الموضوع: ماهو التويتر وكيف نتعامل معه!! شرح مبسط !!

بسم الله الرحمن الرحيم

السلام عليكم ورحمة الله وبركاته !!

نزولا عند طلب بعض الإخوة في المنتدى انا قمت بعمل شرح بسيط ومبسط لفكرة موقع تويتر احدى مواقع التواصل الإجتماعي على الشبكة العنكبوتية !!
بصراحة بقى انا اسوء واحد في الدنيا ممكن يشرح عمر ما فيه حد بيفهم مني حاجة ولكن انا عندي امل كبير جدا فيكوا يا جماعة فالله يكرمكم اللي عنده اي سؤال انا موجود وان شاء الله كفيل بيه والشرح انا خليتوا مبسط جدا وللحاجات الأساسية جدا عشان اكون ضامن وصول المعلومة

هوة معلش انا صحيح عندي الفوتوشوب ولكن يخربيت الكسل بعيد عنكم :D :D :D :D
وانا كمان من النوع اللي لا تؤجل عمل الغد لكمان 3 4 ايام وياريتوا بيتعمل كمان !!
فقولت مدام انا واعد الرجالة لازم يتعمل النهاردة مهما كان الثمن فياريت اللي عنده استعداد يراسلني بالصور الجديدة وانا اعدل دي

ها ندخل على الصفحة الرسمية لموقع تويتر ونستخدم خاصية التسجيل السريع ..

وها ندخل على الأساسيات لأنه ان شاء الله مفيش حد ها تواجهو مشاكل في موضوع التسجيل ولكن دوما حاول تخلي اسمك اقصر ما يمكن وها نفهم ليه قدام + خاول على قد ما تقدر تخليه سهل ومبسط جدا ..

دي بقى الصفحة الرئيسية اللي ها تبقى الفلم بتاعك طول ما انتا بتتعامل مع تويتر !!
الحاجات اللي انا معلم عليها بمستطيل احمر دي اهم الأشياء اللي ها يكون ليك احتكاك مباشر معاها ..
مستطيل رقم 1
دي بقى نافذتك للتعبير عن رأيك مع العالم .. بتكتب رسالتك في المستطيل ده بما لا يزيد عن الـ 140 حرف ..
2
التايم لاين ده اللي بيظهر فيه رسائل المستخدمين الآخرين اللي انتا تابع ليهم وها نفهم دلوقتي يعني ايه تابع ليهم ..
مستطيل رقم 3
ده اللي لما بتدوس عليه بيوديك على المنشنز الخاصة بيك يعني ايه !!
يعني حضرتك كتبت رسالة
وانا ليا وجهة نظر اخرى
وعايز ارد على رسالتك ..
ها نفهم ازاي دلوقتي ولكن الفكرة اني المكان اللي ها تظهرلك فيه الردود على آراءك ها يكون بالضغط على المستطيل رقم 3
4
الـ فولوينج ده انتا بتابع تويتت كام شخص على التويتر او بمعنى اصح انتا تابع لكم شخص يعني مثلا انتا عايز تتابع اخابر باراك اوباما واوبرا وينفري و بيل جيتس وسيد خطاب ( واخدين بالكم انا حاطط نفسي في مقارنة مع مين طبعا )
دول بقى عددهم ..
5
ده بقى العكس منه ..
فيه كام شخص بيتابع اخبار حضرتك ..

انا تعمدت اني اجيب شخصية عامة مثلا زي بيل جيتس !!
طبعا اللهم صلي على النبي باين عنده كام فولوار ....
المهم لو انا مثلا لقيت شخصية عايز اتابع اخبارها ..
مجرد باجي عند الصفحة بتاعتوا وبدوس على فولو ..
بكل بساطة جدا وهيا العلامة رقم 2
اما العلامة رقم 1 ودي بقى اللي عاجباني جدا ..
في فيس بوك فيه ناس كتير جدا متقمصين للشخصيات وياما سمعنا عن ناس ليها صفحات رسمية تطلع بطيخية وهكذا هنا بقى في تويتر لما بيبقى فيها شخصية عامة فنان ممثل مغني لعيب كورة رئيس غفير لو معملواو فيريفاي ( العلامة رقم 1 ) تعرف انه شخصية حقيقة وانه ده الأكونتالرسمي بتاعوا يعني مفيش تحوير فيها هوة ده بيل جيتس .

يفضلنا حاجتين مهمين بقى في كتابة الرسائل ..
فلنفترض اني مثلا عايز اكتب حاجة تكون موجهة لسيد مثلا ..
لو عايزها تظهر لسيد في المينشنز وينتبه ليها ويشوفها .. مجرد بكتب قبل اسم العضو ده @
بس علامة "@" ها تلاقي التويتر اظهرلك لستة بالأسماء اللي حضرتك بتابعها عشان تختار منها نفس حوار الفيس بوك على فكرة ..
فاضل فكرة الهاشتاج
فكرة الهاش تاج دي بقى ايه ...
نفس فكرة السيرش ولكن بتحويرة صغيرة .. ازاي يعني ..
انا عايز اكتب رسالة دلوقتي تظهر لكل سكان القاهرة فقط مثلا . اكيد انا مش عاملهم حصر ولكن مجرد مثلا ها اكتب
(#cairo >>>>>>)
بغض النظر حضرتك ها تكتب ايه اي حد عايز يعرف اي حاجة عن القاهرة مجرد ها يطلع فوق في بار السيرش ويكتب شباك cairo ها يظهرلوا اللي حضرتك كاتبه ده .. وهكذا بقى
فيه هاشتاجات عن كل حاجة في العالم !!
انتا ممكن بتويتاية تنشئ هاش تاج جديد في ثانية !!
يعني انا مثلا عايز اعمل دلوقتي حالا هاش تاج طلعت في دماغي عايز اقول انه مدينة نصر هادءة
#nasrcity .......... وها اكتب انا عايز اقول ايه ..
دي بقى الزتونة الهاش تاج عامل زي اللينك مينفعش يكون في اسبيسيس يعني تكون الكلمة متصلة !! عادي جدا ..
زي مثلا انا عايز ادور على ارآء الناس عن فلم Fast5 مجرد شباك واسم الفيلم واقرء الناس ايه رايها في الفلم في عربية في برفان في اي حاجة في اي حتة عادي جدا ..
يتبقى معانا حاجة واحدة اخيرة !!
الا وهي الرد على التويتات ..
مجرد وانتا في التايم لاين !! ها تشوف الصورة ها تفهم اكتر انا اقصد ايه ..

ها نشوف في الصورة دي الزتونة بتاعت لب الموضوع ..
الشريط اللي انا معلم عليه ده ها تلاقي فيه الحاجات دي
Favorite معناها انه التويتة دي انا عايز احفظها عنديواخليها زي ما تقول كده في المفضلات بتاعتي ..
ريتويت ( الكسل حتى اني اقلب الكيبورد من عربي لأنجليزي) ريتويت معناها اني شفت تويتة عجبتني وعايز اعيد نشرها عبري زي مثلا خبر معلومة اشاعة مهما يكن زي مثلا الأستاذ شريف قال يا جماعة تفادوا صلاح سالم دلوقتي حالا وانا عايز اعيد نشرها مجرد ريتويت ها يعيد نشر الموضوع وهكذا ..
واخيرا اليبلاي وهية دي اللي عايزينها زي ما احنا شايفين الحج ذا روك بيقول حاجة بغض النظر عن هيا ايه انا عايز ارد عليه مثلا مجلاد ريبلاي ها تفتحلي رسالة جديدة ارد بيها على اللي هوة قاله :D :D :D

آدي التويتر يا جماعة شوفته سهل ازاي يا رب اكون وفقت في شرحي له ..
ولعى فكرة محدش يستنصح ويقولي انا عايز اعمل فولو لنفسي عشان اخوكم كان انصح وجربها ههههههه
فاضل حاجة اخيرة عشان مأنساش !!
فلنفترض انه فيه صورة عاجباني وعايز احطها بس اللينك طويل !! ممكن يبقى لحد 50 حرف !! وهية الرسالة كلها بتبقى 140 حرف يعني اتاكل منك بتاع 50 حرف في الهوا كده !!!!
او فيديو او او او
مجرد بس تدخل اللينك في الموقع ده ها يعملوا اختصار محفوظ على اساس انك تدوس عليه ينقلك على الموقع مبشارة بتصفير للينك
bitly | Basic | a simple URL shortener
ده الموقع والتعامل معاه سهل جدا ..
فلنفترض اني عايز اختصر لينك نايل موتورز عادي جدا
ها اخد اللينك الأساسي واحطه ها يطلعلي كده
http://bit.ly/iFLHR5
لو جربت ودوست عليه ها يجيبك على نايل موتورز برضوا سبحان الله :D :D
بس وادي تويتر وانا جاهز لأي اسئلة فيه حاجة مش واضحة او حاجة مش مفهومة انا تحت امر حضراتكم بالكامل ..

قريت تويتاية وعجبتك ..

لعلمكم دائما انا شاددني تويتر اكثر منالفيس لأسباب كثرة !!
سرعة نقل الخبر ( غالبا بيبقى سياسي بينتشر بسرعة البرق )
التعايش مع ناس اونلاين حالا وقراءة اراء سياسية مختصرة !!
البعد عن جو الفيسبوك اللي اتقلب جروبات منال بتحب تيمور وعادل بيحب البواب و الجو ده ودوس هنا وشوف بن لادن الله يرحمه وهوة مش عارف بيعمل ايه يعني بمعنى اسرع الفاعلية في الإستخدام والسرعة وهكذا بقى :D

جزاك الله خيرا