الموضوع: نوارة نجم: 27 مايو ... للتوضيح

والنبي الله يكرمكم نركز.. ونحاول نجمع الصفوف، احنا ما اتاكلناش على قفانا كده الا لما اتفرقنا وبقى اليساريين والليبراليين يشتموا في الاخوان والاخوان يغطسوا ويروحوا يجيبوا ورقة بوستة والسلفيين والمسيحيين يقعوا في بعض والدنيا تشرذمت خالص

صلوا ع النبي كده وموسى نبي عيسى نبي محمد نبي وكل من له نبي يصلي عليه
وبحق من قال لموج البحر يهتدي، لتقولوا يا عزيز
انا مش شايفة الناس مختلفة على الاهداف، انا شايفاهم مختلفين على الحلول

والاختلاف على الحلول مش مشكلة... فيه حل كلنا مجمعين عليه اللي هو وقفتنا في الميدان
اللي بيقول تأجيل الانتخابات ده عيل ساقط وعايز يأجل الامتحان

واللي عايز مجلس رئاسي كفران زيي، بس مش لازم يجبر الناس توافق معاه على حاجة هم مش عايزينها، خلاص يا شباب، ننزل على الاجماع واللي يحب البلد اكتر ييجي على نفسه

واللي بيتحجج انه مش نازل عشان اللي بيقولوا تأجيل الانتخابات ومجلس رئاسي بيناقد نفسه، وبيشتغلنا بصراحة، لأنه في نفس الجملة بيقول الاغلبية مش عايزة كده، طيب يا عم انت الاغلبية، ما تنزل تاكل الميدان لصالحك، انت حتشتغلنا؟


الله.. جرا ايه؟ ما نزلتوا اليوم اللي ظباط التحرير نزلوا فيه وكان فيه ناس بتقول نازلين نسقط المشير ولما انتوا نزلتوا الميدان اتاكل لصالحكم وبتوع يثقط المثير دول بقوا نملة في غيط
من بات في بيته سلم اصحابه
حد مختلف على ان مبارك وحاشيته لازم يتحاكموا؟ ومش بس يتحاكموا على الفلوس يتحاكموا على الدم؟
حد مختلف ان فيه حاجة مش تمام بتحصل وانهم بيتسرسبوا الواحد ورا التاني؟
حد مختلف ان دول لو خرجوا حيبقى نهارهم نادي ونهارنا احنا اللي مش باين؟

حد مختلف على ان التهديد بالازمة الاقتصادية لوي دراع وان مصر فيها اقتصاديين عباقرة يحلوا الازمة الاقتصادية دي في يوم ونص؟
حد مختلف على ان التحجج بالازمة الاقتصادية لعدم محاسبة رجال الاعمال الفاسدين ورجال الوطني حجة مش مقبولة؟
حد مختلف على حد ادنى واقصى للاجور؟
حد مختلف على ان ما ينفعش شباب طاهر ونقي يتقدم لمحاكمة عسكرية في نفس الوقت اللي الجمل بيدعو فيه للمصالحة مع الحرامية؟
حد مختلف على ان الجمل لازم يمشي امبارح؟

حد مختلف على ان عمر سليمان بيلعب في اساسنا بالفتن الطائفية ولازم يتجاب؟
حد مختلف على ان عودة امن الدولة بالشكل ده مش مقبولة وانهم لازم يبقوا تحت اشراف قضائي وحقوقي؟
حد مختلف على ان الشرطة عاد لينتقم.. واذا كان على الشرطة امرها سهل تنضرب تاني مدام بقت مدمنة ضرب، لكن ينفع الجيش يكتفنا للشرطة، خلاص.. الجيش يخلي بينا وبين الشرطة ولا يتدخل لا لصالحنا ولا لصالحهم، واحنا نتصرف معاهم، لكن ظابط شرطة يقول لظابط جيش قدام العيال بتوع السفارة: انا جاي اخد تاري؟ الله الله الله.. هي بقت كده؟

من هنا ليوم الجمعة ممنوع الآتي:
1- الخلاف والشقاق
2- الاتهام والتخوين
3- طرح قضايا خلافية
كل واحد حييجي على نفسه عشان اخوه، المهم نرجع الميدان رجعة قوية ويبقى شكلنا محترم
المجانين يمتنعون.. المهم وحدة الصف

الاندال يتنحررون.. عشان وكتاب الله المجيد انتوا اول الناس حتندبحوا، لايموها بقى، بقاء المجانين كمعارضة في مصلحة النظام القديم اللي بيعيد انتاج نفسه لانهم اساسا تغور المعارضة من وشهم، الناس بتكرههم وما بيعرفوش يكسبوا الشارع، بالعكس، كل لما يتبنوا قضية الناس تكرهها كأنهم ثورة مضادة على نفسهم، الناس كرهت العمال من وشهم، وكرهت البرادعي من وشهم، وكرهت الديمقراطية من وشهم، وكل ما يحطوا صباعهم في حاجة يكرهوا الناس فيها.. بالصلاة ع النبي، عاملين زي مبارك ربنا مسلط عليهم نفسهم

فدول مافيش اي خطر عليهم، حيتسابوا يعني، عشان النظام القديم الجديد يشاور عليهم ويقول: لو عارضت حتبقى زي عمو الجرسون
انما اللي بيعرف يكسب الشارع هو ده اللي حيندبح، وحتبقى مدبحة تاريخية، ومدبحة بتشويه، ومش بعيد يطلعوكوا عملاء وجواسيس وقرف.. لايموها بقى، بلاش غباء
مافيش داعي للندالة
انت بتستندل مع نفسك كده

المشاركة الأصلية كتبت بواسطة otefa

كل واحد حييجي على نفسه عشان اخوه، المهم نرجع الميدان رجعة قوية ويبقى شكلنا محترم
المجانين يمتنعون.. المهم وحدة الصف))
-------
معلش ياهندسة مش قادر معلقش
مافيش فايدة فيها أسلوبها وقح زي أسلوب أبوها

يا باشمهندس علق براحتك بس بلاش ضرب فيا انا
هاقول لك حاجة يا باشمهندس , بصفة عامة , و ده رأيي الخاص , احنا في يومين الوقاحة للأسف من الحاجات اللي ممكن نتغاضى عنها, او على الأقل مش هانختلف مع صاحبها لمجرد انه وقح , خصوصا انه في كلامه ضميره صاحي في رأيي, انا نفسي طبعا في حد مؤدب و صاحب ضمير , بس للأسف مش موجود , او قليل على اقل تقدير , و المؤدب اللي ما عندوش ضمير ما يلزمنيش , كذلك ما يمنعش اني اقرا لها لما الاقي ليها اراء باتفق فيها معاها , و اللي اختلف معاها ما يلزمنيش , بس الاهداف واحدة
انا في يوم من الايام قريت لعلاء الاسواني و عجبني الكلام مع انه ما بينزليش من زور

المشاركة الأصلية كتبت بواسطة korkor

عودا احمد بس شكلك كنت مقاطعها لما كانت بتشكر فى الجيش

هههههههههههههههه لا ما كنتش مقاطعها ولا حاجة , بس ما كنتش حاسس ان هنا محتاج لطرح وجهة نظرها في الفترة اللي فاتت

المشاركة الأصلية كتبت بواسطة korkor

واللي بيتحجج انه مش نازل عشان اللي بيقولوا تأجيل الانتخابات ومجلس رئاسي بيناقد نفسه، وبيشتغلنا بصراحة، لأنه في نفس الجملة بيقول الاغلبية مش عايزة كده، طيب يا عم انت الاغلبية، ما تنزل تاكل الميدان لصالحك، انت حتشتغلنا؟ (يعنى من الاخر المصلحه هى الغالبه والى يقش يشيل ونعم الاخلاق الثوريه)


حد مختلف على ان الشرطة عاد لينتقم.. واذا كان على الشرطة امرها سهل تنضرب تاني مدام بقت مدمنة ضرب،(تحريض مباشر ضد الشرطه اه الشرطه مش ملايكه بس الناس الغلبانه اللى بتقاد ورا الكلام ده هتبقى مشحونه ونازله عايزه تتخانف وتكرر مجازر يوم 28 فعلا ونعم التفكير والمصلحه الثوريه)
عينه صغيره من الاراء الثوريه

النقطة الأولى , يا قرقر باشا مصلحة ايه ؟
بتقول للي مش عايز المجلس الرئاسي طالما انت عددك اكتر و انت الاغلبية يبقى لما تنزل هاتبقى واكل الميدان .... مصلحة ايه الغالبة اللي بتقول عليها ؟

النقطة التانية
لو انت زيها شفت الشرطة بتقتل ناس قدام عينيك ايام الثورة , و لو سمعت من واحد بيقول لها الظابط يوم سفارة اسرائيل بيقول انا عدت لأنتقم , اكيد هاتقول زيها

ثم يا باشا اللي يسمعك يقول ان مجازر يوم 28 المتظاهرين هما اللي عملوها في الشرطة مش العكس !!!!

المشاركة الأصلية كتبت بواسطة otefa

رابط المشاركة
كنت قاعد دلوقتى مع ظابط امن مركزى وقالى انهم شغالين بطريقة غير مسبوقه وكل يوم عندهم حملة لحته مختلفة ومش بيعدى يوم الا وبيرجعوا بسلاح كتير

الكلام ده حقيقي , للأسف الداخلية فيها النقيضين , ظباط زي الفل , ضمير و نخوة و رجولة و مسئولية , و ظباط زبالة عايزين يخربوا البلد و ينتقموا من الشعب كله
و للأسف اكتر , القيادات من النوع التاني
:(

المشاركة الأصلية كتبت بواسطة power

بصراحه مقال مستفز انا حاسس ان نواره نجم اخدت اكتر من حقها

يا ريت مناقشة الأفكار بموضوعية و بالتفصيل بغض النظر عن الكاتب
الجملة دي انا قلتها مئات المرات ايام الثورة