صحيت من نومى مبكرا مش لاقى حاجه اعملها قلت اقعد على الاجتماعى بتاع نايل موتورز اهو ثقافه و مواصله مع الاعضاء لقيت نفسى مفيش جديد
قلت ارد على مواضيع خلصت ردود ولسه النهار طويل ومش لاقى حاجه اعملها
افتكرت هشام الجخ وهو بيقول خبا قصائدك القديمه كلها و اكتب لمصر اليوم شعر مثلها
قلت فى بالى معقوله الى كنا بناقشه على المنتدى قبل 25 يناير ملوش لزمه ولا ممكن نكون ثوره مضاده او متحولين قلت فى بالى لا انا هبحث عن مشاركاتى القديمه و اشوف دفاترى وفى بالى بقول مصيبه سودا ليكون كنت من اتباع مبارك ومش واخد بالى
شغلت البحث
لقيت ايام جميله و ذكريات حلوه و ذكريات مره
وقعدت اقلب فى دفاترى
لقيت موضوع انا كنت عامله بيقول البلد على فين ؟؟؟وموضوع تانى شاركت فيه بيتكلم عن مصر امى ولا هلا بتشتغلنى
قلت فى بالى الحمد لله اننا كنا حاسين بمصر و عايزينها افضل وبجد 25 يناير احسن حاجه شفتها فى مصر من يوم محسيت ان البلد دى مقهوره وده كان يوم العباره ده اليوم الى قررت فيه عدم التعاطف تحت اى بند مع النظام البائد
بجد اول مره فى حياتى اعيط من معاناه الناس و حسيت نفسى انى فى بلد مفيش فيه حقوق لحد اشوف الناس بتموت فى البحر و السمك ياكل فيهم والريس بيحتفل بالبطوله الافريقيه فى الاستاد
اهالى الناس هتموت على عيالهم و الريس مهيس كالعاده
وفى النهايه الاقى الخسيس زكريا عزمى يخرج ممدوح اسماعيل من مصر ويهربه عشان صاحبه وفى بيزنس بينهم
بجد حسيت لاول مره فى حياتى ان البلد دى مش بلدنا وتمنيت اشوف اليوم الى احس ان الحاكم مننا ويخاف على شعبه و يحط شعبه فى عنيه
اسيبكم مع الموضوع و المشاركه بتوعى

شىء خطر ببالى حبيت اشاركم فيه
مصر النهارده غير مصر من 20 سنه طيب مصر كمان عشرين سنه هتبقى عامله ازاى
المستوى الاقتصادى بقا فظيع جدا 6% معاهم ثروه البلد
البلد اصبح فيها عشوائيات اكتر من المناطق العاديه داخل التنظيم
العشوائيات دى هتخرجلنا ايه ؟؟؟؟
مفيش طبقه متوسطه الى كانوا بيقولوا عليها دى حزام الامان بتاعه البلد
مثقفين مصر متهمين بالعماله لصالح الدول الاجنبيه و تنفيذ اجندات غربيه
الشعب مش لاقى ياكل و الناس بتبنى كل يوم كمبوندات
الناس بتنفصل عن بعضها يعنى الناس تعيش فى احياء شعبيه للغايه و مستوى متدنى و ناس تانيه عايشه فى كمبوند يعنى معزوله معقوله ممكن يحصل ده على ارض مصر البلد الى احيائها الشعبيه ملاصقه لاحيائها الغنيه ياترى ايه الى هيحصل فين الامن الاجتماعى ؟؟هل الدوله تقدر تعمل عسكرى لكل مواطن
فى ناس بتقول ثوره جياع من امتى مصر ممكن يكون فيها ثوره اساسا ولما تكون تكون من الجياع
فين قيم الشعب المصرى فين الشهامه فين الرجوله فين القدوه و المثل و الامانه
استبدلت تلك المفاهيم الاخيره بالانتهازيه و المصلحه و الامبالاه و الكذب و الغش و النفاق
تفتكروا الاجيال الجديده الى هتتربى على تلك المفاهم هيكون مصيرها ايه ؟؟
الغزو الغربى لكل ما هو عربى او اسلامى بدايه من لبس الشباب و طريقه الكلام لغايه طريقه الحياه نفسها
يا جماعه تفتكروا احنا جاهزين و هنقدر نتعامل مع الثقافات الجديده الى فى المجتمع الى الماده طغت على كل شىء فيه و اصبح هم الناس الماده فقط و كل واحد يتكلم يقول اصل فى مصلحه او عايز اعمل مصلحه
بقت المصلحه كل شىء
انتا بتجوز بنتك لمين ؟؟
الى يقدر يدفع و يشيل ولا ابن الناس المتربى الى ظروفه على قده وبيبدء السلم واحده واحده !!!!!؟؟
اضرب مثال بسيط (بالمناسبه اشمعنى لفظ ضرب ده مقترن بالمثال هوا احنا طول عمرنا مرتبطين بالعتف )
لو اخدنا فى بالنا زمان الفن الشعبى رغم ما له و ما عليه غير الفن الشعبى بتاع النهارده الى مليان ابتذال و ايمائات جنسيه و اصبح مقذذ و اتفرجوا على سعد الصغير و فرقته حاجه تقرف
انا اخشى على نفسى و عليكم من يوم نلاقى نفسنا منقدرش نخرج فى الشوارع بعد 9 مساء و بعض الاحياء تكون موطن للجريمه و تكون دى نهايه مصر بلد الامن و الامان
الحل ايه ؟؟؟



المشاركه الثانيه
http://www.nilemotors.net/Nile/174470-a-3.html
يا جماعه بجد مش شعار
تفتكروا فيه زيها عايش و مش بينهار
تفتكروا ام جنا عليها الزمن من يومها ولا شافت نهار
فى حد برضه يستحمل زيها و يصبر قدها لايمكن تلاقى لا فى غرب و لا فى شرق ولا وار بلاد الانهار
من رحمها طلع الكويس و الطيب و برضه الغدار
لايمكن انسى فضلها عليا ولو شويه عشان برضه امنا مش هزار
يا مصر يا دره فوق جبين الدهر حره كنتى دايما و هتكونى على طول المنار
المنار ليا ولاخوى و ابن عمى و كل الى حواليا مانتى برضه امنا ولا انتى بقيتى بتستعرى مننا
عندك حق و الله تستعرى مننا اذا كنا ولادك وبنقول عليكى كده و صابره و ضمانا و معيشانا يبقى نقول على الدنيا السلام
نهر نيلك من جبينك وصل لينا يروى فينا ولا شمسك و ابتسامتك ولا صوتك يا جميله عشتى فينا فى كل مصرى يعيش فى حضنك و جوه قلبك
لما انتى صابره علينا كده و عايشه و معيشانا اه اهى عيشه صعبه و ناشفه بس نعمل ايه نفسنا نشوفك قويه و ترجعلنا احسن من زمان
لايمكن تكونى غير امى دنتى مش بس امى انتى كل حاجه بس احنا مش شايفين
ياه يا ترى هعيش و اشوفك راضيه عنا ولا هموت تعبانه و زعلانه و منكسره يا ترى فاهمين

حاجه جت فى دماغى حبيت اقلها و خلاص

وفسرت كلامى
مفهمتوش انا بتكلم فى ايه
انتوا بتعيبوا على مصر و كان مصر دى مش عايشين فيها نلوم زماننا و نعيب فيه و ما عيب فى زماننا الا سوانا يعنى مشكلتنا مش مصر نحمد ربنا اننا لينا ارض عايشين عليها و عارفين نعيش فيها مشكله فى قايم على امور اليلد مش البلد مالها مصر لما تكون نيل و بحور و شعب عندنا مقومات الحياه مش دوله حبيسه ولا دوله منعدمه المصادر لكن القائم على امورها هوا الى وصلها لكده يعنى لو اتغير الحال و جت ناس محترمه و غيرت من شكل البلد هنقول برضه مصر مراه ابويا و ام عفاف و كلام كده
عامه عشان مطولش عليكما انا متفق معاكوا فى الحال السىء للبلد

بجد فى النهايه قلت لنفسى لا يا هشام انا مش هخبى دفاترى وانا بحب البلد دى وحبيتها بهمها و حبتها بفرحها و هحبها لو كانت ايه