الموضوع: اسكندريه عججججججججججججججججججججججوز البحر المتوسط !!

يا جماعة كل الاسكندرانية بتعانى من بهدلة الشوارع و عفشة عربياتنا اتدشدشت ... بس اصبروا شوية على الراجل ... أعتقد اسكندرية قبل آخر السنى دى ان شاء الله حتبقى تحفة ...

خد عندك توسيعات جديدة للكورنيش عشان المراحل الأولى للتوسعات السابقة مكانتش كافية لاستيعاب أعداد السيارات المهولة (يعنى الكورنيش من سيدى بشر للمنتزة حيبقى 4 أو 5 حارات رايح و زيهم جاى) ...

و عندك محور محمد نجيب شغالين فيه دلوقت على قدم و ساق بحيث يوصل من الكورنيش لنفق محمد نجيب اللى أعتقد انه حيتفتح قريباً و يحل أزمة أسوأ مزلقانين فى اسكندرية (مزلقان فيكتوريا و مزلقان سيدى بشر) و يخفف الضغط شوية على شارع 45

و عندك كثير من الشوارع اللى كانت حالتها مزرية بيتم حالياً اعادة رصفها ... و عندك بنية شبكات صرف و تليفونات و كهربة تم زيادة سعتها لاستيعاب الضغط المتزايد بضراوة عليها (و دى نقطة مهمة جداً بس محدش بيحس بيها الا بعد ما تحصل الكارثة -- و هو اللى عمله انه بيتجنب حدوث هذه الكارثة)

أنا ليا صديق يعمل فى جهة حكومية ذات صلة وثيقة بالمحافظة بيقسملى ان الراجل دة بتاع شغل و مبيعرفش الهزار بس هو لسة مخدتش وقته لاستكمال التحسينات ... هو صحيح فى سلبيات كتير (يعنى أنا لحد دلوقت مش قادر أستوعب سبب تغيير كل الرصفان و عواميد النور و مش قادر أفهم سبب التكاليف المهولة فيهم) لكن أعتقد ان الراجل دة ناوى يعمل انجازات بحجم انجازات المحجوب باذن الله ... بس محتاج شوية صبر مننا ... لكن هانت خلاص :)

ما انا يا باشا من اسكندرية و ساكن فى جليم

لو تشوف الشارع عندنا ( شارع دياب ) كل شوية كومة طوب بتاخد مكان عربيتين و احنا الشارع عندنا مش ناقص يعنى بنركن بالعافية

و كمان هوة انا شايفة عاوز يرصف الشوارع ! صح ؟

بس فعلا بعد لما تخلص حتبقى تمام بس نصبر شوية

لو فيه حد فاهم المرور الجديد النهارده فى شارع محمد نجيب يشرحه ليه و جمال عبد الناصر نمشى فيه ازاى فهمونى و النبى أحسن اللى صمم ده عبقرى فعلا

اللى نفسى افهمه ليه تم تكسير كل الشوارع مرة واحدة كان هيحصل حاجة لو اتعملت كل حته لوحدها يعنى نبدى فى مكان نخلص و نروح للبعده وهل كان فى سبب انهم كسروا البلد كلها و دولقتى الشارع بتاعنا مثلا بقاله 4 شهور من ساعة ماتكسر و مترصفش و لا الرصيف رجع زى ماكان، اصلها بالعقل هيجبوا معدات منين لكل ده و ادوات و مواد و .... و ازاى اسكندرية هتعدى المصييف و الشوارع بالشكل ده.
اخر اللى سمعته انهم مفروض هيخلصوا فى 15/06 يعنى كمان اسبوع و المياة تكدب الغطاس

شارع محمد نجيب النهارده كسروه تانى هما أصلا مش عارفين بيعملوا ايه