محدش جدد ترخيص اليومين دول يقولنا اخبار المرور ايه دلوقتى ..؟

**beshomilan** · 20-05-2011 01:46 PM

مش عارف..انا برضه عندى نفس الاستفسار

**nicegypt** · 21-05-2011 01:19 AM

المشاركة الأصلية كتبت بواسطة mmharoun

هما ليسة فى الفحص بيطلبوا المثلث وحقيبة الاسعاف ولا خلاص بخ بعد الثورة

المشاركة الأصلية كتبت بواسطة beshomilan

مش عارف..انا برضه عندى نفس الاستفسار

السلام عليكم جميعا ..
بالنسبة للترخيص .. فالامر اصبح افـزع مما قبل حسب التالى :

اولا : انا رخصت عربيتى 3 سنوات ونقلتها من مرور فيصل " اعوذ بالله منة " واجباري رحت مرور " بين السرايات
وذلك من اجل شهادة المخالفات والبيانات لان الكمبيوترات عطلانة لسة !! سألت هل فية ملفات اتحرقت ؟ قالو لاء
طيب انا بنقل لمرور " حدائق القبة " لية تخلينى اتمشور واروح بين السرايات والملفات مش محروقة ؟؟ قالو الاجهزة
عطلانة ومفيش مهندسين كلة معتصم .. اول مصيبة

ثانيا : المصيبة التانية : لية شهادة بيانات وانا رخصتى سارية وزى الفل ؟ قالو هو كدة دة النظام واجباري علشان الاجهزة
عطلانة . يعنى مجبر تطلع شهادة بيانات وانت رخصتك سارية ! . طيب يعنى اجباري اروح بين السرايات علشان البيانات ومن البيانات تطلب شهادة مخالفات .. منهم لله الظلمة

ثالثا : طلبو رقم النمر القديمة !! يعم الحج العربية بنمر جديدة من ساعة معملو الحروف والارقام
عايز القديم لية ؟ اللى هو ارقام بس .. قالك اجباري .. الله يخربيت الاجباري ... روح هاتو من الارشيف !!
طيب مش المفروض ان الموظفين هى اللى بتبعت للارشيف ؟ يقولي متعطلنيش يا استاذ روح اقف ف ام الطابور !

رابـعـا : ودى اهـم نقطة : مهمة جدا جدا : الـــرشوة عينى عينك .. ايوة الرشوة عينى عينك واجباري وبصوت مسموع
والعبد لله اول مراح اول مرور طلب من الناس وسمعت الموظفين اننا لازم نلتزم بأخلاق الثورة .. ومحدش يفتح علينا
باب الرشوة .. والكلام قدام الموظفين .. رد موظف وقالى وانت مالك يا اخي رأيك احتفظ بية لنفسك .. المهم ف الاخر
دوخو الناس ودفعوا غصب عنهم .. وانا دفعت غصب عنى ما يعادل 300 ج رشوة فقط اجباري

خامسا : تابع للرشوة : طبعا دفعت رشاوي فى 3 مرور .. واكتر واحد اخد رشوة هو مهندس الفحص !!
العربية مفهاش اي حاجة عندى دوكو وسمكرة وموتور كلة جديد زيرو .. لسة شادد العربية
المهندس اول حاجة قالها " بسم الله ما شاء الله عربيتك حلوة " قلت الحمد لله .. الله يكرمك يا بشمهندس
قالى بصوت عالى : " طبعا مفيش لا طفاية ولا شنطة اسعافات ولا مثلث " قلت لة موجودين لحظة .. طلعتهم
قالى الطفاية دى جايبها منين ؟ قلت لة " ايصال الطفاية حضرتك بيقول انى اشتريتها من مرور بين السرايات بـ 125 ج
وطبعا هي موجودة ف بافاريا بـ 80 ج لكن انا اشتريتها من هناك وريحت دماغي "
رد وقالى " ومشترتهاش من عندنا لية ؟؟ ولا يعنى بين السرايات احسن مننا ؟ " عملت عبيط ومردتش "

قلت لة ادور لحضرتك العربية علشان فحص البيئة ركزو ف ردة :
طبعا ف الفحص واقفين 3 صفوف وكلة واقف جمب عربيتة .. فحضرتة عايز يسمع الناس انة بياخد رشوة علانى !
فقالى بصوت عالي : اي عربية بتنزل تحت ايدي بسقطها حتى لو زيرو وجاية من التوكيل على هنا
هتستفتحنا وتشربنا شاي اهلا وسهلا .. مش عايز براحتك لك مطلق الحرية ! " قال كدة بصوت عااااااااااالى "
علشان يخوف الناس اللى واقفة ف الفحص وكلة يعمل حسابة .. طلعت لة 20 ج قالى اية دة يعم انت بتهرج عشرين جنييييييية
بصوووت اعلي علشان كلة يعمل حسابة ف اكتر من كدة ... اللى ف جيبي كلة ميات .. طلعت 100 ج راح ماسك
الورقة وبدون ميبص على حاجة ملي كل الورق .. وقالى اركن عربيتك برة وروح ع الشباك

ماشى يعم تسلم بس معلش مفيش فكة وبتاع قالى فكة اية ؟ قلت لة يعنى من الاخر كلة بياخد رشاوي هنا عيني عينك
وكلة عايز ياكل خلي غيرك يسترزق نيهاهاهاهاها .... بص لي بغضب شديد وقالى عايز كام من الاخر وتمشى " كأنى بشحت"
قلت لة انا مش بشحت هات 70 ج قالى لاء مينفعش .. قلت لة هات خمسين ج يابشمهندس خلينا نروح " قلتها بقلة ذوق وتخيلو استحملنى علشان الرشوة ! "
اخد خمسين ج رشوة وادلي خمسين ج .. المهم رحت ركنت العربية بعيد ورجعت لقيت التالى :
ماسك ف عربية مرسيدس لونها اسود .. وشكلها زي الفل موديل حديث يعنى مثلا سى 180 حاجة كدة
وصاحبها بيحلف لة انة سواق عليها والعربية ف الرخصة مكتوبة بأسم الشركة وان الشركة " رافضة تدفع رشوة "
شركة محترمة والله ... والسواق الغلبان قالة كل اللى معايا 100 ج وهدفعها من جيبي الشركة مش هترضي تصرف
لى المبلغ .. حضرتة رفض وسابة ومشى واكيد الراجل اتصرف

مختصر الكلام : فية رشاوي واكتر من الاول كمان والتلاكيك زادت + فية زحام شديد وصل للاشباكات بين الناس +
اجراءات اكثر من الاول لان فية كمبيوترات مش شغالة وفية اوراق او ملفات اتحرقت وانت وحظك وحسب مرورك .

انضف مرور : مرور حدائق القبة .. زى الفل خلصت ف يوم واحد ودفعت رشوة لعدد 2 موظفين ف الشباك ومهندس
الفحص الفنى .. وخلصت ف نفس اليوم وروحت
اوحش مرور : فيصل " اعوذ بالله من غضب الله 3 ايام معة هو ومرور بين السرايات "

ونتعلم من كدة انك تفكر مليون مرة قبل متشتري عربية .. قلت للموظفة بذات اللفظ " انا لو اعرف ان الاجراءات مملة كدة
كنت ضربت نفسى بالنار ولا جبت عربية " قالت لى ولا تزعل نفسك شيلو الملف دة من هنا نيهاهاهاههاها .. الله يقويكم ادعو الله ان تكون مشاركتى مفيدة لكم .. لانى كنت حيران ومش عارف وسألت كتير ولا حد رد عليا .. وف النهاية خضت التجربة وشفت بعيني وحبيت افيد حضراتكم وربنا معاكم يارب ... ومش شرط يحصل نفس النظام لان كل مرور لة نظامة لكن الاجراءات واحدة والرشاوي واحدة .. وكل ثورة والكل طيب

**No Comment** · 21-05-2011 01:42 AM

المشاركة الأصلية كتبت بواسطة nicegypt

السلام عليكم جميعا ..
بالنسبة للترخيص .. فالامر اصبح افـزع مما قبل حسب التالى
ــــ
ونتعلم من كدة انك تفكر مليون مرة قبل متشتري عربية .. قلت للموظفة بذات اللفظ " انا لو اعرف ان الاجراءات مملة كدة
كنت ضربت نفسى بالنار ولا جبت عربية " قالت لى ولا تزعل نفسك شيلو الملف دة من هنا نيهاهاهاههاها .. الله يقويكم ادعو الله ان تكون مشاركتى مفيدة لكم .. لانى كنت حيران ومش عارف وسألت كتير ولا حد رد عليا .. وف النهاية خضت التجربة وشفت بعيني وحبيت افيد حضراتكم وربنا معاكم يارب ... ومش شرط يحصل نفس النظام لان كل مرور لة نظامة لكن الاجراءات واحدة والرشاوي واحدة ..
وكل ثورة والكل طيب

يا ريتك ما اتكلمت ولا شرحت ... ربنا يطمنك ويعينا على المعركة اللى مقدمين عليها .

**gadsuez** · 21-05-2011 11:57 AM

انا نقلت ملكية فى الشهر العقارى ورخصت 3سنوات بنفس الأرقام القديمة فى يوم واحد واخدت تصريح لمدة 6 شهور لحين اصلاح الحاسب و المخالفات فى مرور السويس لأن المرور عندنا أتحرق فى الثورة و كل الملفات اتحرقت

**No Comment** · 21-05-2011 10:04 PM

بدأت اجراءات التجديد اليوم ... وانشاء الله لما أخلص هعمل تقرير باللى حصل .
اسألكم بس الدعـــــــاء بالتيسير .

**No Comment** · 23-05-2011 04:00 AM

السلام عليكم جميعاً
الحمد لله خلصت ترخيص العريبة اليوم وتفاصيل الترخيص كانت كالاتى

السبت 5/21الساعة التاسعة والربع صباحاً تقريباً ذهبت لمرور المقطم لاحضار شهادة المخالفات ولقيته منقول فعلاً لمرور عين الصيرة كما قال بعض الزملاء هنا فى المنتدى .
وصلت لمرور عين الصيرة على الساعة العاشرة تقريباً ووجدت الاتى هناك .
مرور عين الصيرة مقسم لاربع مرورات هم المقطم والمعادى والبساتين ( ودول اجراءاتهم من مكان واحد كشهادة المخالفات اللى انا عاوزها ) ده طبعاً غير المرور الرابع الخاص بعين الصيرة نفسه ( وده ليه شبابيكه المخصوصة ليه ) .
المهم لقيت طابور طوييييل خاص بالثلاث مرورات ( مش عارف بصراحة جمع كلمة مرور ايه ..! ) والطابور ده خاص بشهادة المخالفات بس .
وقفت فيه بتاع ساعة ونصف لحد ما وصلت واخدوا الرخصة وسجلوا بياناتها (سمعت انهم بيسجلوا البيانات عندهم من جديد) وبعد ما اخد الرخصة منى وشاف التوكيل السابق وعقد الملكية قال ليه انتظر بره عند الشباك للاستلام .
وطلعت بره وانتظرت نصف ساعة كمان لحد ما طلعت الرخصة وشهادة المخالفات اللى دفعت فيها 5 جنيه فقط لا غير .
وعلى فكرة كل اللى كانوا واقفين برضوا دفعوا 5 جنيه فقط غير بتوع مرور عين الصيرة الاصليين كانوا ممكن يدفعوا مخالفات وان كانت برضوا قليلة ولا تذكر قيمة مخالفاتهم ( كانوا بيحقدوا علينا علشان مفيش مخالفات خالص هههههههه ) .

المهم خلصت على الساعة 12 ظهراً تقريباً .

ملحوظة : فى مرور عين الصيرة فى ناس من المرور حذروا من التعامل مع حد بفلوس علشان يخلصلهم حاجة (شفت سيدات بتدى فلوس لناس ورخصهم علشان يخلصوها ، والموضوع اصلاً مكنشى مستدعى لانهم كانوا ممكن يدخوا ويخلصوا بنفسهم بسهولة لقلة السيدات وكمان كبار السن كانوا بيستسنوا من الطابور) .
ملحوظة تانية : النظام كان موجود فى اغلب الوقت هناك .

بعد ما خلصت فى عين الصيرة قولت اروح على مرور السلام اشوف ايه النظام هناك واخد فكرة لبكرة ( لانى كنت واخد اجازة الاحد والاثنين ومش مستعجل )
وصلت مرور السلام تقريباً الساعة 12.30 أو اكتر شوية وسألت عن التجديد ونقل الملكية محتاج فحص ولا لا ، لانى كان الفحص عندى لسة لـ 2013 فى الرخصة وقالوا لازم هتفحص علشان نقل الملكية .
المهم اشتريت ورق فحص عبارة عن 3 نماذج من شباك هناك بـ 15 جنيه عبارة عن ورقة لفحص الطفاية ونموذجين للعربية ، واحد منهم للفحص الفنى الى فيه البصمة بتاعت الماتور والشاسيه والتانى للفحص البيئى .

وقلت اجرب واحاول اخلص حاجة من الفحص النهاردة يمكننننننن .
رحت لشباك فحص الطفاية وفحصتها وكله تمام ( مدفعتش مليم ) .
طقت فى دماغى وقلت اكمل الباقى كمان وروحت اسأل عن اللى بياخد البصمة ولاقيته بياخد فلوس بس على استحياء من بعض الناس .
قالى فين عربيتك قولتله أهى وفتحتله الكبوت واخد البصمات منها وبصلى يمكن اديله حاجة وأنا ولا الهواء ( مدفعتش مليم ).
وبعد كدة استنيت مهندس الفحص وكان بعض المهندسين مطلعيين عين بعض الناس حتى على اقل الاستيكرات على العربية فجالى مهندس وشفت بتاع البصمة بيقوله حاجة عنى ( الراجل ده شكله مريب ومبيدفعشى ههههه) جالى المهندس لف حوالين العربيه وبص على الماتور وكتب كلام فى ورق الفحص ومضى ( مدفعتش مليم ) .
وبعد كدة سألته على الخطوة القادمة وفى نفس الوقت واحد من بتوع التامين كان بيسلم عليه وماشى لان الساعة كانت داخلة على 2 الا ثلث تقريباً ونداه ورجع تانى وعمل ليه التامين (طلع قدراُ من شركة مصر للتأمين اللى الرخصة القديمة كانت عليها برضوا)
ودفعت سنتين تأمين بـ 328 وأخدت الورق منه وسألته على الخطوة القادمة فقال ليا اشترى ملف من بتوع التصوير وكمل اجراءات النقل من الشبابيك جوة .

فاشتريت ملف فيه حبة ورق بـ 3.50 وساعتها قلت كفاية كدة النهاردة لان الساعة بقت 2 الا ربع تقريباُ ووالدى كان راجع من العمرة وطيارته كان ميعادها قرب فمشيت بعد كدة ورحت المطار .

اليوم ده عملت حوالى 80 كيلوا داخل القاهرة فى اللف لحد ما وصلت للبيت اخر اليوم .
وانشاء الله هكمل بكرة تقرير اليوم التانى الأحد 5/22 .

**No Comment** · 23-05-2011 05:31 PM

تقرير اليوم الثانى الاحد 5/22

ذهبت للمرور الساعة التاسعة والنصف صباحاً ووقفت على شباك نقل الملكية وكانوا عبارة عن شباكين العدد امامهم قليل نسبياً (حوالى ثمانية فى طابور وخمسة فى طابور ) اخترت الطابور الاطول لان كانت توجد به سيدة مش باين عليها طبائع موظفى المرور (التكشيرة والرشوة والسحت اللى ماليهم وبيظهر فى ملامحهم ) .

الشباك بتاع النقل ده خلصت فيه باقى اجراءات النقل والتجديد ووقفت امامه مرتين (أخلص حاجة وارجعله تانى )

المرة الاولى أطلعت على التوكيلات السابقة وعقد الملكية المسجل واخدت صورة من البطاقة وادتنى الموظفة بعد كدة ورقة عليها الضريبة اللى المفروض ادفعها وكانت عندى 427 جنيه لضريبة العامين ورحت دفعت فى الخزينة ورجعتلها تانى فطلبت نماذج تجديد تانية من الخزنة وقلتلى جبها وروح لشباك النمر خليه يمضيلك ويمضيك على ورق بالنمر اللى موجودة عندك فى العربية الحالية لانى مش هغير النمر زى ما قالت ليا وهاخد تصريح لثلاثة اشهر (توقعاتى لكدة ان علشان مرور المقطم اتحرق فلو حتى هياخدوا النمر القديمة الجديدة مش هيعملوا حاجة بيها ولا هيعرفوا يبعتوها ).

المهم رحت اشتريت النماذج التجديد بـ 22 جنيه ورحت للشباك بتاع النمر ووقفت فى الطابور اللى كان من أطول الطوابير فى المرور ده ومضيت ورقة خاصة بالنمر القديمة بتاعت المقطم واخد منى الموظف صورة من الرخصة والبطاقة ووقع على الورقة و وخلانى انا كمان اوقع عليها .

المرة الثانية رجعت تانى لشباك النقل واديت الورق اللى كانت عاوزاها من الخزنة مع الورق بتاع شباك النمر وقالتلى انتظر بره تحت المظلة مع لما املالك الورق ده واخلصلك ورقة التصريح .

طلعت انتظرت بره تحت المظلة وكانت الساعة ساعتها 11 وشفت معظم الناس اللى كانوا معايا فى اجراءات التجديد وغيرهم .

وكان بيتم النده كل شوية على الرخص او التصاريح وكان نصيبى فى الندهة الرابعة على الساعة 12 تقريباً على الرغم من ان فيه ناس كانت قبلى وكانوا لسة قاعدين .

وأخدت التصريح وروحت وانا بحمد ربنا على انى خلصت ، وان كنت هاضطر اروح بعد ثلاث اشهر لاخد الرخصة بالنمر الجديدة (ده لو مرور المقطم وفق اوضاعه ) .

ملحوظة عامة : انا مدفعتش ولا مليم رشوة فى جميع اجراءات الترخيص ومتركتش قرش لحد مش من حقه .

مع العلم انى سابقاً كنت بخلص اى حاجة ليه فى اى مرور بالكوسة ، لاكنى والله سعيد بأنى خلصت كل حاجة بدون الاستعانة باى احد الا الله سبحانه وتعالى .

المشاركة الأصلية كتبت بواسطة tarekzein

كفاره يابو حميد

أنا بقى الرخصه تخلص كمان كام يوم وبفكر مجددش دلوقتى خاااااااااااااااااااااااا ااااااااااااااااالص

مش ناقصه حرقة دم والله

نحن السابقون وانتم اللاحقون يا أبو حنين ... وكلنا لهــــا ههههههههه .

-

-

الموضوع: محدش جدد ترخيص اليومين دول يقولنا اخبار المرور ايه دلوقتى ..؟

LinkBack

أدوات الموضوع

عرض

-

-

-

تقرير تجديد الترخيص ونقل الملكية لمرور جديد -

تقرير اليوم التانى فى الترخيص -

المواضيع المتشابهه

حد يعرف ترخيص ال 3 سنين دلوقتى كام

ايه نظام المرور اليومين دول

لكل اللى مركب فاميه.....خلى بالك من المرور اليومين دول

المرور شادد حيله اليومين دول - هو فيه حاجة ؟

الكلمات الدلالية لهذا الموضوع

المفضلات

المفضلات

ضوابط المشاركة