الموضوع: احتاج نصيحة في شراء هيونداي كوبيه مستعملة

المستعمل مش بينزل كتير عموما والكوبيه ليها زبونها وليها حالتها

مفيش حاجه اسمها مستعمل يفتح بؤه في حاجه اسمها حاله نضيفه او حاله تعبانه

بمعنى انا في النيو اكسنت جابت معايا 4 مساعدين ومقصين في 50 الف كيلو لو كنت بعتها وقتها كان الي هيشتريها هيصرف عليها هوه ده الي اسمه فتح البوء انما اعرف ناس بتحسس على العربيه العفشه بتعمر معاهم كده لو حد اشترى منهم هيمشى بالعربيه زي الفل وواخدها حالتها مش محتاجه صرف هي دي من الاخر قصه المستعمل انت بتشوف العربيه وحالتها وعفشتها عامله ايه ف هتعرف تحدد سعرها كام وهتصرف عليها كام ولا مش هتصرف اساسا انما كلمه يفتح بئه دي كلمه المصطلح الصحيح الي يطلع عليها انها كلمه مش واقعيه

الواقع انك ممكن تلاقي كوبيه ب 60 الف تصرف عليها تبقى رسيت عليك ب 66 او 70 على حسب محتاجه ايه وممكن تجيب وحده تانيه بي 66 مثلا مش محتاجه صرف عفشتها حلوه مفيهاش مشاكل ومش هيتصرف عليها وممكن تلاقي كوبيه مثلا ماشيه 100 الف كيلو بس صاحبها مغيرلها كل السيور والفلاتر والزيوت والكاوتشات ومزبط عفشتها مش هاينها ساعتها انت هتشتري وتمشي وشكرا

بس في بديهيات و ممكن اطول عليك بس انا احب اقولك كل الي اعرفه مثلا لو عربيه هتشتريها عدت ال 60 الف كيلو يبقى اول ماتجيبها تغير لها سير الكاتينه والبلي بتاعه على الاقل لان لو صاحبها مغيروش بعد ال 60 الف كده حالته بتتعب وسير الكاتينه لو قطع سلم على المتور وودعه


على سبيل المثال عربيتي النترا 2005 شاريها ماشيه 90 الف الى الان متحطش فيها مسمار عفشه هي صحيح العفشه خلاص بتودع وانا بغيرها اليومين دول بس انا اشتريتها سنه مصرفتش عليها حاجات تذكر بس انا عشان مسوس كل شويه اغير زيت فتيس فقط واول ما جبتها غيرت كل السيور والفلاتر لسه قدامها مش اقل كمان من 9 شهور عشان اغير سير الكاتينه تاني وهوه ده الوحيد اللي يهمني واحب اني اغيره حتى لو مش بايز مدام مشي كتير يتغير وده امان بالنسبه ليا في غيري ممكن يسيبه لحد ما يصفر ويتعب ف يكشف عليه ويغيره بس زي ما قولتلك لو قطع ودع المتور وانا سعر عربيتي ب67 الف ولو بعتها دلوقتي هتجيبلي برضو نفس السعر عشان السوق عالي انما لو طبيعي بتاعها فوق الستين الف وانا شاريها فبريكه برا وجوه ولسه فبريكه

في مثلا زييها كان بيبتاع وقتها ب 70 الف بس حالتها مثلا بيوتها انضف شويه وفبريكه وفي زيها بنفس سعرها بس رشه برا كلها وفي وقتها وحده كانت بتتباع ب 80 الف جنيه بس كانت ماشيه 10 الف فقط ومرفوعه سنتين تدخل العربيه ريحه الفبريكه فيها والعربيه مفيهاش خربوش دي تستاهل 80 الف لانك لو حسبتها هتمشي بيها 4 سنين مش هتصرف عليها 2 جنيه علىي بعض

بس عموما بالنسبه للكوبيه مش هتلاقي منها اوتو غير ال 2000 سي سي ومشوفتش انا غير وحده بس وتقريبا مش اوريجينال كان مسقط لها منتا برضو ممكن تجيب كوبيه حالتها اي كلام وتسقط لقها ال 2000 بالفتيس بالكبالن وممكن لو العفشه مختلفه تغيرها بس لو عايز تحط الموضوع في دماغك تسال الاول اي حد بتاع استيرات عن موتورها وفتيسها وهي العفشه مختلفه او لا وتعرف بكام ساعتها تحول فكرك انك تجيب عربيه مش لازم تكون حالتها حلوه لانك كده كده هتزبطها

بالنسبه للتوكيل وبالنسبه للميكانيكيه الهيونداي بكل موديلاته مش معضله والتوكيل صنايعيته مش جايين من كوكب زحل عادي ده ممكن صنايعي مش لاقي ياكل اساسا يروح يشتغل ويتقبل هوه تدريب مش عارف كام يوم ويتقبل

الصنايعيه برا في منهم كويس وكتير جدا منهم كويس وشغلهم زي الفل الفكره في قطع غيارك بس مش اكتر لو اصلي مش هتحس ان العربيه حالتها بتتهان او بتقل هوه التوكيل ممكن تحتاجه في الكشف على حاجات معينه بتبقى بالكمبيوتر وسعر الكشف الكمبيوتر ب 50 جنيه وكمان في ميكانيكيه برا معاهم جهاز الكمبيوتر بس انا عموما ممكن كل 20 الف كيلو اروح التوكيل اعمل صيانه عاديه فقط بدون تغير اي حاجه الا زيت المتور والفلتر لان تربيط العفشه عندهم ممتاز جدا انما اي حاجه تانيه بغيرها برا لانهم ماشين بنظام المصنعيه بتوصل فيه من 150 ل 300 جنيه وده كتير ف بعمل الصيانه العاديه فقط ب 150 غير سعر الفلتر والزيت انما غير كده بجيب الفلتر برا واوريجينال ب 25 في ناس بتبيعه ب 15 كمان وهو هو والتجاري برضو ب 15 وفي مضروب وملوش لازمه برضو ب 15 اهم حاجه انك تبقى عارف وفاهم في العربيات

نصيحه اخويه صدقها من غير نقاش واتمنى تنفذها لو انت ملكش في العربيات وابوك تاجر عربيات وبيبيع لك روح هات حد بيفهم يكشف عليها مهما يقولك حلوه جامده فبريكه ممتازه ولا تحط في دماغك ولو عايز انا ممكن انزل معاك وانت بتشتري ونروح نكشف سوا وزي محنا عايزين ده حقنا نروح عند ميكانيكي ونروح مركز صيانه او توكيل نعمل كل اللي عايزينه مهو برضو انت لو شوفت التجار وهما بيشتروا بيطلعوا في العربيه القطط الفطسانه حتى لو مفيهاش حاجه وزي الفل يقولك يابيه ماهي ماشيه اد كده وهعمل فيها واسوي عشان ابيعها وهصرف وياخدها من هنا ويبيع ولا يحط فيها جنيه

هو الكلام كتير شويه بس فعلا مفيد للي يقرا ... شكرا يا مدير

حمادة : انت كلامك مكنش كتير علي فكرة يا ريت كان يبقا اكتر شوية عشان انا قريتو وانا عايز اقرا تاني , انا تاعبك معايا معلش .
بس انا زي مقولتلك انا اول مرة اكون بشتري عربية ومش عايز اني ادفع فلوس واتخيط فيها
انا المعلومة الي استفدت منها من واحد من صحابي اني لما اجي اشتري العربية لازم اجيب ميكانيكي وسمكري عشان يبصو علي المكنة والشاسيه , وانا بشوف فيه عربيات علي النت معروضة للبيع وبكون عايز اتصل اسئل واشوف , بس المشكلة اني اولا مش من القاهرة , انا من الزقازيق بس اني انزل القاهرة مش مشكلة , المشكلة اني اجيب السمكري معايا ولا الميكانيكي , واني اروح بنفسي ابص علي العربية وانا مبفهمش ف العربيات !
ف عشان كدا كان اقرب حاجة اعملها اني اكلم حد من صحابي عندو محل عربيات يشوفلي الموضوع ده وحتي لو جاب ليا وحدة انا هعمل بالنصيحة واجيب سمكري يبص عليها .

بس بما انك خبير "مشالله " ف عايزك تفيدني مرة تانية بس بالترتيب , انا هقولك بشكل مختصر وانت كمل علي كلامي
1- اولا العربية المستعملة مش شرط تماما اني اصرف عليها عشان اسمها ( مستعملة ) لأن ممكن صاحبها محافظ عليها ومدفعش فيها اي مصاريف .
2- لو ف حالة ان العربية نضيفة لازم اغير " سير الكتينة والبلي " عشان الامان علي الموتور .
3-الصيانة الدورية يفضل انها تبقا بعد 20 الف كيلو ف التوكيل
4-مهما اتقال علي حالة العربية انها كويسة لازم اني اجيب سمكري يبص عليها .

افتكر فيه حاجات فاتتني انا معرفتش احطها بالترتيب ,

كنت عايز اعدل الرد بس منفعش
لو فيه اي حاجة فاتتني ياريت تزودهالي , وعلي فكرة الكتابة مش الكتيرة مش متعبة , دي مفيدة جدا ومشاءالله عليك
عموما ان شاءالله يكون فيه بنا اتصال قبل ماجبها ومعلش انا عارف اني هتعبك

بالزبط كده العربيه المستعمله عباره عن حاله على حسب الحاله يتحدد السعر

بالنسبه للسير وزيت الفتيس (خصوصا لو الفتيس اوتو) لازم يتغيره الا في حالات مثلا اشتريتها من معرفه ومتاكد انه غيرهم قريب

انما اي حد هيقولك انا صارف ومنيل ومغير وهو محطش فيها مليم والكلام ده تلاحظه اكتر في التجار بس لما تبيع عربيتك يطلع القطط الفطسانه ودي عايزه وعايزه وعايزه ويشيلها منك يبيعها تاني يوم ولا يحط فيها جنيه

عموما انا ليا رجالتي في الهرم ممكن نكشف عندهم وممكن حل اخر ان العربيه يبقى ظاهريا شكلها كويس ومش متهانه نروح بيها اقرب مركز صيانه معتمد مش هياخدوا 200 جنيه على بعض هيقولك كل حاجه في العربيه بس يبقى تزبيط النهارده يدفع عربون مثلاا او اتفاق ان العربيه بتاعتك تاني يوم الصبح على 8 تروح تكشف تمام تطلع على الشهر العقاري يعملك توكيل مش فاكر ب 10 جنيه وشكرا بقت بتاعتك بس خلي بالك عشان ترخص العربيه باسمك بتعمل عقد في الشهر العقاري ب 1200 جنيه

انوي انت بس وحاول تلاقي وحده حلوه وانا هبعتلك نمرتي على الخاص وهنزبط الدنيا ان شاء الله وقول يارب بس تعتر في وحده حلوه

في موقع اسمه car100100.com في مستعمل وفيه كوبيه والعربيات ببصورها بس طبعا لازم تنزل وتبص مره وتراجع نفسك وبعد كده تشتري او لا