بصراحة أنا مجرب الأميركي أللي عند تامركو و هي أكتر من رائعة و هي فعلا بحوالي 360 جنيه بس بصراحة حلال فيها الفلوس
المهم تستحمل المعاملة أللي بتشوفها عنده علشان أنا مش بحب أن حد يعاملني زي ما أكون رايح أشحت منه
أنما البطارية لا غبار عليها أبدا
عرض للطباعة
خلاص انتا هاتخليني اجيب الامريكي بصراحة انا كنت متذبذب
بس رأيك افادني كثيرا
وان شاء الله هاروح اجيبها النهاردة
وربنا يعيني علي المعاملة بتاعة تامركو
بس بصراحة كلمة حق هو (ساعات ساعات )ساعات يبقي كويس وساعات يبقي غريب بس متهيألي هو طبعه كده
وشكرا لسرعة ردك وقولي بقي انتا راكب بايك ايه ؟
مبروك مقدما يا باشا و ربنا يكرمك و يجعلها نهاية عذاب الزق
بص يا سيدي أنا بركب موتوسيكلات من سنة 1986 يعني حوالي 25سنة تصدق دي ؟
ركبت من أول البيبي هوندا ال50 سي سي و بعدها ركبت سي بي أن 400 (كانت 2 سلندر تبريد هواء) و بعدها غيرت كتير جدا جدا
أقوي حاجة كانت معايا كانت ياماها 1100 أف زد أر جينيسيس و دي كانت موديل 1990 علي ما أتذكر
المهم فضلت عندي ياماها تانية تريلا 250 من سنة 1993 و حتي الأن بس روكوبي كان قليل جدا
حتي السنة أللي فاتت أشتريت موتوسيكل صيني 250 سي سي كان الهدف منه أختبار هل من الممكن أني أركب موتوسيكل تاني بعد سن الأربعين؟
و أكتشفت الحقيقة المرة و هي أني لسه بأموت فيه و بأنتظر اللحظة أللي أروح من الشغل علشان بعد ما أروح أطلع الموتوسيكل من الجراج و أخرج بيه
و طبعا العملية سخنت معايا جامد و بأدور حاليا علي شادو 750 بحالة ممتازة
كنت ناوي أجيب vtx 1300 بس لاقيت سعره فوق الخمسين ألف و الميزانية المخصصة للموضوع ده حوالي 32 ألف لذلك قررت أشتري شادو 750 أميركان كلاسيك أيديشن أن شاء ألله و ربنا يسهل يمكن النهارده أشوف واحدة بيضاء في مصر الجديدة يا مسهل و تطلع حالتها كويسة
دعواتكم ربنا يوفقني في شادو نظيف
هو انت كنت فاكر اني مش مصدق كلامك ؟؟؟؟
لا والله انا اقتنعت جدا بكلامك واستفدت كتير ويكفي المعلومة حتي لو مش عيب عندي
انا طول عمري اعرف دينامو بس ايام العربيات لكن بلاطة الشحن والركتفاير اول مرة اسمع عنهم وبقيت اتمنظر علي 2 صحاب معاهم موتوسيكلات شادو لسه جداد في الركوب واقولهم بلاطة الشحن والركتفاير طبعا انا مش فاهم لغاية دلوقت ايه الركتفاير وبيعمل ايه وايه فايدته ومكانه فين بس اهي معلومة هامة
انا متابع مواضيعك جدا ومعجب بسرعة ردك
يا رب توفق وتشتري واحد شادو 750 والسعر ده ممكن يجيب لحضرتك كورونا مش جنزير متهيألي
واكيد طبعا حضرتك عارف معارض كتير ما شاء الله
ولو عايز ؟ انا اعرف كام معرض في مدينة نصر والشيراتون
علشان كنت بجيب لواحد صاحبي وتقريبا لفيت كل معارض مصر الجديدة والشيراتون ومدينة نصر
وطبعا رحت عند احمد فهمي وفي واحد شفت معاه شادو 750 حالته حلوة بحوالي 27000 او 26000 موديل 2000 او 2002 كان بيبيعه من اسبوع لو حضرتك عايز انا ممكن اديلك رقمه وه ساكن عند مديرية امن الجيزة كان عايز يبيع ويجيب vtx 1300وفي النهاية انا سعيد بالتعرف علي حضرتم وماتحرمناش من وجودك في المنتدي لأكتساب خبرات من حضرتك
واديك شايف اهو نزلت جبت البطارية وجربتها من كلامك عليها والحمد لله تمام
بطارية نظيفة وتقيلة اتقل من الصيني و معاها المسامير والصواميل بتوعها والميه بتاعتها والحمد لله زي الفل
خبره خبره يا دياب
أولا ألف مبروك علي البطارية
ثانيا هو تامركو تعامل معاك أزاي؟
ثالثا حأحاول أكون متواجد دائما أن شاء ألله طول ما أنا في مصر بس لو غبت كام يوم حابقي أكيد مسافر لأني بسافر بره كتير لظروف الشغل
رابعا يبقي كتر خيرك لو تديني رقم تليفون الأخ أللي عنده شادو 750 و عايز يبيعها
أنا يسعدني كثيرا التعرف علي حضرتك و علي جميع الأعضاء المحترمين و أخص بالذكر الأستاذ yascro بصراحة متعاون و خدوم و مثال رائع المفروض كلنا نعمل زيه و نساعد بعض
تعرف أنا متابع المنتدي من زمان بس كنت بأخاف أشارك علشان بأخاف حد يزعل مني أو من رائي في بعض المواضيع بس أنا تشجعت من مشاركات yascro قررت أني أشارك و أفيد الأعضاء و أستفاد أنا كمان من خبراتكم و أرائكم و ربنا يديم المعروف دائما