واضح فعلا يا هيما انه محترم وعنده علامة صلاة ماشاء الله بس عيبه بيجيلو مكالمات كتير عالموبايل لما خنقنى
عينيا لو شوفته تانى وجت فرصة هسأله بس يارب افتكر الكلام كله
اتاخرت عليكم يا جماعة على ما اكتب نهاية اليوم العصيب فى ابو رواش معلش اصلى استلمت العربية 4:15 م (6 ساعات ونص فى الورش) وكنت فهيصت ومشوارى لسه طويل مصدقت اخلع من هناك.
تقييمى للمركز:
1.استقبال العميل والاستماع لمشكلاته جيد جدا والمهندس كان محترم
2. حل المشكلات وتسليم العربية للعميل طينة هههههههه ميستاهلش القعدة هناك طول اليوم والتعسيفة دى كلها لان لما قالولى هتستلم العربية اخر النهار قولت بس يبقى هيفكوها حتة حتة ويروقوها ولكن يعنى محستش انهم عملوا حاجة تستحق الوقت ده او حتى نصه ولكن نشوف النتيجة ايه:
1. الصيانة المعتادة من تغيير زيت وفلتر وتربيط عفشة تمام التمام العربية نعمت وفاقت بشكل ملحوظ
2. مشكلة التكتكة من ناحية العجلة اليمين امامى مع المطبات احيانا والفرامل المفاجأة احيانا والملفات احيانا خصوصا فى المارشيدير وكسر العجل ناحية اليمين قالوا انها بلية بطاحة يمين وحجزوها وهيكلمونى تانى لما تيجى اروح اركبها على الضمان ولكن انا غير مقتنع تماما وغير راضى عن التشخيص ده حاسس انها مش بطاحة خالص لكن من ساعة ما استلمت العربية لحد ماجيت والحمد لله محستش صوت التكتكة ده لحد دلوقتى ربما اكون مختش بالى عشان كنت مركز مع الطريق مش العربية وربما تكون اتظبطت من جراء تربيط العفشة وكده .. الله اعلم
3. صوت تصفير من العجل مع السرعات الصغيرة قالوا بعد الكشف ملقوش اى مشاكل (هو انت بتستعبط؟) ولكن اللى يشفعلهم انى فعلا بقالى يومين تلاتة غير النهاردة مسمعتش الصوت اساسا .. ربنا يسهل ومسمعوش تانى
4. لسعة الكهربا من الباب بعد النزول من العربيه محطنهاش فى امر الشغل لانهم اقنعونى انها كهربا استاتيكية فى جسم الانسان ودى حاجة طبيعية مش عيب فى العربية وانا اقتنعت تماما لان اكتر من حد برة التوكيل قالى الكلام ده وغير كده العميل اللى كان جنبى مع المهندس محمد العطفى قال نفس الشكوى ورد المهندس نفس الرد وانا كنت رامى ودنى هناك حتى يطمأن قلبى انها مش مشكلة عربيتى لوحدى .. الحمد لله استحمل بقى اللسعة ومع الوقت هتعود :)
5. تزييق فى الطارة محستوش اعتقد اتحلت او حتى لو متحلتش هو صوت مش مزعج وميتسمعش الا اذا كانت الدنيا هادية اوى حوالين العربية ومفيش صوت .. ماعلينا
6. كاوتش الزجاج الامامى ظبطوه كان سايب مع انى حاسس انهم ملزقهوش اوى بس اتظبط طبعا كان سايب خالص وطالع برة .. الحمد لله
7. الزوايا وحدفة ناحية اليمين ظبطوها والمهندس قالى التقرير بتاع الزوايا طالع عنب العنب ههههههه .. فعلا اتظبطت كتيير
8. خشونة الفتيس احيانا خصوصا الغيارين الاول والتانى قالوا كشفنا وملقناش مشكلة ده الطبيعى .. بصراحة انا شايف انه الطبيعى بس كنت انا محبكها حبتين فاكر ان العربية زيرو يبقى فتيسها سكينة فى الحلاوة انما لأ هو بيكون تقيل شوية لما تكون العربية باردة عشان طبعا الزيت بيكون تقيل .. الحمد لله
9. باكيتات الاكصدام الامامى والباب الخلفى شمال كانت سايبة حاجة بسيطة اوى عاوزة تتكبس او تتلزق يعنى هى مش باينة ولا سايبة بشكل يخوف بس قولت مادا رايح اطلع عين ابوهم انما هم قالوا مش هنقدر نعمل فيها حاجة الا لما تسيب خالص .. منطقى لانه عشان يكبسها صح او يلزقها لازم يفكها كلها ويركبها تانى وعلى ايه ماهى حلوة كده
10. رشاشات المساحات كان واحد منهم مسدود شوية والاتنين كانوا عاوز ظبط اتجاهات قالولى ظبطناها ولما طلعت مروح فى الطريق بجرب لقيتهم سلكوه بسيط كده ولا ظبطوا اتجاهاتهم ولا حاجة .. عامة مش مشكلة لان المية بتطلع المساحات قوية ماشاء الله بتنطرها على الازاز كله وتنضفه كويس
11. انا متعود وانا بدور العربية اكون دايس دبرياج عشان لو مبطل على غيار فكنت بحس وانا بدور ان فيه خبطة خفيفة فى الدبرياج كده انا حكيت عنها فى الاخر للمهندس وانا بقوله مشاكلى لكن هو كلفتنى ومحطهاش فى امر الشغل وقال كده كده بنبص على كله .. لما اتسلمت العربية لقيت الخبطة اختفت والحمد لله
خلاصة الكلام اقدر اقول انهم بيستسهلوا بمعنى انهم بيبصوا على المشكلة اللى العميل محددها تحديد تام وهم عارفين حلها يعنى لما اقول بتحدف يمين يبقى عاوزها ظبط زوايا اكيد مش حاجة تانية مش كيميا انما لما اقول تكتكة وطرقعة وفيلم هندى لسه هيدوروا ويفكوا مساعدين ومواويل وهم مش فاضيين يقوم يكبر دماغه ويقولك هنجيبك فى ميعاد تانى لما القطعة تيجى وياعالم هتطلع العيب فيها ولا لأ لانى شاكك .. تانى نقطة انهم بيكبروا دماغهم للمشاكل غير المؤثرة على اداء العربية بشكل عام يعنى رشاشات المساحات مثلا جزء ثانوى ومادام بتطلع مية والازاز بينضف خلاص بقى احمد ربنا وكبر دماغك اما تتسد خالص بقى متطلعش نقطة مية نبقى نظبطها
خلاصة الخلاصة .. حاسس ان العربية اتحسنت والحمد لله بس لسه عاوز ادى لنفسى شوية وقت اركز مع الاصوات اشوف بتحصل ولا لسه وان شاء الله مسمعش اى حاجة تانى خالص وربنا يهدى العربية وتمشى كويس
بس دى كل قصتى النهاردة .. معلش صدعتكم معايا طول اليوم
تمام يامعلم الله ينور وان شاء الله متسمعش الاصوات دى تانى بس انت مقلتلناش التكلفة اية بالتفصيل ؟؟ وعقبال صيانه ال 1000000 وانت وعربيتك فى احسن حال
الله يكرمك يا احمد باشا عقبال عربيتك ان شاء الله ونبقى معاك خطوة بخطوة
التكلفة 367.5 جنيه مصرى تمن الزيت والفلتر المصنعيات مجانا
الف مبروك يا لودا ( دلع خالد ) على صيانة الألف وعقبال صيانة ال 1000000
وبعدين ياباشا ايه التقرير الجامد دة أنا حاسس انى كنت قاعد بشيش معاك
تحياتى
اهلاااااااا يا ابوحميد صديقى العزيز والله ليك وحشة كبيرة معلش انا مقصر معاكى
ياباشا اى حاجة منك زى العسل دلعنى براحتك مانا اخوك الصغير
اى خدمة شوفت التقارير اللى بدماغ عالية؟ اعمل ايه بس 7 ساعات فى الصحرا كنت واخد معايا اللابتوب واليو اس بى مودم وعايش حياتى قولت اعيشكم معايا هههههههههه
معلش ملحقتش أسأل على الحاجات اللى كنا متفقين عليها الدنيا كانت زحمة وعلى اخر اليوم كله مكنش حد طايق يكلم حد او يرد على حد ماصدقت اخدت العربية وخلعت كنت مفهيص خااااااااالص
خلينا على تليفونات بقى .. سلام يا صاحبى
بص ياهيما نسيت اقولك حاجة بالنسبة للرشاشات انا عارف انها بتتظبط فوق وتحت اللى انا اقصده ان الاخرام نفسها مش مظبوطة مش اتجاه الرشاش على بعضه وانا مش عارف وضعية الاخرام بتتظبط ازاى
فى الدايو كان كل خرم بيتظبط فوق وتحت ويمين وشمال على حده انما فى الام 11 مش عارف ازاى!
الف مبروووك علي الصيانة الاولي و ربنا يديك خيرها و يكفيييك شرها ((و تفضل ماشية معاك زي ما انت عايز ))