أنا محتار لو سمحتو ساعدوني

**moro14** · 22-05-2011 02:31 AM

أنا محتار لو سمحتو ساعدوني

أنا بإذن الله ناوي اشتري عربية جديدة يا رب ، بس بصراحة أنا محتار ما بين كذا حاجة ، و كنت عايز من سعادتكم تسعدني بعد إذنكوا و أنا ناوي ادفع 60,000 مقدم

أنا محتار ما بين الآتي:
كيا سيرتو هاي لاين 2011 حوالي 137 ( من برة ممتازة و فيها اوبشن كتيرة بس خايف من مشكلة العفشة الصلبة علشان جنت ال-17 )
MAZDA03 حوالي 151 (بس بسمع ديماً كتير إن المازدا وحشة و قطع الغيار غالية و كمان ال-re seel بتاعها وحش )
اكسنت RB 114 ( الناس لسة مش مجربها و كمان سمعت إن الصاج بتاعها خفيف و ضيقة من جوة )

شفرليت كروز 151
HONDA سيفك 158 (بس عيبها إن قطع الغيار غالية دة بلاضافة انها مشbase only high line )
أرجو الافادة يا شباب ،
و ربنا يجزيكم خير يا رب
مستني ردودكم ،
شكرا

**HOSSAM99** · 22-05-2011 05:42 AM

السلام عليكم
ربنا يوفقك إن شاء الله لعربيه تستمتع بها بدون مشاكل
نمسك العربيات اللي حضرتك بتفكر فيها واحده واحد
السيراتو
عربيه قويه أثبتت أعتماديتها في السوق المصري من حيث الشكل و الإمكانيات و القوه و أسعار قطع الغيار و إعادة البيع
و عربيه مفيش فيها أي مشاكل و بالنسبه لموضوع العفشه ده فهي مش ناشفه أوي لدرجه تخلي الواحد ينزل يتعب من العربيه و يكرهها (هي العربيه ماسكه نفسها شويه في المطبات) فنشوفيه العفشه مش أي شخص يلاحظها (و ملهاش تأثير عندي أنا مثلا ) و هاتاخد قصادها ثبات ملحوظ بالإضافه للكماليات و وسائل الأمان و مساحة الصالون جيده تقريبا إلنترا و الشنطه كذلك و تكييف جيد

المازدا عربيه شكلها ممتاز في بعض الألوان (بالنسبه لي ) تصممه جميل و جديد لكن جمالها كله في الصالون و جودة الخامات و التكنولوجي و الكماليات و فيها وسائل أمان و مريحه في الأمام و كنبتها ضيقه نسبيا
لكن مفيش فيها مشكله في قطع الغيار و أسعارها دايما زي اللانسر و التويوتا أما إعادة البيع أنا شايف أن مفيش عربيه مبتتبعش و أن دايما الزيرو بيخسر و دي ضريبه الإستمتاع بالزيرو لكن مش خساره أكتر من أي عربيه لأ العربيه بتنزل في ثمنها زي أي عربيه أو أقل حاجه بسيطه
لكن عربيه مميزه و مبيركبهاش إلا اللي عشره مع الياباني و بيقدره و عربيه مفيش فيها أي مشاكل

الأر بي عمرها ما هاتقل جوده عن الإلنترا و أنا ركبت العربيه أول أما نزلت عربيه تقفلها جميل و كمالياتها كتير و فيها وسائل أمان لكن هي أصغر من الإلنترا داخليا لكن تشيل 4 حجم متوسط مرتاحين غير السواق و عربيه شكلها جميل
متقلقش منها لو كنت عايزها عربيه تحفه
(لكن أنا شايف سعرها مبالغ فيه شويه)!!!

الكروز عمري ما ركبتها لكن هي بتبهرني بتابلوها و شكلها
لكن الناس بتقول هي موتور النوبيرا و دي حاجه تضايق (مع إني أشك في الموضوع ده)
و فيه موضوع في شوفيرليه في المنتدي عن عربيه كان فيها مشكله (بتطفي و هي ماشيه) و التوكيل محلهاش و تعرض صاحبها لمخاطر كتير " و المشكله تكررت مع ناس في المنتدي(أن شايف العربيه حلوه كشكلا و كمايات لكن أي شئ تاني أنا معرفش عنها حاجه و لا أعرف توكيلها )

أما السيفك فهي مسك الختام عربيه لا توصف بجد عشقي هي و المازدا بغض النظر عن أعتماديتها و شكلها الجميل و صالون الطياره لكن العربيه حاسس أنها واطيه شويه و مينفعش تتركب إلا هاي لاين و مفيهاش عيوب و لا حد بيشتكي منها (لكن سعرها عالي )

لو حضرتك تتقبل مني أن أرشحلك عربيه فهي علي الترتيب
مازدا(شكل جديد)
سيفك
كيا سيراتو
أكسنت أر بي
الكروز (أنا بخاف منها مع إني مرتاح لها كشكلا و كماليات )
ربنا يوفقك

**moro14** · 22-05-2011 06:42 PM

بجد يا باشا أنا عاجز عن الشكر ليك و على ردك الوفي لي على الموضوع كلو
معلشي أنا هسألك سؤال أخير ، بصراحة أنا نفسي في السيفك بس حاسس إن 158 كتير على عربية base line
مع إن كل الكماليات موجودة في cerato ، أنا بصراحة ميال لها أكتر ، إنت إيه رأيك يا باشا
و معلشي بتئل عليك في السؤال؟
شكرا ليك يا باشا
by the way your name like mine

**HOSSAM99** · 22-05-2011 07:21 PM

المشاركة الأصلية كتبت بواسطة moro14

بجد يا باشا أنا عاجز عن الشكر ليك و على ردك الوفي لي على الموضوع كلو
معلشي أنا هسألك سؤال أخير ، بصراحة أنا نفسي في السيفك بس حاسس إن 158 كتير على عربية base line
مع إن كل الكماليات موجودة في cerato ، أنا بصراحة ميال لها أكتر ، إنت إيه رأيك يا باشا
و معلشي بتئل عليك في السؤال؟
شكرا ليك يا باشا
by the way your name like mine

ربنا بخليك و يوفقك و من غير شكر أنا تحت امر حضرتك
لا هو الـ158 مقارنة بسعر السيراتو مش كتير (مع انهم كتير في ذاتهم)
لكن فرق السعر هايتعوض بصالون تحفه فنيه و لا في عربيه في السوق تابلوها زي تابلوه السيفك أو الراحه الداخليه في السيفك و شكلها و الخامات و التقفيل (و أسألني أنا عن التقفيل الياباني عندنا عربيه مازدا فاميلي 98 تقفلها روعه مفيش عربيه تانيه نفس موديلها و بالجوده دي و الكماليات دي)
السيفك ككماليات البيز لاين فيها اعلي في الرفاهيه و الكماليات من السيراتو

و أنا لو مكان حضرتك هاعمل الأتي
هاجيب السيفك بدون شك
للعلم صيانتها بالمصنعيه بكل شئ حوالي 500 جنيه كل 100000 كيلو
الإلنترا 350 كل 5000 كيلو مين الأوفر الكوري ولا الياباني
الياباني معمر جدا جدا جدا فيه حاجات هاتقعد في العربيع بالـ10 سنين مبتتغيرش زي الكبالن و غيره كتير
ومش معني كده إن السيراتو وحشه لا حلوه لكن السيفك أحلي

و هي المازدا طلعت من المقارنه و لا أيه

و بالتوفيق إن شاء الله