انا مش بحب افتح مواضيع .... بعناوين من هذا الشكل ( ارجو المساعدة ... الحقونى ... محتاج رأيكم ... ) الى لما بكون واصف فى عنوان الموضوع المشكلة او الحاجة الى بستفسر عليها .

لكن هو الموضوع ملخبط اساسا :d ومعرفتش اكتب عنوان الموضوع غير كدة .


بشمهندس سبعاوى .... انا عندى مشكلة غريبة شوية. العربية بتعوم منى لما اطلع فوق نقر او زلط او فى مطبات الهوا , .. بتروح يمين وشمال .. ادخل فى مطب هوا ( على سرعة ) القى الدركسيون اتحرك شوية للشمال ويثبت على كدة لو محركتوش تانى بأيدى ..... غير انى بحس بالمطبات اوى فى الدركسيون زى مايكون فى تخبيط ؟؟؟

روحت التوكيل قالولى ان المساعدين محتاجين يتغيرو .. بتاع الزوايا الى فى التوكيل قالى هية بتحدف معاك يمين قولتلة ايوا .. قام فاتح العجلة الى ورا( شمال ) لبرة .. قالى علاشان اقللك الحدفة شوية لغاية ماتغير المساعدين ... وبالنسبة للتعويم قالى انا مش عارف سبب للتعويم دة .. علبة الدركسيون سليمة و المقصات والبارات سليمة ...

هية راكب فيها كاوتش كومهو وتقريبا شبه جديد .

مش عارف هل المساعدين ممكن تعمل كدة فى العربية !؟؟؟

وهل موضوع اللعب فى زويا العجل الخلفى دة غلط .


انا شاكك فى علبة الدركسيون .

فى حاجة اخيرة بمناسبة علبة الدركسيون ... لما بكون واقف والموتور مطفى .. بحس زى مايكون فى بوش بسييييط جدا جدا يعنى تقريبا بتاع 3 او 4 ميللى ( لما تيجى تهز الدركسيون يمين وشمال ). هل دة معناه ان فى حاجة فى العلبة .


انا بتأسف لحضرتك يا بشمهندس لو كنت كاتب الموضوع بشكل ملخبط ... او مش قادر اوصلك المشكله الى فى العربية بالشكل المظبوط .

وشكرا على نصيحتك ورأيك مقدما