انا لسه جايب نوبيرا 2 وفيها حبه مشاكل مجنناني
السلام عليكم
انا لسه جايب نوبيرا 2 2001
الحمد لله العربية كويسة
بس فيها شوية حاجات اكتشفتها مع الوقت
_______
اولا بتاكل بنزين جدا
يعني مشيت 240 كيلو .. حطيت 37 لتر بنزين 92 مع التكييف ف كل المشاوير
مشيت 215 كيلو .. حطيت 32 لتر بنزين 92 من غير تكييف
روحت عند الميكانيكي بص ع البوجيهات لقا الشمعة بتاعتها بيضا وزي الفل وقلي كدا الحرق عندك مظبوط .. قلي عاوز تغيرهم غيرهم .. غيرتهم و غيرت فلتر الهواء ونظفت حساس البنزين عشان كدا متوسخ خالص
النتيجة : مشيت 155 كيلو حطيت 20 لتر بنزين 92
مشغل التكييف ف السرعات العالية فقط .. بس مشيت بيها ف مناطق زحمه حبه كدا
المهم كدا الحساسات و الرشاشات مظبوطه ولا .. وايه هي اعراض تلفها ؟؟؟ العربية مش بتغيب ف الدوارة بستنى الكمبيوتر يحمل و ادور تدور علاطول من اول لقطه
__________
تاني مشكلة بقا :
لقيت قربة المايه فيها خرم صغير غيرتها واضطريت اعمل تطويلة لخطروم الفايز بمساورة صغيرة لانى مش لاقي خراطيمها
والنتيجه ان المايه بتقل بردة حوالي تلت لتر ف المشوار
قولت اغير الغطا جبت غطا الماني رفيع ومشيت مشوار الحمد لله المايه منقصتش بس المشوار كان صغير
____________
تالت واهم مشكلة بقا :
الفراااااامل
وانا ع سرعه واطية الفرامل زي الفل وملهاش صوت
اعدي سرعه 100 وادوس فرامل جامد الدركسيون يغربل يمين و شمال
روحت لمليون ميكانيكي كلهم قالولي طنابير امامي
جبت الطنابير الامامي وركبتهم ومشيت لقيت ان العجلة اليمين بترف
روحت للميكانيكي لقيت ان الطنبورة اليمين مش راشقة ف مكانها كويس ولقيت ان بلية السره باظت عملتها وركبت الطنبورة القديمة ف اليمين والجديدة زي ما هيا ف الشمال
ومشيت شوية بعد ما صنفر التيلين (لقاهم جداد) .. مشيت شوية (10) كيلو كانت الفرامل كويسة ع سرعه بس بعد كدا لقيتها بتغربل نفس الغربلة
الحل اما روحتله تاني لقيته بيقولي لازم تخرط الطنبورة الجديدة من جوا و توسعها شوية عشان ترشق ف مكانها ع السره بالظبط ... وانا بصراحة محتار وحاسس انى عمال ارمي فلوسي ف الأرض
__________
رابع مشكلة بقا:-
فى غربلة ف الدركسيون فوق وتحت من الدركسيون نفسه عمال يتهز .. اخد مطب الدركسيون يلعب ف ايدي واسمع صوت خروشة جواه
روحت لعفشجي بصلي ع القطمه قلي سليمة المشكلة عندك ف قلاب الدركسيون الي بيخليه يطلع وينزل
وبصلي وسكت وقلي روح لكهربائي
روحت لكهربائي قلي ممكن احلهالك باني اثبت الدركسيون ع درجة معينه وانا بردة معملتش الموضوع ده لانى مش متطمن
___________
انا بجد يجماعة زهقت من كتر الحاجات الى عملتها ف العربية وصرفت كتير اوي
يا ريت يجماعة تقروا الموضوع كويس وتحاولوا تساعدوني
اللون الاحمر مخصص للادارة
يرجى مراجعة قواعد المنتدى
مشرف 18ب