الموضوع: لماذا اضراب الاطباء مش مطلب فئوى و لمصلحة المريض اولا و اخيرا

معلومة صغيرة نسبة مشاركة الاطباء فى الاضراب تجاوزت 85%
انتوا عارفين لو كان هدفنا مصلحتنا الشخصية و مش مهم البلد و كنا عايزيين مرتب الطبيب 100 الف جنيه فى الشهر كان اتحقق
اقولكوا ازاى نعمل اضراب زى ده بالظبط بس يشمل كل الاقسام
و ساعتها مصر هتبقى بدون اطباء
وهيجى عصام شرف جرى يعتذر و ينفذ اللى احنا عاوزينه حتى لو طلبنا لبن العصفور كان هيجيبهولنا



بس اطباء مصر مش كده و عمرهم ميلوا دراع البلد
و اضرابنا كان مجرد توصيل رسالة
و اضرابنا فى مرضى كتير و قفوا معانا فيه لانهم فهموا انه لمصلحتهم قبل اى حاجة تانية

+1111111111111111111111111111111

المشاركة الأصلية كتبت بواسطة dr_radioooooo

بسم الله الرحمن الرحيم
السلام عليكم ورحمة الله وبركاته
انا نفسى الناس فى المنتدى تفهم ليه الاطباء عملوا اضراب و ازاى هو فى مصلحة المريض قبل ما يكون فى مصلحة الطبيب
السؤال : هو الاطباء عملوا اضراب ليه؟
الاجابة: عشان ليهم مطالب و عايزنها تتحقق و حاولوا بكل الطرق التفاوض مع عصام شرف لكن التجاهل كان سيد الموقف
سؤال طب ايه هى الطلبات دى ؟
1- اقالة اشرف حاتم وزير الصحة
ليه هو لحق يعمل حاجة - على لسان المعارضين للمطلب ده -
اولا مينفعش نجيب وزير يمسك وزارة و هو عمره فيوم مكان تبعها
الوزير الحالى استاذ فى الجامعة يعنى عمره مشتغل فى الصحة يوم من حياته و هو تابع لوزارة التعليم العالى
,منصب وزير الصحة لازم اللى يشغله يبقى عارف الصحة و دهاليزها و راضع منها لكن لو جبت وزير من وزارة تانية عمره ما هيبقى فاهم القصة زى ابن الصحة ......
الوزير ده بيحتقر الاطباء بتوع وزارة الصحة و بيبوصلهم على ان هما فاشلين
من مطالب الثورة القضاء على الحزب الوطنى الفاسد
البيه من اعضاء لجنة السياسات بالحزب الوطنى المنحل
البيه كان ايام الثورة بيطلع عربيات الاسعاف بتاعة القصر العينى لانه كان مدير مستشفياتها محملة بالبلطجية و تخش العربيات ميدان التحرير و يتفاجأ الثوار ان العربيات مش جية لاسعافهم دى محملة بلطجية الحزب الواطى
البيه لحد انهاردة لسة ماشى على نفس سياسات الجبلى اللى قبله و التى تتجه نحو خصخصة الصحة يعنى العيان الغلبان اللى معهوش فلوس مش هيلاقى علاج
ده غير السرقة و اللذى منه
احنا بالفعل قدمنا 5 بلاغات فيه للنائب العام من 3 ايام و جارى التحقيق فيها
اعتقد انه واحد زى ده مش لازم نكرمه و نعمله وزير صحة مصر
2- توفير الامن بالمستشفيات و دى مش محتاجة شرح
3- رفع ميزانية الصحة الى خمستاشر فى المية من موازنة الدولة
ودى مش هتخش جيب الدكاترة
لأ دى عشان المستشفيات يتوفر فيها علاج محترم و يبقى اى مواطن سواء كان وزير او غفير يقدر يروح يلاقى علاج و خدمة صحية فى المستشفيات الحكومية زى اى مستشفى خاص و بدون ميتبهدل و بدون ميدفع ولا مليم
4- اعادة هيكلة الاجور فى مصر و جعل الطبيب فى المرتبة العليا للاجور
العليا مش تناكة مننا لأ لانى بتخرج بعدكوا ب اربع سنين و بنتعرض فى مهنتنا لاخطار منها العدوة و ما الى ذلك. مهنتنا كلها نبتشياط و ساعات عمل طويلة غير الدراسة بعد التخرج ...... و اتحدى حد يجبلى اى دولة فى العالم الاطباء ليسوا فى قمة سلم الاجور
مينفعش عشان وزارة البترول بتطلع بترول من ارض مصر توزع ارباحها على الموظفين بتوعها
البترول ده بتاع مصر مش بتاع الوزارة المفروض ارباح الوزارة تروح موازنة الدولة مش جيوب الموظفين فى صورة مرتبات و مكافئات و ارباح
و مينفعش مرتب زميلى اللى قدى فى البترول يبقى 30 ضعف مرتبى
و خد على هذا فى كل قطاعات الدولة
يبقى المختصر المفيد المطالب مشروعة و نستمدها من روح الثورة
المطلب الاول ثورى بحت
المطلب التالت لمصلحة المريض
المطلب الرابع للعدالة الاجتماعيةاللى قامت عليها الثورة


معظم الناس هيقولوى مش وقته لما البلد تقف على رجليها
هقولهم الاتى الفساد لازم يتشال و ده مش هيعطل عجلة الانتاج بالعكس ده لما تشيل الفساد الدنيا تمشى احسن و توفير الامن احنا مش عايزين غير قوة صغيرة مسلحة تحمى المستشفى و لو مفيش ادونا سلاح و سيبونا احنا و نصيبنا و اعتقد ده مش هيعطلع العجلة اياه وال15 % احنا مقلناش النهاردة احنا قولنا فى الموازنة الجديدة و خدوا بالكوا احنا قلنا نسبة مش رقم معين الموازنة لو فيها تقشف اكيد هيبقى ال15% متقشفة بردو ..... اخر حاجة الاجور احنا مقلناش بكرة الصبح عايزين هيكل عادل للاجور احنا اضرينا لان الهيكل لازم يتعمل و يتطبق مع الموازنة الجديدة و يحقق عدالة اجتماعية يبقى بقى فين تعطيل عجلة الانتاج



ارجو قرأة الموضوع بتأنى و فى انتظار تعليقاتكم

يا ما قولنا ........... ولسنا احنا ناس وحشين :(

ربنا يكرمكوا و يوفقنا ونقدر نوفر العلاج المناسب و الادمى لكل الناس بدون مقابل
ويا رب نقدر نقضى على مافيا المستشفيات و المراكز الخاصة اللى بيتاجروا فى صحة المصريين

ويارب مننضربش تاني