سياده الرئيس ارجعلنا

**misoalex** · 18-05-2011 06:08 AM

معرفتش اقرأها لوحدى من غيركم

من اروع ماكتب احمد فؤاد نجم واخر حاجه كتبها

سيادة المخلوع.....إرجعلنا
سيادة المخلوع ... ارجعلنا
...مش انت واحد مننا ؟؟
و عمرك في يوم ما سرقتنا
......ولا خدت مليم مننا
ما تيجي طب ترجعلنا
تقعد بأهلك وسطنا
أهو مرة تاكل أكلنا
وتلبس يا خويا من لبسنا
وتعيش في حارة او في شارع زينا
قلت ايه ؟؟ يا حارق دمنا
سيادة المخلوع ... ارجعلنا
وغداك يا سيدي عندي أنا
رز و بطاطس مسرطنة
لحمة ؟؟... مفيش من سنة
فاكهة ؟؟... تعيش انت و أنا
و الشاي .. بآخر معلقة م السكر اللي كان عندنا
اشرب و فوق وركز بقه .. علشان نكمل حكينا
سيادة الرئيس ... ارجعلنا
مش سبت الحكم .. لأجلنا ؟؟ـ
ما تيجي تسمع حكمنا !!ـ
أفكرك ؟؟ ولا انت فاكر زينا
قطار اتحرق من كام سنة
وغازنا اللي طار من أرضنا ... لعدونا
وعبارة مللي بيغرقوا ..!! غرقت في عرض البحر و راحوا أهلنا ... و الجاني فلسع مننا
ومركبة بأحلى شباب ... ييجوا من ايطاليا غرقانين .. والقرش ياكل لحمنا
والله كانوا زينا
ويمكن أحسن مننا
لهم بيوت و ولاد و عيشة و حلم .. زي حلمنا
اتغربوا و اتبهدلوا .. لما الفساد طال كل حاجة في أرضنا
واللي ما ماتش .. قاعد في غربته .. والغريب بيذلنا
اقول كمان ؟؟ ولا كفاية ... و اهو انت عارف عننا
أصبر هتسمع حكمنا
سيادة الرئيس ... ارجعلنا
ولو انت واحد مننا
فعلا يهمك أمرنا
بينا عالنائب العام .. تفتنله على ولاد الحرام ... مصوا بلدنا و دمنا
و افتن دي فتنة مش حرام .. ده حقنا
دا لو انت واحد مننا
أصبر هتسمع حكمنا
سيادة الرئيس ... ارجعلنا
اقعد معانا و زينا
هعرفك .....ـ
دي (أم خالد) أمنا
ودول أهل (سالي) أهلنا
و(عمر بن بنونة ) إبننا
فسر و احكي و قللهم .. و قللنا
واستسمح الروح اللي منورة في الجنة عند ربنا
هتقول مكنش قصدنا ؟؟ـ
دول ماتوا غصب عننا ؟؟ـ
كداب و فاجر .. و اللي يصدقك زيك .. والكدب ريحته منتنة
تتشل إيد اللي ضرب ،، و اللي أمر ،، و عليكوا لعنة ربنا
أصبر هتسمع حكما
أيوه بقول ارجع لنا
ياللي سرقت حلمنا
وغربتنا و نهبتنا ... و في كل حتة أهنتنا
إحنا اللي سال دمنا
في الأربعين و اسكندرية و التحرير يشهدلنا
آدي القفص ... أقف هنا
والشعب يحكم .. مش أنا
صدقني ... هي بينة
من فوق سبع سماوات .. قالها ربنا
العين بالعين والسن بالسن ... و هو دا بقه حكمنا ... و مفيش غيره عندنا

**misoalex** · 18-05-2011 06:13 AM

وخدو دى كمان وراها على السريع كده
مش عارف مين كتبها بس حلوه

اسف علي ايه ؟؟؟

اسف على الزحمه
ولا على 80 جنيه لحمة

......ولا على ام ابنها مات فى عبارة
ولا على مهندس شغال بواب عمارة

ولا على قطر وسكة حديد
ولا على كنيسه اتفجرت فى ليلة عيد

ولا على نهبك وظلمك وقهرك
ولا على سرورك وحبيبك وعادلك

ولا على شهدا كانوا بيهتفوا بوطنية
عيش حرية عدالة اجتماعية

**Dr_ElSioufy** · 18-05-2011 06:38 AM

جميله بس تعبتني..

**human** · 18-05-2011 10:23 AM

واحشنى اسمع منك ايها الأخوة المواطنون

**thunder155** · 18-05-2011 10:38 AM

المشاركة الأصلية كتبت بواسطة misoalex

دي (أم خالد) أمنا
ودول أهل (سالي) أهلنا
و(عمر بن بنونة ) إبننا
فسر و احكي و قللهم .. و قللنا
واستسمح الروح اللي منورة في الجنة عند ربنا

جامدة جداً

**Dojuar** · 18-05-2011 10:54 AM

ارجعلنا يا ريس عشان خطري

من بعدك لتر البيبسي بقى بأربعة جنيه ونص بعد ما كان باربعة بس!!!!!

**M7amD_7amDy** · 18-05-2011 05:50 PM

ارجعلنا عشان ندعى عليك كلنا من قلبنا

يا أخى حل عننا .. قرفتنا وعكننتنا وحرقت دم اللى جاب امنا

**otefa** · 19-05-2011 12:15 AM

النيابة العسكرية تحقق مع "عمرو خفاجى" فى خبر العفو عن مبارك

الأربعاء، 18 مايو 2011 - 22:15
عمرو خفاجى رئيس تحرير الشروق
كتب محمد عبد العظيم

قررت النيابة العسكرية استدعاء عمرو خفاجى رئيس تحرير الشروق و2 من الصحفيين بالجريدة، على خلفية خبر نشرته الشروق عن العفو عن الرئيس السابق حسنى مبارك.

وذكرت الإعلامية لبنى عسل مقدمة برنامج "الحياة اليوم" على قناة الحياة، خبراً عاجلاً عن التحقيق مع خفاجى، مضيفة أن المجلس الأعلى للقوات المسلحة قد أصدر بياناً نفى فيه العفو عن مبارك وأسرته.