الموضوع: أعتراض طريق المارة

السلام عليكم ورحمة الله وبركاته
انا في موضوع مضايقني جدا وحابب أخد أراء الزملاء في المنتدي لو ليهم تعليق علي هذا الموضوع زيي
حضرتك تبقي ماشي فحالك او وواقف في أشارة وتلاقي واحد مدخل راسه من شباك عربيتك وبيقولك نفعني يا بيه بأي حاجة (واخد بالك انت من اي حاجة) والعجيب انك تلاقيه ماسك كيسين مناديل في ايده
يعني انا عايز افهم انت شحات ولا بياع ؟؟؟؟
واحد تاني تلاقيه سالخ رجله ولا ايده او حد قاطعهملوا وبردو بيعترض طريقك ويفرجك علي منظر مقزز عشان يصعب عليك
او واحد بكرسي بعجل
او واحد رافع أيده ما تفهمش بيتحي ولا بيلقي السلام ولا بيرجوك ولا بيعمل ايه في سنته
او واحدة ماسكة روشتات في كيس بلاستيك او تحاليل (والله فمرة قريت التاريخ علي واحدة فيهم لقيتها من سنيتن واكثر ، قولتلها يا ست كل دة بتلمي حق العلاج دة زمانه مات)
والعجيب والمدهش ان في واحد بيشحت بلطجة عيني عينك بمنتهي قلة الادب بيقف عند الحزب الوطني الي ولع بجوار هيلتون النيل
انا نفسي اعرف هنتهي امتي هذه المأساة الي كرهتني في ركوب عربيتي ولا يا سلام علي الناس الي واقفالك عند كل محل عشان تركنلك عربيتك يا سلام علي المساعدة وشدة احتياجنا ليهم لأننا مش بنعرف نسوق وكنا في انتظار لواحد يوقفلك الشارع او مجرد يكتفي بأنه يقف قدام العربية ويقولك بس كفايه كدة يا بيه (عشان ماتخبطش في الرصيف لأن نظرك ضعيف وانت مش شايفه) ومش بس كدة، لا كمان يقفلك المرايه لأنك عاجز وماتقدرش تقفلها لنفسك او لأنه بيخاف علي عربيتك اكتر منك وبعد لما ترجع وتركب يقفلك باب العربية لأنك واحد من المسؤلين الكبار
والأظرف انك تدوخ علي ركنة وتطلع عينك 6 او 7 مرات بتحج حولين الميدان وبعد لما تلاقي الركنة بنفسك وتركن وتظبط امورك وتقضي مصلحتك وتيجي طالع تلاقيه سبحان الله ظهر زي الجن من تحت الأرض ويطالبك بالجني (الجنيه)
ارجو المشاركة بالأراء وحلول لهذه المشكلة المتفشية في بلدنا ، مشكلة التسول والبطالة والفقر والأستغلال والتعدي علي خصوصية وحرية المواطنين واعتراض طريق المارة والسب والقذف احيانا لو واحدة حلوة راكبة عربيتها.
والله المستعان
،
،