السلام عليكم ياعصابة، ياترى لسه فاكريني؟
أخباركم إيه؟ والله لكم وحشة جامدة جدا.....
مش عارف إذا كنتم فاكريني ولا لأ. أنا د أحمد الفيومي طبيب الأسنان اللي دوشتكم من حوالي 6 شهور بمعلومات عن الهوندا سيتي الشكل الجديد. وأول ما إشتريت العربية خلعت من المنتدى (حلوة خلعت دي، مناسبة لدكتور أسنان)
المهم حبيت بس أسلم عليكم وأعتذر لكم على إنقطاعي الكام شهر اللي فاتوا. بس المدام كان في مشاكل في حملها والحمد لله عدى على خير وربنا رزقني ببنت أمورة أسميتها أسيل. يعني الخد الناعم وأنا عارف إن هو إسم غريب شوية.
العربية معايا من حوالي 6 شهور وإن شاء الله حكتب تقرير مفصل عنها في خلال أيام وأقول إيه اللي عجبني فيها وإيه اللي ماعجبنيش عشان في حاجات مش موجودة في التقارير السابقة.
وأنا إن شاء الله في خلال أسبوعين أو تلاتة حنزل أعمل صيانة ال 5 آلاف وبالمرة حعدي على جينز كار عشان أركب فرش جلد فياريت لو أمكن نظبط مع بعض عشان نتقابل لأني من المنوفية وبصراحة بعد 25يناير كرهت نزول القاهرة تماما إلا للضرورة القصوى لدرجة إني إعتذرت عن العيادة اللي كنت شغال فيها في مدينة نصر لأكتر من 5سنين. رفضت أنزل العيادة تاني لأني آخر مرة رجعت من العيادة لبيتنا في المنوفية في 5 ساعات ونص. وأخر مرة كنت في طب أسنان القصر العيني رجت المنوفية في 4 ساعات ونص. الطرق أصبحت لا تطاق.
طبعا أحب أسلم على البشمهندس أمجد وعلى الأستاذ سمسم وطبعا على حبيب هارتي من جوا نوكمنت باشا.
والسلام ختام