اختلفت من مرحلة للتانية.... بس دايما لوحدي ...دايما على مكتبي في أوضتي و الباب مقفول ....لو فيه أي دوشة اتجنن ...لو ما أقدرش اوقفها يبقى مزيكا و سماعات على وداني

أيام كلية الطب و ما ادراك ما كلية الطب ...مذاكرة قبل الامتحان كانت دايما بليل... ابتدي على ٥ أو ستة لحد الفجر ...أصلي و بعدين أنام

قبل الامتحان بيومين أو تلاتة لازم أغير التوقيت عشان أبقى مصحصح في الامتحانات;) .....
ياه نفسي أبطل مذاكرة و إمتحانات :eek:

بالنسبة لى علشان اذاكر لازم يكون مخى فايق يعن اكون لسه صاحى من النوم ...
كباية الشاى شىء اساسى ... التحصيل بيكون حلو لمدة ساعتين تلا تة بعدين بيقل ..
لمل دخلت الكلية سمعت ان فى ناس بتسهر تذاكر لغاية الساعة اتنين تلاتة ... انا ماكنتش عارف بيعملوا كده ازاى ... المصيبة كمان انى كان فى حاجة اسمها يصبح وحاجة اسمها يطبق ... فيما بعد عرفت ان ده هو العادى وان نوم الساعة 11 بالليل ده هو الغير طبيعى ... والحمد لله عدينا ونجحنا والله كانت احلى ايام فبل المسئوليات والشغل والتعب ...

اقتباس:

---

المشاركة الأصلية كتبت بواسطة ABOZAYED

وكان من اصعب المواقف التي مريت بها في حياتي ....
سؤالين القصه في اخر 6 فصول ( ماليش دعوه بيهم ..اسمع عنهم بس اهو الناس بتتكلم انما مفتحتهمش)
سؤالين القراءه في المواضيع الأدبيــه .(اللي انا سايبهم ).......
طبعا ما اوصفلكوش احساسي ودرجه حرارتي اللي وصلت 50
اتاري فتحي سرور (كان وزير التعليم ساعتها) جاب دكاتره جامعه وضعوا الإمتحانات وطبعا دكاتره الجامعه ميعرفوش القواعد دي ..ده غير انهم ليس لهم قواعد للإمتحانات من اساسه

---

أهي هيه دي بأه الرخامة بعينها.. يعني يسيبوا المنهج كله و ينشنوا على الأجزاء اللي انت ما فتحتهاش و يجيبوها في الامتحان؟.. طيب دلوقتي تعمل ايه انت بالأجزاء اللي انت ذاكرتها و ما جتش في الامتحان؟ تعلمهم قراطيس لب و تبيعهم الكيلو ب10 صاغ؟ :p

الحقيقة كنت بذاكر لما ابقى مزنوق وعندى امتحانات ، ورايا شيتات لازم تتقدم
لكن كان شرطى الوحيد للمذاكره الهدوء
مقدرش اذاكر الا والدنيا ساكته
معرفش اذاكر الا لوحدى
احيانا كنت بوهم نفسي انى ممكن اذاكر والكاسيت شغال
بس هيهات ، انا رجل بقلب واحد وبال واحد لاما مذاكرة لاما حاجة تانية
مينفعش اعمل حاجتين فى نفس الوقت

اقتباس:

---

المشاركة الأصلية كتبت بواسطة casber

الحقيقة كنت بذاكر لما ابقى مزنوق وعندى امتحانات ، ورايا شيتات لازم تتقدم
لكن كان شرطى الوحيد للمذاكره الهدوء
مقدرش اذاكر الا والدنيا ساكته
معرفش اذاكر الا لوحدى
احيانا كنت بوهم نفسي انى ممكن اذاكر والكاسيت شغال
بس هيهات ، انا رجل بقلب واحد وبال واحد لاما مذاكرة لاما حاجة تانية
مينفعش اعمل حاجتين فى نفس الوقت

---

انا كمان كنت باستعبط و باذاكر على الراديو.. أيام المذاكرة حفظت جميع أغاني ام كلثوم و رفاقها.. يعني بدل ما أحفظ في اللي انا باذاكر فيه اقوم من قعدة المذاكرة دي حافظة لي كام أغنية على كام مونولج على كام طقطوقة، انما ساعة الجد الجد لما كنت باحب أركز كان بيبقى الهدوء التام او الموت الزؤام :D

فكرتوني والله
انا بقي كنت ماقدرش اقعد اكتر من نصف ساعة علي الكتاب ، لذلك لجأت الي حيلة وهي اني كنت باقوم بربط نفسي في الكرسي عشان اكسل افكه واقوم:eek: اه والله
كمان كانت اختي الصغيرة كل يوم بالليل تعملي حاجة كنت مسمياها كاس العذب ودي عبارة عن شاي علي قهوة
كنت اضرب الكباية واديها مذاكرة ، طبعا الكلية ماكنتش سهلة " سياسة واقتصاد بقي "
طبعا دا كله كان قبل الامتحان باسبوع
والحمد لله خلصت ودلوقتي وبحضر الماجستير كمان

اقتباس:

---

الهدوء التام او الموت الزؤام

---

:) انتى شكلك تنفعى قائدة للمظاهرات ، عليكى تعليقات ظريفه جدا

المذاكره عندى اخر شهر او اسبوعين نشد فيهم الشده التمام ..انا عارف ان ده غلط بس اعمل ايه انا بقيت كده واتعودت على كده وخلاص سنه واتخرج مش هنغير على الاخر ..بس ده مايمنعش من متابعه بسيطه اثناء الدراسه العاديه.....اه الكلام ده عن الكليه ..وبما انى فى كليه تجاره يعنى صباح الفل
فى ثانوى كنت بذاكر بس فى تانيه اكتر ...فى تالته كنت مقضيها على الاخر ..لدرجه ان ليله امتحان الفيزياء ..تخيلوا..اللى هى بعبع الثانويه العامه ..طنشت ورحت اتفرج على ماتشات يورو 2004
..كان ماتش فرنسا وانجلترا ...طبعا تانى يوم ماكنتش عارف اكتب فى ورق الاجابه غير تشكيله منتخب فرنسا والعرضيه اللى بيكهام عملها لفرانك لامبارد وجاب منها جوون....ههههه
دلوقتى برضه مع انى مزنوق فى الوقت جدا وامتحاناتى 17/5 بس برضه انا واخد دكتوراه فى تضييع الوقت بس بجد الساعه مذاكره صح ابرك من 5 ساعات هلس ...يعنى ممكن انجز فى ساعه حاجات كتير ..وممكن اعد ساعتين تلاته ..ماعملش اى حاجه

..mokhtar..

وأيضآ البلاوي لا تنتهي

مشكلتي اني مكنتش بركز علي الكتاب ابدا
كن كل همي ازي اخد العربيه من ورا بابا :)
من اول اولي اعدادي لحد 3 ثانوي علي ما بدأ يسمحلي بيها في حدود ضيقه.
يعني بمعني اصح العربيه هيا اللي بوظتني هههههههههههههه
..................
اللي الكل كان بيستعجب ليه و خصوصا لوالدي اني عمري ما ذاكرت بورقه و قلم !!!!!!!!!!\
حتي الرياضيات بما تشمل تفاضل و تكامل و ميكانيكا و هندسه فراغيه
عمري ما مسكت ورقه و قلم ابدا كنت بذاكر شفوي و جبت 47 من 50 :)
.................
مكنتش بذاكر مع حد غير لما دخلت كليه و كنت انا اللي بشرح لزمايلي لان معظمهم كان فاشل هههههههههههههههههههههههه
بس كنت باجي خر اسبوع بقفل علي نفسي انا و واحد بس و ما ننزلش نهائي و لا نعرف حد اننا بنذاكر مع بعض علشان محدش يجي يذاكر و يعطلنا هههههههههههه.