الموضوع: شاركنا برأيك علشان نصحح مفهومنا بناء عن تجربتك العملية

الصراحه الواحد كان واخد صوره مختلفه للاسف لان احنا بلد اشاعات تطلع اشاعه علي شئ انه سئ ما بنفكرش او حتي نجرب انما بنرفض لمجرد الرفض واحنا جربنا وما تخوفناش من التجربه فكانت لنا متعه التعامل مع سياره اقل ما يقال عنها انها ممتازه

الموضوع لو رجعنا لورا شوية هنجد ان دخول العربيات الصينى فى مصر كان صدفة غير مقصودة , لان لما الدولار سعرة زاد بشكل كبير مستوردين سيارات كتير فكروا يروحوا الصين بنفس فكر شراء الفوانيس و غيرها من الحاجات البسيطة اللى سعرها فى الارض علشان يكسب كتير , و فى نفس الوقت كانت صناعة السيارات الصينى لسة فى المهد و بتقول يا هادى , يعنى لا كان فى تكنولوجيا او حتى سوق لها داخل الصين إلا لاصحاب الدخول القليلة و اللى بيحلم يركب عربية و السلام .
المهم أصحابنا المستوردين يهمهم فى الو قت دة عربية رخصية علشان الناس تشترى و يبيع و كان من الملاحظ إن الماركات كانت زى الرز و الدليل إن فى عربيات ظهرت لمرة واحدة فقط فى التاريخ و إختفت لان المصانع ضعيفة و المبيعات أضعف
و دى كانت بداية سيئة للعربيات الصينى فى مصر
فى الوقت انا كنت عايش فى الصين و ناس كتير أصحابى سألونى أخبار العربيات الصينى إية قلتهم بصراحة العربيات الصينى لسة أمامها 5 سنوات على الاقل علشان تقدر تركب عربية محترمة و مضمونة . على العلم أن اول عربية جبتها و يمكن اكون أول مصرى ركب بريليانس جالينا فى الصين الكلام كان سنة 2003 و العربية ماكنتش سئية بس كان فيها شوية مشاكل و اللى إعترف بيها المصنع و كان بيحاول يصلحها فى حدود إمكانياته الفنية فى ذلك الوقت .
و طبعا لان البداية و الانطباع العام كان سيئ و دة كان له تأثير مباشر على سمعة الشركات و العربيات الصينى فيما بعد , و أثر بشكل مباشر على الوكلاء فيما بعد لانة بيحاول يقنع المستهلك بحاجة هو مش مقتنع بيها 100% و الكلام أن سمعته بنفسى من موزعين و بائعى السيارات .
نيجى لتاريخ الصناعة فى البداية انا قلت إن لازم ننتظر 5 سنوات على الاقل , نظرا لوجودى فى الصينى فى الفترة دى و كنت متابع للاخبار بشكل قريب شوفت إن الحكومة الصينية لديها رغبة قوية فى إقامة صناعة سيارات وطنية صينية و عدد من الماركات التى تنال شهرة عالمية و جودة و سعر منافس و ركزت الحكومة على عدد من الشركات التى تساهم الحكومة فيها بشكل مباشر و هى شيرى و شان ان و فاو و جاك و عدد أخر من الشركات , بالاضافة لوجود القطاع الخاص الصينى مثل جيلى و بى واى دى .
المهم الشركات دى بدأت التواصل مع شركات تصميم عالمية فى إيطاليا للحصول على تصميمات جديدة و بعيدة عن التقليد مش كل الشركات طبعا بس على الاقل شيرى و جاك و فاو من اكثر الشركات التى حصلت على تصميمات جديدة و مميزة و فى شركات مشيت فى طريق إعادة تصميم موديلات موجودة او منتهية بعد شراء حق التصميم من الشركات الاصلية و فى بعض الاحيان بيقلد دون الرجوع للشركة الاصلية و فى نماذج معروفة زى كيو كيو و غيرها .
حاجة ثانية و هى الاهم إن الصين وضعة شروط لاى شركة أجنية مصنعة للسيارات فى الصين لابد من وجود شريك صينى بنسبة 50% و دى غالباً بتكون نظير إدارة و بس و طبعا حصة فى الارباح و تسهيلات حكومية
بطريقة دى الشركات الصينية و مع السنين إستطاعت من خلال العمل مع الشركات الاجنبية تدريب عدد كبير من العمالة على مستوى الشغل الاوربى و اليابانى و الامريكى و الكورى سواء على المستوى الادارى أو الفنى , طبعا انا مش بقول إنهم أصبحوا مميزين و افضل و لكن أصبح هناك جيل مدرب على تصينع السيارات .
بعد كدة الشريك الصينى بدأ فى نغمة عايزين نعمل عربية خاصة بينا و عايزين دعم فنى , الشريك الاجنبى علشان يحافظ على السوق العملاق قدم بعض الموديلات القديمة للشريك الصينى علشان يتشغل عليها يطورها على أشكال جديدة مع الحفاظ على مجموعة النقل و الحركة و الشاسية و تقنيات فنية تانية .
شيرى الشريك الاصلى لها كانت فولكس فاجن لكنها إنسحبت بعد بعض المشاكل مع الحكومة المحلية لمدينة أن خوى المالكة لشركة شيرى , شيرى بدأت تشتغل بالفكر الصينى إنها تقلد موديلات ناجحة علشان تقدر تبيع و المصنع يفضل شغال و من خلال الدعم الحكومى يتطور موديلات تانية . و فى الوقت دة كانت شركة دايو بتتهاوى فكانت فرصة ممتازة للصنيين للحصول على مهندسيين و رسومات و معلومات من الشركة بسهولة .
نيجى للداعم الاكبر لصناعة السيارات فى الصين و هى شركة متسوبيشى , الشركة دى فى الصين مبيعات السيارات بتعتها من أضعف المبيعات الاجنبية فى الصين لكن لها مصنعين كبيرين للمواتير و ناقل السرعات سواء عادى او أتوماتيك و طبعا المصنع الصينى عايز ماتور قوى و لة سمعة عالمية . و للعلم فى أوقات كتير جدا كان المصنع فترة التوريد بتصل عندة ل6 شهور يعنى علشان تحجز عربية عايز تستنى 6 شهور علشان الماتور يوصل للمصنع و يجمع العربية
حاجة مهمة أيضا و هى الصناعة المكملة لصناعة السيارات فى الصين أصبحت بحكم إنها بتورد لعدد كبير من الشركات سواء العالمية أو الصينية عندها رصيج خبرة كبيرة و جودة مميزة , ضيف على ذلك دخول كبار مصنعى قطع السيارات العالميين للسوق الصينى مثل بوش و غيرها من مصنعى المواتير و الجير بوكس .
و طبعا كلنا عارفين تجارب السلامة و الامان الفاشلة للشركات الصينية فى أوربا , رغم إنة كان شئ محبط للجميع فى الصين و العالم و اللى إشتروا عربيات صينى . بس دى كانت نقطة بداية هامة فى تاريخ صناعة السيارات فى الصين
لكنهم بداو يستوردوا خطوط لحام الى ربوت لحام علشان يضمن لحام صحيح و مضمون للسيارة بدلا من الحام اليدوى , و كذلك خطوط دهانات و غيرها من الخطوط التجميع و الصناعة .
المواتير نظرا لطول فترة التوريد من مصانع متسوبيشى بدات المصانع الصينية بالتعاون مع كبار مصممى المواتير فى العالم سواء فى المانيا او النمسا او إستراليا فى تصميم و تصنيع مواتير داخل الصين مثل شيرى و جاك و جيلى و بى واى دى
فى بعض الموديلات دى لسة بتنزل مصر بمواتير متسوبيشى حسب طلب المستورد علشان يضمن البيع و و فى منها بينزل بمواتير الاصلية للمصنع زى شيرى و جيلى . و فى مصانع عندها خطوط إنتاج قديمة لشركات عالمية مثل فاو تملك خطوط إنتاج تويوتا و فولكس فاجن بعد عمل تعديلات و تطوير على بعض الاجزاء و إضافة تكنولوجيا جديدة غير معقدة عليها .
فى المجمل انا شايف إن العربيات الصينى خلال أخر سنتين بدات تتحسن و تقدم عربيات مختلفة فى المضمون و الجودة زى بريليانس و شيرى و جيلى و جاك و جريت وول و بى واى دى (تقليد مش عارفة تعمل حاجة مستقلة بس المبيعات نار فى الصين ) و الفاو .
فى مصر أغلب الناس لسة متعرفش غير اليابانى و الكورى و الالمانى , و علشان متعرفش و مجربتش بيقولك إبعد عن الصينى دة كلة مشاكل طب إزاى نيجى نشوف مين الوكلاء على سبيل المثال و ليس الحصر بريليانس الوكيل البافارية الكل بشكر فى العربية لان فى عامل نفسى قوى و هو إن الوكيل البافارية , شيرى ( إسبرانزا) أبو الفتوح وكيل بى أم دبليو لسنوات كتير فى مصر و دايو صاحبة أكبر مبيعات فى السوق المحلى و من أنجحاها , جريت ول عز العرب و غيرهم يعنى هم هم الوكلاء اللى شغالين فى الاوربى و اليابانى و الكورى . و دة دليل على ثقتهم فى العربيات اللى بيتعاملوا فيها لانة مش هيضيع سمعته علشان خاطر عربية كلها مشاكل .
حاجة تانى العربيات الصينى الى بتزل مصر لسة بخيرها يعنى الكماليات لسة بخيرها مش زى العربيات التانية اللى مضحوك علينا فيها للركب يعنى تلاقى عربية ب100000 و لسة الزجاج بذراع مش كهرباء من غير فانوس شبورة خلفى من حاجات و حاجات
نيجى نسأل الناس اللى بتفهم فى العربيات لو عربية صينية ظهر فيها مشكلة تعمم المشكلة على كل العربيات الصينى بلا إستثناء كلة وحش و فلوسك فى الارض , و بتخسر فى إعادة البيع أد كدة ......
لكن المشكلة فى عربية معروفة و صاحبة سوق لا دى مشكلة فردية و حالات معدودة على الاصابع متقلقش بسيطة طب إزاى فين الموضوعية فين الخبرة .
دى شهادة حبيت إنى أقولها عن تجربة فعلية و مرحبا بالتعليق الايجابى و المشاركة الفعالية بدون توجية نقد لاى شخص
و حفظ الله مصرنا الحبيبة من كل شر و أذى

والله حضرتك بتقول كلام ماينفعش أتكلم بعده


و هقول لحضرتك حاجة تأكد كلامك ، أنا من 3 سنين كنت عايز أجيب عربية صغيرة و كانت أمامي سوزوكي التو و سبيرانزا a113 و ساعتها اخترت سوزوكي التو


بس لو إتحطيت في نفس الإختيار الأيام ديه هختار سبيرانزا a113 عشان هي الأيام ديه بقلها حوالي 5 سنين يعني العيوب اللي كانت فيها وقت ما نزلت تلافوها و دة بشهادة ملاكها سواء من أول ما نزلت أو اللي لسة جيبنهة الأيام ديه

أستاذنا الفاضل </B>ahmedchina حضرتك حطيت إيدك علي الجرح زي ما بيقولوا

وبحكم إن حضرتك قضيت فترة في الصين قدرت فعلا تنقل لنا صورة واقعية عن تاريخ الصناعة دي وأد إيه معدل تطورها بسرعة واللي نتمنا إننا بجد نحاول نتعلم من أخطاء الدول دي لأنها فعلا ليها بصمة واضحة في التطوير وهو ده طريق النجاح بعينه

والمشكلة مش في المنتج نفسة تحديدا بقدر ما هي في فكر المشتري لأن المنتج السيء ليس له بقاء وإن بدا جيدا والمشتري بيحاول دايما يحافظ علي توجيه أمواله بشتي الطرق ...

شكرا لحضرتك وفي انتظار المزيد من موضوعاتك

السيد الفاضل sv065 بعد التحية
شكرا على ردك الطيب و فعلاً من فترة و أنا عايز انقل فكر و التجربة الصينية فى صناعة السيارات على اكثر من نموذج شركة و إن شاء الله هحاول اعمل شرح مجمل غير مفصل لتاريخ الصناعة فى الصين و التطور الكبير و المذهل اللى حصل فى الفترة الاخيرة خصوصاً إن الصناعة السيارات الحديثة فى الصين بدأت سنة 1998 تقريباً . بس ربنا يسهل و يكون عندى مساحة الوقت الكافى لهذا العمل و أتمنى أن يوضح للجميع موقف الصناعة الصينى للسيارات بشكل محايد إن شاء الله .

العفو يافندم ذلك من حسن خلقك

وحضرتك شوقتنا جدا للموضوع ده وياريت فعلا نحاول نوصل التجارب دي لمن يمكنه وضعها علي طريق التنفيذ العملي لأننا محتاجين الفكر ده وبشدة خصوصا الفترة الحالية

رد اكثر من ممتاز لاستاذ احمد وموضوع اكثر من رائع
استمرواا

السلام عليكم جميعاً وعلى الأستاذ احمد والأستاذ اودا اودا:تحية طيبة وبعد.
إن تجربتى تبدأ مع السيارة الفارميو33 موديل 92 هذا فى مصر وكانت فى ايطاليا أكثر من سيارة تبدأ سنة 1980 بلسارة اوبل موديل ريكورد موديل 1973 وطبعاً كانت حالتها تعبانة شوية ومكملتش شهرين ثم الفاسود ثم الفا75 المهم معظم هذه السيارات لم اجد مها مشاكل لأنه لو حدث اى مشكلة بتتحل بسرعة اما ميكانيكياً او البيع السريع او حتى اهدائها للتخلص منها ومن ضربتها.ثم شراء السيارة الفا33 والنزول بها إلى مصر وترخيصها منطقة حرة الكلام ده كان سنة 93 وكنت جايبها زيرو المهم نزلت بيها مصر وكانت مكسرة الدنيا وكل ماقابل حد يسألنى دى مركتها ايه وناس توقفنى وتقلى (هو صحيح ان العربية دى بيركبها بتوع المافيا,وووالخ)مع العلم ان الألفا هى سيارة الشرطة الأيطالية المعتمدة.ولكن آه وآه من الفا33 بلفعل سيارة سئة للغاية من كل جانب--اولاً:سيارة خشنه جداً من حيث صوت الموتور وده طبيعى فى الألفا بس مزودها شوية فى الموديل 33 ولكم ان تتخيلوا ان عاصية الفتيس كانت بتتهز على طول طالما السيارة شغالة,وكأنك راكب لودر او نقل وطبعا العربية كلها بتتهز يعنى كده كأنك راكب عربية من بتوع افلام الأبيض والأسود الى لازم وهما مشيين العربية كأنها ماشية فى مدق اوعلى حافة جبل --نيجى بقى للأداء 1-العفشة:نشفة جداً 2-مفيش بور وطبعاً كأنك سايق دبابه لأن العربية حقيقى ثقيلة جداً يعنى فى المناورات العربية مشكلة بلزات والعربية مشية بطىء يعنى فى الملفات والدنيا زحمة او بتركن وهكذا3-العزل فى داخل السيارة لايوجد لأن صوت الموتور مشاء الله دبابة لأنه اثنين كربراتير وتسمع صوت العفشه والعجل وكل شىء يعنى مفيش عزل 4-بتاكل شكمانات بطريقه بشعة ليه ؟لأنها قريبة من الأرض وكمان صوت الشكمان على وكان دائما بيزن يعنى عامل زى صوت شكمان 128 بس بصوت عالى (مهى عربية المفترض رياضية) يعنى لو مركب العائلة حاول تمشى فى اوربا لأن مفيهاش مطبات ولكن فى مثل حالتنا يبقى انت الجانى على نفسك هتغير شكمان على الأقل كل 6 اشهر5-عايز طقم سلك بوجيهات طول كل سلك حوالى نصف متر لأن إحنا اتفقنا ان العربية 2 كربراتير وكل كربراتير عليه عدد 2 بوجيه وكان حضرت السلك كل شويه يهرب كهرباء فتجد العربيه دائماً مشية ثلاثة وانت قاعد بتتهز وكأن الوالده بدلعك وانت لسه فى اللفه (مع الأعتزار)والله بلزات فى الشتاء والصيف لما بتكون الدنيا رطوبه كنت اغير السلك يمكن فى الشهر مرتين آآآآآآآآآآآآآه -- 6-نيجى بقى للبنزين مشاء الله مع ان الموتور كان 1500 ولكن كانت بتحرق بنزين بلهبل مهى اثنين كربراتير والكهرباء دائماً بتهرب,7-الصاج كان ضعيف,يعنى لو حضرتك واقف وركنت بس عليها تجد الصاج راح ورجع معاك,8-كان فيها 2مفتاح كهرباء للزجاج فى الأمام ,المفاتيح نفسها سقطت من مكنها وكنت حشيها من تحت بكانز علشان الشسيه بتاع المفتاح لم يعد يقوى على تحمل المفتاح,يعنى البلاستيك داب اوتأكل,9-مقبض الباب من الداخل كان شبيه بمقبض الجاك وكان بلاستيك ضعيف جداً ولو فكيته ممكن تتكسر الأسنان التى تركب على شاسيه المقبض الى فى الباب وكان مع الوقت بتطلع من كثرة الضغط,10-طارة الدركسيون لونها اجرب حيث كانت سوداء وكمان مكان الكلاكس بقى ينط لوحده لأن السوسته اكلت مكنها ووسعت فتلاقى وكأن ايرباج رايح عليك فجأه,11-الكفر الى بيبقى فوق العدادات الى هو مكمل مع الطبلوه,فى الألفا33 بيبقى مش جى حته وحده مع الطبلوه لالا ولكن بيركب بمسامير,ده مع الوقت بقى يتحرك من مكانه وهو,له سنان اوكلبسات علشان يبات فى الطبلوه مع الوقت,يعنى مثلاً من كثرة تنضيفك للطبلوه والضغط العادى وانت بتنضف بلفوطه وكمان وبتمسح العدادات كل ده بيأثر عليه ويبدأ يتلخلخ او يتلخلع زى متحبو تقولو وطبعاً مع الوقت المنظر بيبقى حاجة تكسف وده ربالى عقده وانا بشترى اى عربية لو لاقتها كده بصرف نظر لذلك تجد ان عدادات الجاك والنوبيرا (1)موجوده داخل طبلوه كله جى حته واحده مفيش فواصل فى الطبلوه,او حاجه راكبه منفصله عنه,وحاجات كتيره بس انا حاسس انى بكتب وبتكلم من سنة 1993 الى هذه اللحظة,عارفين هذه الأشياء ظهرت امتى كل ده وكانت مكملتش ثلاثة سنوات بما فيها اسطوانة الدبرياج,والشىء الكوميدى ان عصاية الفتيس كانت دائماً بتتغلع وانا ماشى واخد غيار ,عرفين ليه علشان فى تيشه من تحت العربية بتقع وتخلع عصاية الفتيس آآآآآآآآآآآآآه,النور كان ضعيف ومزهقنى فى عيشتى ,كانت بتاكل موبينه ولكن كان بيركب عليها موبينة ال128 يعنى كانت محلولة وكان المارش بسخن والعربية تبطل لوحدها ولازم انزل واخبط عليه بلمفك علشان العربية تدور هههههههههه,12-لما تيجى تدور مبدورش على طول لازم تعتل وهى طبيعتها كده!!!!!لأنها اثنين كربراتير,لحد مازهقت وركبت مانفول ولغيت الأثنين كاربراتير وركبت كربراتير واحد على المنفول وكان كربراتير 124 .
لكن احلى حاجة فيها السرعة على الطريق والثبات من حديد بجد هى دى احلى حاجة,يعنى لو جايب 180 تشعر إنك ماشى على 100 بلكتير.ولكنها فاشلة فيما عدا ذلك,والأسم الفارميو--والله انا خسرت فيها الجلد والسقط علشان ابيعها.يبقى كده الصينى ارحم بكتير على سعره ده,لأن الألفا كانت مكلفانى ايامها بلمصرى 40 الف جنيه مصرى.
نيجى بأه للسارة الثانية فى مصر وكانت نوبيرا (1) ودى اشترتها سنة 98 وكانت زيرو المهم اول مجبتها كانو بيقولولى انت اتجننت وجايب عربيه كورى هو فى حد بيركب عربية كورى طيب ابقى اشرب المقلب يحلو,طبعاً انا مش هخبى عليكم ,خفت جداً ماأنا لسه متبهدل مع الألفا الى هى مش الفا خالص,المهم طبعاً لما ركبت التوبيرا كانت بلنسبه للألفا طياره من حيث الأوبشنز يعنى مرايات كهرباء فتيس اوتوماتيك فرش جلد طبلوه حاجة ثانيه خالص,وخلو بالكو من موضوع الطبلوه ده وطبعاً متسمعش صوت للموتور لأنه كان ناعم جداً,وأول متدور العربيه تشتغل فى ثانيه والعربيه كأنها مش شغله لدرجة انى احياناً كنت بنسى ودور المفتاح وطبعاً بعمل فضايح لأن صوت المرش بيسرخ ,والعزل كان ممتاز جداً يعنى متسمعش حاجه والعربيه مقفل الزجاج بتعها وكمان زراير الكهرباء كانت محترمه وفرش الأبواب كان شكله محترم بلنسبه للألفا والعربية واسعه جداً بلنسبه للألفا,وكذلك الشنطه وموتورهاناعم زى الحرير,وفتيس مبيعضش زى بتاع الألفا الله يسمحو ,كان دائماً يعض على الأول والثانى والخامس والله كأنك بتحارب مش بسوق,اما النوبيرا انا بعتها فى شهر 5 -2010 واشتريت الجاك فى 27 -5 -2010 الى هذا التاريخ وهى معى من سنة 1998 كل الى اتغير 1-طلمبة بنزين وكان بعد اربع سنوات2- طلمبة مياه بعد ثلاثة سنوات سير دينمو ثلاثة مرات وسير التقسيمه مرتين +البلى مره واحده وطلمبة الزيت مرة,غيرت كاوتش اربع مرات ايضاً غيرت موبيتنه قبل ماأبيع العربية ب6 اشهر ,وايضاً الريداتير ,والمساعدين كانو خلاص عيزين يتغيرو ولكنى صممت اتركهم زى مهما لأنى من يوم مجبتها محدش فك مسمار فى العفشه الهم تغيير تيل الفرامل وده حصل ثلاثة مرات للتيل الأمانى ومره للخلفى فقط وغيرت قبل مابيع بشهور قواعد الموتور,والأخ الى اشترى العربية من اول مجربها وشاف العربيه على طبيعتها لأنى لم اعمل فيها اة شىء يعنى بحالتها وحتى الخبطات والتجريح لم اتتى مكانه لذلك عندما اخذها وكشف عليها ,هو كان بيقولى هتفرج لأن امامه عربيات اخرى ولكن عندما كشف عليها فى نفس اليوم قلى يلا نروح البيت علشان هجبلك الفلوس ونكتب العقد ,وطبعاً استغربت لأنه قلى فى الأول انه هيتفرج بس,ولكن لأنه هو له خبره لأنه بيبيع ويشترى لذلك مسك فيها ومرضيش يمشى إلا والعربيه معاه.
انا وجعت دمغكم انا عارف ولكنى عايز اقول كل الى عندى بأمانه شديده,المهم ,الذى خرجت بيه,بماإنك مجرب وبقيت بتفهم فى العربيات وعارف انت بتجيب ايه وراكب ايه يبقى هو ده الأهم ,لأن مفيش حد فينا اشترى العربيات الصينى إلا بعد فحص وتمحيص وتدقيق والغوص فى عالم النت,المهم بيبقى القرار قائم على حزمه من الأفكار والتصورات والمعلومات والتدقيقات ثم تحليل كل هذه المعطيات ومقارنتها مع غيرها فى نفس الفئه وعليه قررنا الشراء,يعنى عن نفسى مكنتش بفوت اى معرض سيارات يتعمل فى مصر منذ اول معرض للأهرام وكان على ماأعتقد سنة 2002 حاجه كدا,المهم أنا عن نفسى مقتنع بأذن الله بما أخترته وربنا يباركلنا جميعاً,وكفاية بقى دا انا رغاى قوى والله اول مره اكتب بلشكل ده ,سامحونى,والسلام عليكم ورحمة الله وبركاته.