لانسر 98 للبيع فى حلوان او جاردن سيتى

**ashohdy** · 14-05-2011 04:22 AM

اعزائى انا عارف انكم هاتقولوا املا استمارة البيع لكن الحقيقة مش عارف اجيبها منين يمكن لان خبرتى مش كبيرة ، فمن فضلكم لو حد يدلنى جزاه الله كل خير بس يكتبلى الخطوات بالتفصيل الممل ..عربيتى لانسر 98 معايا من سنتين عاملة 282 الف كيلو وانا عامل بيها فى السنتين دول حوالى 50 الف لونها نبيتى مرور حلوان رخصة باسمى تنتهى نهاية هذا الشهر الحقيقة ان ربنا كرمنى ونويت ارقى السيارة للانسر برضه بس تكون 1600 سى سى طبعا العربية راشة خارج عدا السقف لكن فابريقة دواخل..الحمد لله والله اكبر عربية ممتازة مافيهاش مشاكل ميكانيكية ولا كهربائية العفشة ممتازة ، التكييف جيد جدا لانها 1300 طبعا فيها حكات من برة وفيها خبطات فى الرفارف لكن عموما حالة الصاج مش هاابالغ واقول جيد جدا هااكتفى بجيد فقط لغاية المعاينة وتشوفوا بنفسكم باحطلها بنزين 92 وزيت موبيل بتاع الخمس الاف وللحفاظ على الموتور باغيره بعد 2500 الى 3000 كيلو البطارية من سنتين والكاوتش جديد مشيت بيه حوالى 10 الاف كيلو الحقيقة انا شاريها بثمانية واربعين الف واعتقد ان السعر اللى يرضينى فى ضوء السوق وفى ضوء ان اللى هاياخدها هايصرف ودى العادة اعتقد ان السعر العادل يكون فى حدود السبعة واربعين الف جنيه ، وعملتلها كسوة جلد ومشمع ارضية وجبت رادياتير جديد وطقم دبرياج من سنة وكل السيور مغيرها للصيانة بصراحة انا مدلعها بقدر الامكان لانها شايلانى كل يوم من مايو للقصر العينى 70 كيلو يوميا ذهاب واياب ..يمكن المعاينة فى حلوان او مايو او جاردن سيتى (مكان عملى وفى مواعيد العمل ) طبقا للاتفاق .. ومستعد للذهاب الى اى مركز خدمة لميتسوبيشى ونصيحة لوجه الله روح باى عربية هاتشتريها لمركز الخدمة لان دى الحاجة الوحيدة الباقية فى النصب اللى احنا عايشين فيه للكشف عليها لكن مش هااروح بيها لورش ميكانيكية حضرتك هات اللى انت عاوزه لانهم بصراحة يحرقوا الدم وفاكرين نفسهم دكاترة وبيفطسوا فى الحاجة من غير وجه حق .. انا عرضت كل حاجة بما يرضى الله واخر حاجة .. كان فيه مشكلة فى التكييف انا صلحتها النهاردة وهااختبره يوم الاحد وانا رايح الشغل

**mikology** · 14-05-2011 06:15 AM

ربنا يباركلك فى بيعها
اسلوبك محترم و ياريت الكل يبيع عربياته بالشكل ده
ودلا لستماره البيع عشان يبقى الاعلان كامل

1-ماركة السيارة
2-الموديل/السنة
3-عدد الكيلومترات
4- نوع ناقل الحركة ( مانيوال - أوتوماتيك - ستيبترونيك )
5-لون السيارة
6-الكماليات (كاسيت-تكييف-زجاج كهرباء-باور)
7-حالة الصاج او الخوارج (رشة مناطق كذاوكذا او فابريكة او فابريكة ورشة وش نضافة)
8-حالة الدواخل (رشة مناطق كذاوكذا او فابريكة)
9-حالة الصالون (معقول-جيد-جيد جدا - ممتاز- حالة نادرة)
10-الحالة العامة او التقييم العام للسيارة (معقول-جيد-جيد جدا - ممتاز- حالة نادرة)
11-حالة البطارية
12-حالة الكاوتش (جديد او مستعمل كام كم؟)
13-السعر المبد ئي كام (هل قابل للتفاوض او نهائي)
14-اسم صاحب الاعلان ورقم هاتفة
15-تاريخ انتهاء الرخصة؟
16-اول يد او ثاني او ثالث الخ الخ
17-امكانية البيع بتوكيل او اشتراط التسجيل
18-حالة الموتور
19-مكان المعاينة
20- سعة المحرك اللترية و عدد السلندرات

**ashohdy** · 14-05-2011 06:44 AM

شكرا يا استاذ مايكل على تعليقك وعلى مجاملتك وعلى افادتك ليا بصراحة المفروض ان اى حد بيعرض عربية يعرضها بامانة وخصوصا ان بصراحة المنتدى ده كل اللى فيه اشخاص محترمة .. عاوز اللى يشتريها يتصور هاييجى يشوف ايه مش زى بعض الاعلانات و مايقولشى دى فابريقة وشاذة والكلام ده وبعدين نضيع وقتنا ونروح نلاقى خردة..الوقت مهم اوى فى حياتنا والصراحة والامانة للاسف بقت كلمات نادرة فى الوجود..انا مش ملاك بس المعادلة ببساطة عاوز اللى يشتريها مايدعيش عليا وعاوز لما أأجى ارقى ان شاء الله الاقى نفس الاسلوب انا متشكر مرة تانية لذوق حضرتك بس معلش استحملنى شوية انا توقعت ان فيه استمارة وانا هاادخل املاها اقصد بيانات وامامها حقول فارغة املاها انا آسف ممكن توضيح اكثر.. ياترى فيه window لقاعدة بيانات ولا اكتب البيانات بتاعة حضرتك يدوى..وشكرا مرة تانية تصبح على خير

**ashohdy** · 14-05-2011 06:57 AM

-ماركة السيارة ميتسوبيشى لانسر
2-الموديل/السنة 1998
3-عدد الكيلومترات 282 الف
4- نوع ناقل الحركة ( مانيوال - أوتوماتيك - ستيبترونيك ) مانيوال
5-لون السيارة نبيتى
6-الكماليات (كاسيت-تكييف-زجاج كهرباء-باور) كاسيت/تكييف/4 زجاج كهرباء / باور
7-حالة الصاج او الخوارج (رشة مناطق كذاوكذا او فابريكة او فابريكة ورشة وش نضافة) اعتقد انها اترشت للنضافة بصراحة مااعرفشى وانا مش خبير فى الحكاية دى بس لما اشتريتها اختبرتها فى محطة بنزين وقالوا لى اترشت مرة واحدة بس .. بصراحة كمان مااعرفشى عرفوا ازاى!!!!!!
8-حالة الدواخل (رشة مناطق كذاوكذا او فابريكة) فابريكة
9-حالة الصالون (معقول-جيد-جيد جدا - ممتاز- حالة نادرة)
10-الحالة العامة او التقييم العام للسيارة (معقول-جيد-جيد جدا - ممتاز- حالة نادرة) جيد جدا
11-حالة البطارية جيد مش عاوز اقول جيد جدا لان عمرها سنتان
12-حالة الكاوتش (جديد او مستعمل كام كم؟) 4 كاوتش من حوالى 10 الف كيلو او 12 الف
13-السعر المبد ئي كام (هل قابل للتفاوض او نهائي) 47 الف .. وكل حاجة قابلة للتفاوض
14-اسم صاحب الاعلان ورقم هاتفة احمد 0127361173 لو مارديتشى رجاء ترك رسالة وانا اللى هااتصل لان ظروفى مش على طول تسمح بالرد او بالايميل اوفر ashohdy@hotmail.com ويكون عنوان الايميل شراء اللانسر
15-تاريخ انتهاء الرخصة؟ انا عملت فحص السنة اللى فاتت لكن لان مرور حلوان اتحرق فا اى حد بيروح يقول صباح الخير ليهم بيطلبوا فحص من اول وجديد وانتهاء الرخصة 28/5/2011
16-اول يد او ثاني او ثالث الخ الخ اللى اشتريتها منه قاللى انه تانى يد والله اعلم انا عديتها بمزاجى لان العربية حلوة
17-امكانية البيع بتوكيل او اشتراط التسجيل يشترط التسجيل عشان ناوى اشترى على طول ومعلوماتى هاادفع ضريبة ترفيه فا يفضل انى اسجل
18-حالة الموتور انا مش خبير لكن انا شايف بامانة ربنا ان الموتور كويس العربية بتكون دايرة وانت واقف جنبها وماتحسش بيه
19-مكان المعاينة 15 مايو / حلوان / وممكن جاردن سيتى من الاحد للخميس من 8 ص الى 3 عصرا
20- سعة المحرك اللترية و عدد السلندرات 1300 سى سى 4 سلندر

**mikology** · 14-05-2011 07:45 AM

العفو يا باشا - ربنا يبعتلك حد محترم ياخدها منك
صح كده اللى انت عملته و على فكره انا جارك فى مايو من ١٧

**ashohdy** · 14-05-2011 05:11 PM

اهلا بالجيرة المحترمة انا فى 36 ويشرفنى اتعرف عليك

**ahmedamr** · 14-05-2011 05:47 PM

وانا جاركو فى مجاورة 10 عايزين نلم بعض بقى

**ashohdy** · 15-05-2011 01:47 AM

اهلا يااستاذ احمد واهلا بسكان مايو وحلوان .. انا باقول نعمل سوق عربيات عندنا فى مايو كل يوم جمعة امام ساحة مسجد من المساجد بعد صلاة الجمعة ، والاراضى الواسعة كتير بس المشكلة بعد فترة هايسيطر عليه البلطجية ، ويدخل السادة التجار .. للاسف انا ضدهم لان معظمهم ب 100 وش هااحكيلكم موقف حصل النهاردة جه واحد يشوف عربيتى وطلع تاجر ( ماكنتش اعرف فعلا انه تاجر ) وطلعلى فيها القطط الفطسانة وهو بيعاين ولما لقانى مصمم على السعر بتاعى وقلتله مش هاانزل تعريفة وكل اللى انت بتقوله ده مش مفاجأة وانا كاتبه فى الاعلان وثبت الراجل بعد ماكان عاوز يثبتنى اتصل بزبون واحنا واقفين وقاله قصادى حتة عربية فابريقة واحسن من اللى كنت عاوز تشتريها !!!!!!! وراح ضارب فى السعر اكتر من اللى انا عاوزه ب 3 الاف جنيه وراح قالب الاسطواة مع الزبون وكان ناقص يقوله ان العربية دى بيركبها سفير اليابان فى القاهرة !!!!!!! المهم انسحبت منه بهدوء .. طبعا هو متابعنى دلوقتى وباقوله تعبت نفسك انك جيت ل 15 مايو من المعادى

يشرفنى معرفتك يااستاذ / احمد انت والاستاذ/مايكل

**Memo_Lancer** · 20-05-2011 12:17 AM

بالتوفيق يا برنس و فكك من التجار
انا مره عرضت عربيتي علي 53
المهم الراجل جيه
قولتو لو تاجر انا مش هبيع غير لما اسجل قالي لا مش تاجر و كده
المهم فلا العربيه طبعا
و شاف الموتور و قالي ماش شاء الله
50 و الفلوس معايا اهي
قولتو لا ولا 52500
قام كلمني تاني يوم قالي تمام يا باشا انا شاري
قولتو و انا بعت لتاجر زيك
هههههههه