عايز تحافظ علي موتور البايك أدخل و أعرف أزاي

**tito29** · 19-05-2011 02:21 PM

[overline] [/overline]
[overline]

بسم ألله الرحمن الرحيم
[/overline]

أولا لازم نعرف جميعا أن كل شيئ له عمر أفتراضي و أن حتي الحديد يتأكل من العوامل الجوية فما بالك بمكونات ميكانيكية متحركة و تحتك ببعض
بس برضه لازم نعرف أن ممكن أننا نطيل العمر الأفتراضي ده و نحافظ علي الموتور لأطول فترة ممكنة بدون مشاكل و بمجرد شوية صيانة وقائية بسيطة للغاية و غير مكلفة
طبعا أللي حانقوله هنا ينطبق علي أي موتور حتي و لو سيارة أو مركب أو خلافه

لنبدأ علي بركة ألله:

دلوقتي ربنا كرمك و أشتريت الموتوسيكل أللي بتحلم بيه من فترة و أهو أمامك منور الجراج و حأفترض أنك زي أغلب الناس أشتريته مستعمل سواء أستيراد أو معلق نمر
أيه أول حاجة تتعمل؟؟

أهم حاجة تتعمل هي تغيير الزيت
و طبعا الفلتر لازم يتغير يعني من الأخر تروح تشتري زيت (أنا بأستعمل شيل الغالي قوي أعتقد أنه أسمه تخليقي) و تعدي تشتري فلتر الزيت المناسب للموتوسيكل بتاعك
تفك الطبة و تفضي الزيت و تنظف الطبة لو هي مغناطيس ثم تفك الفلتر
خد بالك أنك توقف البايك علي السنادة الوسطي (لو فيه) أو تفضل سنده بحيث يصفي كل الزيت القديم تماما
أنا بسند البايك بين السيارة و الحيطة و أسيبه طول الليل يصفي براحته
بعد كده تركب الفلتر الجديد بعد ما تدهن الأويل رينج بتاعه زيت نظيف و لا تقرص عليه في الرباط جامد
تعيد تركيب الطبة و تملأ الزيت (أنا موسوس شوية علشان كده بأزود الزيت و من خلال قماش شاش علشان يصفي حتي الزيت الجديد) حسب الكمية الموصي بها من المصنع
أهم حاجة و أكرر أهم حاجة أنك دائما علي الأقل كل يومين تقيس مستوي زيت المحرك و لو ناقص حاجة بسيطة لازم تبحث سبب النقصان
زيت المحرك زي الدم في الأنسان يعني لو خلص ألله يرحم الموتور

الخطوة الثانية هي المياه (طبعا لو تبريد مياه)
تكشف علي مستوي المياه في الرادياتير و في القربة
في أقرب فرصة تغيير المياه كلها بالذات لو الموتوسيكل أستيراد علشان بره بيحطو مانع تجمد و عندنا لازم نحط مبرد
خد بالك المياه يتم تزويدها الصبح قبل تدوير الموتور و هو طبعا بارد تماما
طيب لو المياه نقصت (لأي سبب) و الموتور سخن أيه الحل؟؟
حضرتك تسيبه يبرد شوية و تدور الموتور ثم تضيف المياه و الموتور داير سلانسيه
طبعا ماتنساش تأخد الهواء أللي في دائرة التبريد و دي بتختلف حسب نوع البايك

خد بالك الزيت و المياه هما أخطر حاجة ممكن تسبب الكوارث أي حاجة تانية بالكتير حاتوقف البايك بس لن تسبب أضرار أخري

بعد كده تبقي تراجع علي البوجيهات (كل 3000 كيلو أنا بأغيرها) و تنظف الكربيراتير (أنا مش بحب العملية دي أبدا)
أنا بأفضل أستعمال المنظفات اللي بتضاف مع البنزين عن عملية فك الكربيراتير لأن الفك له مشاكله
لذا حانتبع طريقتي و هي دائما تغيير فلتر البنزين (و لو ماعندكش فلتر لازم تركب)
كل 3000 كيلو تنظيف فلتر الهواء (و الأفضل أستعمال فلتر محترم زي k&n )
دائما مستوي البنزين في التانك فوق النصف
لا تمون من البنزينات المشبوهة و حاول بقدر الأمكان تتعامل مع وطنية علشان دول جيش و ماحدش منهم بيسرق أو بيغش في البنزين

حاول دائما (بقدر الأمكان) ما تضغطش جامد علي الموتور يعني الأربي أم حاول يكون في نصف المسافة بين الأول و الأحمر
الغيارات في وقتها و بلاش تمشي علي غيار عالي بسرعة بطيئة

دائما أضيف زيت لسلك البنزين و سلك الدبرياج علشان المقابض تبقي طرية
بعد كده الفرامل بأكشف عليها كل 3000 كيلو سواء الأمامية أو الخلفية
الكاوتش من الأشياء الهامة جدا و يجب تغييره كل 3 سنين أو 20ألف كيلو أيهم أقرب (طبعا أنا حريص زيادة عن اللزوم و معنديش مصدر علمي للمعلومة دي) بس أحساس الكاوتش الجديد علي الأرض مختلف تماما عن القديم و أنا بحب أستمتع لأقصي درجة بالبايك

راجع الأنوار و البطارية

الحاجة الأخيرة هي تربيط البايك كله كل سنة مرة و بالذات مسامير الرقبة و المساعدين و الموتور

خللي ودنك دائما حساسة لأي تغيير في صوت البايك و ما تسيبش حاجة بايظة

و في الأخر ربنا يستر طريقكم جميعا

**yascro** · 19-05-2011 02:47 PM

تسلم ايدك يا تيتو
الزيت الشل فعلا تخليقى
واسمه الترا وده بيتغير كل 5000 كيلو بالنسبه للبايك (10000 كيلو ف العربيه)
ولازم تملا الفلتر زيت قبل ما تركبه احسن وافضل للبايك وطرمبه الزيت
والفلتر k&n
ده بيتركب مدى الحياه ومبيتغيرش بيتنظف بس
ويتزييت ويركب تانى

**tito29** · 19-05-2011 03:18 PM

المشاركة الأصلية كتبت بواسطة yascro

تسلم ايدك يا تيتو
الزيت الشل فعلا تخليقى
واسمه الترا وده بيتغير كل 5000 كيلو بالنسبه للبايك (10000 كيلو ف العربيه)
ولازم تملا الفلتر زيت قبل ما تركبه احسن وافضل للبايك وطرمبه الزيت
والفلتر k&n
ده بيتركب مدى الحياه ومبيتغيرش بيتنظف بس
ويتزييت ويركب تانى

مشكور يا فندم علي المعلومات القيمة

أنا بأكتفي ب3000 كيلو و أغير الزيت
بس منطقي أنك تملأ الفلتر قبل ما تركبه علشان الكرنك ما يلفش من غير زيت و علشان الطرمبة ما تأخدش هواء

طيب سؤال: هو حد في مصر عنده الفلتر ال k&n ؟ يمكن الوكيل بتاعه؟ ده عندنا في المعادي أسمه رشاد أمبابي علي ما أتذكر

معلش سؤال تاني :
هل جربت قبل كده تثبت مغناطيس في طبة الزيت علشان تشد أي رايش أو برادة من الموتور؟
ولو فكرة منطقية أذاي ممكن يتثبت؟

معلش انا بسأل كتير علشان بحب أفهم و برضه كل الناس توصل ليها الفكرة

**yascro** · 19-05-2011 03:51 PM

المشاركة الأصلية كتبت بواسطة tito29

مشكور يا فندم علي المعلومات القيمة

أنا بأكتفي ب3000 كيلو و أغير الزيت
بس منطقي أنك تملأ الفلتر قبل ما تركبه علشان الكرنك ما يلفش من غير زيت و علشان الطرمبة ما تأخدش هواء

طيب سؤال: هو حد في مصر عنده الفلتر ال k&n ؟ يمكن الوكيل بتاعه؟ ده عندنا في المعادي أسمه رشاد أمبابي علي ما أتذكر

معلش سؤال تاني :
هل جربت قبل كده تثبت مغناطيس في طبة الزيت علشان تشد أي رايش أو برادة من الموتور؟
ولو فكرة منطقية أذاي ممكن يتثبت؟

معلش انا بسأل كتير علشان بحب أفهم و برضه كل الناس توصل ليها الفكرة

عندى ف اسكندريه الوكيل بتاعه
فيه موتوسيكلات بتزل كده الطبه فيها مغناطيس عشان الرايش
ولو مفيهاش
ممكن تثبت المغناطيس ب(ديفيكون) المادتين اللى بيتحطوا على بعض
عشان مينفعش يتلحم

**tito29** · 19-05-2011 04:03 PM

المشاركة الأصلية كتبت بواسطة yascro

عندى ف اسكندريه الوكيل بتاعه
فيه موتوسيكلات بتزل كده الطبه فيها مغناطيس عشان الرايش
ولو مفيهاش
ممكن تثبت المغناطيس ب(ديفيكون) المادتين اللى بيتحطوا على بعض
عشان مينفعش يتلحم

حأجرب موضوع تثبيت المغناطيس و أبلغ حضرتك بالمستجدات

ألف شكر لحضرتك

**yascro** · 19-05-2011 04:18 PM

المشاركة الأصلية كتبت بواسطة tito29

حأجرب موضوع تثبيت المغناطيس و أبلغ حضرتك بالمستجدات

ألف شكر لحضرتك

قبل ما تثبته
نظف الطبه كويس من اى اثر للزيت
(ممكن تغسلها ببنزين)
وبعد التثبيت بالمادتين سيبها تنشف براحتها وتاكد من ثباتها قبل ما تركبها ف الكرتيره

وقبل اى حاجه حجم المغناطيس يكون مناسب لحجم الطبه

**tito29** · 19-05-2011 04:50 PM

المشاركة الأصلية كتبت بواسطة yascro

قبل ما تثبته
نظف الطبه كويس من اى اثر للزيت
(ممكن تغسلها ببنزين)
وبعد التثبيت بالمادتين سيبها تنشف براحتها وتاكد من ثباتها قبل ما تركبها ف الكرتيره

وقبل اى حاجه حجم المغناطيس يكون مناسب لحجم الطبه

مفهوم يا فندم
المشكلة الحقيقية هي منين حاشتري المغناطيس؟

ده أنا فكرت أشتري طبة جاهزة بتاعة أي سيارة (راكب فيها المغناطيس طبعا) و أوديها للخراط يظبتها علي القديمة أقصد يعني يعدل الجديدة من حيث الطول و التخانة و نوع القلاووظ بحيث تبقي مطابقة للقديمة

**karembob** · 19-05-2011 06:46 PM

المشاركة الأصلية كتبت بواسطة yascro

عندى ف اسكندريه الوكيل بتاعه
فيه موتوسيكلات بتزل كده الطبه فيها مغناطيس عشان الرايش
ولو مفيهاش
ممكن تثبت المغناطيس ب(ديفيكون) المادتين اللى بيتحطوا على بعض
عشان مينفعش يتلحم

السلام عليكم اخي الكريم دياب
الكلام تمام بس في تصحيح صغير
دلوقتي ما ينفعش تستعمل المدتين في تثبيت الماغنطيس في الطبه للللللللللللللليه عشان المدتين دول بتوح الاحام بتتأثر من السخونه وبتفك اثناء تشغيل المحرك وبتالي حتت المغنطيس دي هتخش في التروس وتحصل مصيبة الموتور دي بتلحم بيها الاجزاء البيعيدة عن السخونة في مناطق باردة
وعن تجربه

**yascro** · 19-05-2011 06:53 PM

المشاركة الأصلية كتبت بواسطة karembob

السلام عليكم اخي الكريم دياب
الكلام تمام بس في تصحيح صغير
دلوقتي ما ينفعش تستعمل المدتين في تثبيت الماغنطيس في الطبه للللللللللللللليه عشان المدتين دول بتوح الاحام بتتأثر من السخونه وبتفك اثناء تشغيل المحرك وبتالي حتت المغنطيس دي هتخش في التروس وتحصل مصيبة الموتور دي بتلحم بيها الاجزاء البيعيدة عن السخونة في مناطق باردة
وعن تجربه

شكرا للتصحيح بس انا مجرب قبل كده ولحمت كارتيره بايك بيها وكمان لو المغناطيس فلت هيفضل ماسك ف الطبه عشان الخواص بتاعته

**karembob** · 19-05-2011 06:54 PM

المشاركة الأصلية كتبت بواسطة tito29

مشكور يا فندم علي المعلومات القيمة

أنا بأكتفي ب3000 كيلو و أغير الزيت
بس منطقي أنك تملأ الفلتر قبل ما تركبه علشان الكرنك ما يلفش من غير زيت و علشان الطرمبة ما تأخدش هواء

طيب سؤال: هو حد في مصر عنده الفلتر ال k&n ؟ يمكن الوكيل بتاعه؟ ده عندنا في المعادي أسمه رشاد أمبابي علي ما أتذكر

معلش سؤال تاني :
هل جربت قبل كده تثبت مغناطيس في طبة الزيت علشان تشد أي رايش أو برادة من الموتور؟
ولو فكرة منطقية أذاي ممكن يتثبت؟

معلش انا بسأل كتير علشان بحب أفهم و برضه كل الناس توصل ليها الفكرة

طيب انا ليه كام سوال الموتوسكل الاستيد بياخد كام كيلو زيت وسعر الشيل بكام