بعد ما رحت و جيت من المنصوره .. أروح محكمة عابدين منين ؟

السلام عليكم ..
الحقيقه مش عارف من غيركم كنت هاعمل ايه و الحمد لله رحت و جيت من المنصوره و الموضوع كان سهل و كله بفضلكوا يا اخواني بعد فضل ربنا طبعا , و المنصوره بلد جميله و تستاهل بصراحه تعب الطريق بتاعها ...
المهم بقي دلوقتي أنا في مدينة نصر و عايز اروح محكمة عابدين ... أنا سمعت انها في شارع شريف ... بس المشكله اني ماعرفش أروح شارع شريف أصلا .. أخدله امتداد رمسيس وللا كوبري أكتوبر وللا أروح منين بالضبط و أوصل للمحكه دي ازاي ... معلش يا جماعه كل شويه بتعبكوا كده بس ماليش غيركم والله ...
حقيقي شكرا علي اهتمامكم و ربنا يخليكوا ليه ....

ايه يا جماعه , معقول محدش يعرف ؟

أنا مش عارف المحكمة فين بالظبط بس لو شارع شريف يبقى تطلع من مدينة نصر على صلاح سالم - نفق الأزهر - هايطلعك فى ميدان الأوبرا - و هناك ممكن تركن فى جراج الأوبرا و تتمشى أو تاخد تاكسى و هناك لو سألت أى محل هايدلوك - بس إسأل محل ماتسألش حد ماشى فى الشارع

حتأخذ النفق فعلا و اول ما تطلع من النفق حاتلف شمال و حاتعدى اشارتين و فى الثالثة حتلاقى المحكمة على ايدك اليمين
و لو ركنت فى جراج الاوبرا حاتتمشى بتاع خمسة دقائق فقط لغاية المحكمة

اقرب مكان ليك انك بعد ما تطلع من نفق الازهر و تدخل شمال بعد الاشاره التانيه هاتلاقى جامع كبير واخد ناصيه ادخل اول يمين بعده و اركن هناك و هيكون بينك وبين المحكمه خطوات قليله

بالنسبة للركن لا تعتمد على الركن بجانب المحكمة بتاتا لانه ليس هناك مكان اذا رايح بالنهار
و حتى الجراجات اللى بجوار المحكمة سواء العامة او الخاصة بتبقى كامل العدد وحتضطر تسيب مفتاحك معاهم و لهذا خليك افضل انك تركن فى جراج الاوبرا و مكانه بميدان الاوبرا بعد النفق مباشرة شمال - فى شمال - فى شمال - يمين
_ يعنى حتلاقى مدخل الجراج فى نفس الشارع اللى انت طالع منه من النفق بس طبعا فى الاتجاه المعاكس .

يا جماعه بجد شكرا ليكم جدا انتوا أصحاب بجد و الواحد فعلا لما بيكون محتاج حاجه بيلاقيكوا معاه , شكرا ليكم جدا و أسف لتعبكم و يا رب أقدر أردلكم أي خدمه من خدماتكم دي و ربنا يحفظكوا يا رب .