الموتور حيجيب ايةتانى؟؟!!
السلام عليكم ورحمة الله وبركاتة
كان عندى استفسار صغير كدة لاهل الخبرة
دلوقتى انا عملت للمكنة طقم شنبر ووش سلندر (خراطة وجوان ) بطقم الجوانات والاويلسيلات والسيور والفلاتر طبعا يعنى ظبط النص اللى فوق كلو والكلام دة مابقالوش 6شهور وغيرت شويةحاجات كدة زى دينامو على بوجيهات على قواعد موتور على قاعدة فتيس على جوز مساعدين واتكلفت حوالى3500
المهم من شهر سمعت صوت ترزيع والحمد لله لحقتة من اولة وطلع ان فى سبيكة بييل بترزع نتيجة ان طرمبةالزيت جابت اخرها خلاص المهم عملت السبيكة وغيرت الطرمبة وروحت جايب موبينة بالمرةعشان العربية اما كانت بتسخن كانت بتقطع واتكلفت 800 جنية والحمد لله 450 طرمبة و150 موبينة و80 سبيكة و120 مصنعية وزيت والحمد لله االصوت راح
المهم
مالحقتش اتهنى باللى دفعتو دة كلو ولاقيت صوت غريب طالع من الموتور فجئة بدون اى انذار والمكنة كانت زى الفل ولا تقطيع ولاصوت ولا غياب فى الدوارة صبح ولا ليل ولا ضعف فى السحب ولا اى حاجة فجئة كدة لاقيت صووت غريب عامل زى ونة ترس كدة بس مش شبة صوت ونة الكرونة لا دة عامل اكنك مشغل خلاط فاضى
والعربية بقت اما بتسخن لمبةالزيت بتنور على السلانسية واماادوس بنزين تطفى وبعديها بشوية اما تسخن شوية كمان تبطل لو دوست فرامل وتحلف ماتدور الا اما اسيبها تبرد ربع ساعة على الاقل
المهم روحت للميكانيكى تانى وبعد عناء تجربة فك قطعة قطعة من الموتور لمعرفة سبب الصوت (كان فاكرة الترس الكبير اللى فى وش التقسيمة دة قالى ممكن يكون متاكل وبيعمل الصوت دة المهم الترس طلع زى الفل
فتح غطا التاكيهات والتاكيهات زى الفل
المهم راح حل من تحت وبص على الكرنك وشيك علية حتة حتة لاقاة برضو زىالفل
المهم قالى دة عيب عامود الكامة عايز يتغيرلو سبيكة وممكن يكون اتاكل وعايز يتغير اساسا
المهم انا عندى الكامة مش علوية زى اللى فى الصورةدى
http://www.samarins.com/glossary/sohc_engine1.gif
لا دى موازية للكرانك زى دى كدة
http://www.samarins.com/glossary/ohv_engine.gif
المهم استفسارى عشان ماطولش عليكم اكتر من كدة
الميكانيكى قالى انو حيحاول يفك الكامة ويودي الموتور للخراط من غير ما يفور الموتور كلو عشان لو فورو كلو حدخل فى قصة شنابر وجوانات تانى والعملية مش ناقصة
فهل هينفع ووضع الكامة موازى للكرانك كدة انو يفكها من غير مايحل المكنة كلها ؟؟؟! ولا بيشتغلنى والعيب اللى عندى مالوش علاقة بالكامة اصلا؟
ومعلش الاستفسار التانى
دلوقتى المكنة جابت شنبر ووش سلندر وسبيكة بييل وعمود كامة وكلفتنى بتاع 4000 جنية دة من غير لسة قصة الكامة دى مش عارف حتتكلف كام
ياترى دةعيب سواقة منى ولا حظى نحس ولا الميكانيكى بيشتغلنى ولااية بالظبط ؟؟؟!!
وياترى العربية ممكن تجيب ايةتانى بعد اللى جابتة دة كلو ؟؟؟؟؟ فى حاجة تانى فى المكنة ممكن تبوظ واغيرها ؟؟!
يارتنى كنت سقطت مكنة من قبل ماعمل دة كلو
معلش انا اسف للاطالة بس دةمن غلبى وخنقتى والله ومش عارف ابيعها بعد اللى عملتو فيها دة كلو ولا اخليها تعمل بالفلوس اللى اتصرفت عليها دى ولا اية مش عارف