45000 مستعمل ....ممكن يكون فيه حاجة كويسه ؟؟؟

**Dawns_Mist** · 22-05-2011 11:22 PM

بين الـ 40 و الـ 50 ألف ... ألاقي إيه مستعمل بحالة كويسه ؟؟

أهم متطلباتي :
- موتور قوي ( يعني عربية سحبها حلو )
- فرامل و أمان .
- أعطالها قليلة .
- واسعه نسبيا ، و ماتكونش واطيه أوي .
- يا حبذا يا حبذا لو كانت أوتو .. بس المنيوال تمام برضه مافيش منه مشاكل.
- مش مهم قطع غيارها تكون غالية أو رخيصة لكن لازم تكون متوفره في السوق .
- مش فارق معايا كتير الشكل و الماركه ولا الكماليات لكن لازم تكون عربية مريحة في السفر.

**Dawns_Mist** · 22-05-2011 11:34 PM

طبعا الكريستالة لو حالتها حلوة و يا سلام لو أوتو و كهربا تبقى تماااااااااااااام .. لكن هل الكريستالة سحبها حلو و فراملها حلوة ؟؟

البولو رووووعه لكن هل ممكن تكون متوفره بحالة حلوه ... و كمان هل سحبها حلو ؟؟

السيفيك بحبها أوي .. لكن مش عايز عربية تكون فات عليها 15 سنة و كمان واطيه أوي !!!

الأسترا مافيش كلام لكن أنا عايزها شكل 2004 هل ألاقيها بالسعر ده ؟؟ و هل ممكن ألاقي منها 1600 ؟؟

عموما كا عربية و فيها حاجة حلوة و حاجة وحشه ... فيدوني بآراءكم ....

**bero0o0o0** · 23-05-2011 12:24 AM

بص يا باشا
موتور في عربيات كتير اوي مواتيرها ما شاء الله زي الفل
لكن امان و فرامل و ثبات انت كده عايز حاجة الماني مثلا
انا برشح لحضرتك فيكترا 99 1600 بس بعد الكشف الدقيق عليها
لو لقيت واحدة نضيفة هاتعجبك اوي و هتلبي متطلباتك كلها تقريبا
و ربنا بوفق

**Dawns_Mist** · 23-05-2011 02:13 AM

يا ترى فيكترا 2 أقدر ألاقيها في حالة كويسه بالسعر ده ؟؟

**ashouhdy** · 23-05-2011 02:30 AM

مشاكل الاوبل لا تعد ولا تحصى ....

**Dawns_Mist** · 23-05-2011 12:58 PM

قدامي لانوس .... يعععع ... أنا عايز أهرب من الكوري بأي شكل.
البولو من أقرب المرشحين .. بس هشوف حالتها الأول ، لكن برضه مازلت خايف من سحبها لإنها 1300.. أجمل حاجة فيها إنها ألماني و موديل 2001-2002 يعني لسه فيها عمر.
و إيه رأيكم في الريو القديمه .. أو الشوما .. أو السيفيا ... الكيا القديم عموما .. هو أنا بخاف من الكوري جدا بس الإصدارات القديمة من كيا كانت محترمه و الناس بتشكر فيها!!!!!

**M_SALLAM** · 23-05-2011 04:05 PM

حضرتك ممكن تجيب دايو نوبارا 2004 بحالة نظيفة او رينو كليو 2004 بحالة نظيفة , انما لو ملقتش هات فيرنا 2007 او 2008 تكون بحالة فوق الممتازة ..
نصيحة لله ابعد عن الأوبل فيكترا نهائى و الأوبل عموما لأن العربيات دى تتجاب زيرو انما مستعمل نصيحة بلاش ..
فى النهاية الأختيار لك و ربنا يوفقك فى اختيارك .......

**Dawns_Mist** · 23-05-2011 06:09 PM

قدامي نوبيرا 2006 بحالة ممتازة .. قدامي لانوس .. قدامي بولو .. !!!!

كله مانيوال .. كله كهربا و باور .. كله نضيف من جوه ..

ولو إني مش بحب الكوري .. لكن عربية عمرها فقط 5 سنين أكيد أحسن من عربية بقالها 10 سنين .. طبعا بتكلم عن البولو ..!!!

إيه رأيكم ؟؟؟

**M_SALLAM** · 23-05-2011 07:04 PM

المشاركة الأصلية كتبت بواسطة dawns_mist

قدامي نوبيرا 2006 بحالة ممتازة .. قدامي لانوس .. قدامي بولو .. !!!!

كله مانيوال .. كله كهربا و باور .. كله نضيف من جوه ..

ولو إني مش بحب الكوري .. لكن عربية عمرها فقط 5 سنين أكيد أحسن من عربية بقالها 10 سنين .. طبعا بتكلم عن البولو ..!!!

إيه رأيكم ؟؟؟

بلاش بولو لو حصلها حاجة هتلاقى قطع غيارها مولعة نااااااااااار و ممكن متلقيهاش انا قلت لحضرتك العربيات دى تتجاب زيرو مش مستعمل...
ثانيا: لو حضرتك مش عاوز كورى , حضرتك ممكن تجيب لانسر كريستالة موديل 98 بشرط ان تكشف عليها و تكون حلتها ممتازة و اعتقد ان من النادر تلاقى لانسر كريستالة بالحالة اللى انت متخيلها ..
و ممكن كمان تجيب رينو كيليو 2004 تكون حالتها محترمة ..
و ربنا يوفقك فى اختيارك ...