هجيب جنط بإذن الله ومش متأكد 14 ولا 15

**Bassem Taha** · 17-05-2011 10:38 PM

بسم الله الرحمن الرحيم
انا يا جماعة نويت ان شاء الله اجيب جنوط للعربية بس محتار اجيب 14 ولا 15 هقولكم انا محتار ليه
انا قلت اجيب 14 اهو معظم الناس جايباه ومفيش منه مشكلة بس اللي مش مريحني فيه انه 14 يعني 14 من 13 يا قلبي لا تحزن التغيير مش هيبقى مجدي اوي
بعد كده قلت خلاص اجيب 15 بس اللي مش مريحني ان بعض اصحابي قالولي لازم تركب علايات بعد ما تجيبوا علشان ميحكش معاك في المطبات و ان مثلاً احتمال اخرج الرفرف بره شوية علشان ميحكش فيه .

شوية ملحوظات : انا عارف ان الجنط لازم يكون خفيف علشان ميأثرش علي العفشة .
هل لو جبت الجنط الـ15 ممكن احتاج اجيب مساعدين او اغير حاجة في العفشة بعدين لأن دي هتبقى صعبة شوية كفاية عليا الجنط و الكاوتش .
انا مش هجيب الجنوط الصيني طبعاً .
الجنوط هتيجي بالكاوتش بتاعها الاستيراد او هجبلها كاوتشات نضيفة استيراد بإذن الله من ناس معرفة .
يا ريت لو تفيدوني علشان انا مش لاقي مواضيع كتير في الحكاية دي

**Mido_Vip** · 17-05-2011 11:26 PM

متابع معاك علشان عاوز اجيب جنوط 14 او 15

بس ازاى نعرف اى جنط هيبقى محتاج فلانشات او هيركب عادى بدون مشاكل

**mustafavet** · 17-05-2011 11:57 PM

معلش انا هتطفل علي الموضوع بتاعك وهسال سؤال بسيط
انا عندي في الكاوتش بلاقي فيه بروز بسيط من الجنب كدا كانه بداية فتاء
دا ايه سببه؟ وهل دا يعني ان الكاوتش بيودع؟

**Bassem Taha** · 18-05-2011 01:37 AM

المشاركة الأصلية كتبت بواسطة mustafavet

معلش انا هتطفل علي الموضوع بتاعك وهسال سؤال بسيط
انا عندي في الكاوتش بلاقي فيه بروز بسيط من الجنب كدا كانه بداية فتاء
دا ايه سببه؟ وهل دا يعني ان الكاوتش بيودع؟

انا متهيألي كده ان فعلاً الكاوتش بيودع و حضرتك لازم تغيره في اسرع وقت خصوصاً لو بتسافر انا شفت في موضوع قبل كده الحكاية دي بيبقى سببها ضعف النسيج الداخلي للكاوتش نتيجة خبطة جامدة مثلاً وعموماً حضرتك بردو استنى رأي الخبراء

المشاركة الأصلية كتبت بواسطة mido_vip

متابع معاك علشان عاوز اجيب جنوط 14 او 15
يا مسهل

بس ازاى نعرف اى جنط هيبقى محتاج فلانشات او هيركب عادى بدون مشاكل

الفلانشات دي اللي هيا ايه ؟؟

**Mido_Vip** · 18-05-2011 01:50 AM

الفلانشات بتركب علشان تبعد الجنط لبره علشان ميحكش
شوف الموضوع ده وانت تعرف التفاصيل
http://www.nilemotors.net/Nile/203599-a.html

**MMamdouh** · 18-05-2011 02:59 AM

الفرق بين ال13 و ال14 مش بسيط... الفرق كبير و محسوس خصوصا لو جبت نوعية كاوتش كويسة

الجنط ال15 مش محتاج علايات... كل المطلوب ان الاوفست بتاعة ميبقاش اقل من 35 و تتنى شفة الرفرف الخلفى و شكرا على كدة

و فى كلا الحالتين انت مش محتاج تغير لا مساعدين ولا اى حاجة

انسى موضوع الكاوتش الاستيراد دة خالص لانة كاوتش مستعمل و متخزن و غالبا حيبقى انتاجة قديم جدا

MMamdouh