الموضوع: يوم كله خير بإذن الله

للي عايز يقضي يوم في الخير يا جماعة، جمعية روح الخيرية عاملة رحلة مع أيتام قرية سقيل يوم الجمعة اللي جاية ان شاء الله 25 إبريل و هايزوروا معاهم بانوراما أكتوبر-ملاهي واندرلاند- الحديقة الدولية. و عشان نعرف اكتر عن قرية سقيل و أيتام القرية دي حكاية القرية مع جمعية روح على لسان أحد مسؤوليها:

قريه سقيل هيا قريه ف محافظه الجيزه بعد وراق العرب

اللى يمشى على كورنيش العجوزه طوالى طوالى طوالى هيوصل لها و هوا ماشى هيحس انه ف بلد غير البلد من العجوزه و المهندسين للكيت كات لامبابه للوراق لسقيل، مفيش خدمات مفيش سفلته للشوارع و ده كله و احنا ف محافظه الجيزه!!

القريه تعداد سكانها 30 الف بيضموا 303 يتيم ما بين يتيم اب و يتيم الاب و الام مش عايشين ف ملجا هما ساكنين مع اسر معيله من قرايبهم

الجمعيه الشرعيه كانت لغايه سنه فاتت هى الجهه الوحيده اللى بترعاهم و بدانا و الحمد لله نشارك معاهم

بقينا عارفين الاطفال بالاسم و هما كمان عارفينا

بنحاول ننمى فيهم اخلاقيات و اهتمام بالثقافه و بالتعليم و اكيد طبعا حفظ القران و حضور الكتاب

عملنا حتى الان مرتين مسح للقريه و دخلنا البيوت و شفنا حالها المتردى ع الطبيعه

قريه سقيل كلها ان شاء الله من الفئات المستهدفه للتنميه

عاوزين نغير و نحسن المرافق و الخدمات
نقدم خدمات صحيه و توعيه بيئيه و اجتماعيه
نحاول نخلى الامهات تعمل مشروعات صغيره تدر عليهم ربح

قدامنا شغل كتير ان شاء الله ف القريه و الايتام جزء كبير من اهتمامنا طبعا

فيا ريت تشاركوا معانا حلمنا ف تغيير حياه الاطفال و قريتهم للاحسن

يبقى التنويه إلى ان الرحلة مش هاتضم كل ال303 يتيم، انما المتميزين منهم أخلاقيا و دينيا و علميا، و عن الفلفسة من اختيار اطفال متميزين يقول أحد مسؤولي روح:

اما عن الفلسفه اللى ورا اختيار اليوم و اختيار 50 طفل من 303 طفل يتيم ف القريه

الاطفال عارفين ان فيه رحله للمتميزين اخلاقيا و دينيا و علميا

يعنى مثلا ضياء للى يعرفه مش هييجى معانا عشان اتخانق مع زميل ليه و ضربه

مينفعش الايتام يتعودوا انهم بيتعاملوا معامله خاصه عشان ايتام و ان ده زى جواز حمايه من اى عقاب

لازم يعرفوا ان فيه ثواب و عقاب و ان المتميز له جايزه خاصه

و هننبه عليهم بالجد و الاجتهاد ف المذاكره عشان المجدين هيكون ليهم مفاجات تانيه ف الصيف ان شاء الله

وجودنا ف حياتهم ده تكليف من ربنا سبحانه و تعالى عشان نحاول نساهم ف انهم يكونوا شباب و شابات متميزين يعزوا دينهم و بلدهم

و طبعا تحرير سينا فرصه اننا نتعلم معاهم و نفتكر حرب اكتوبر و انتصار مصر و رجوع الحق لاهله

يا ريت ناس كتير تقدر تشارك معانا و تحضر اليوم ده

و آدي لينك تفاصيل اليوم على الفيس بوك http://www.nilemotors.net/Nile/newth...newthread&f=60

التجمع الساعة ال 8 صباحا امام مسجد عمر مكرم بالتحرير للراغبين للأنتقال بالاتوبيس او الساعة 9 صباحا امام بانوراما حرب أكتوبر للي جايين بعربياتهم. بالنسبة للي عايزين ييجوا بالأتوبيس لازم يتصلوا بمنظمي اليوم عشان يحجزوا لهم مكان في الأتوبيس.
اشتراك اليوم 5 جنيه شامله تذاكر البانوراما و الحديقه الدولية.

للاستفسار او الاشتراك في الأتوبيس
0111148282
roah_icc2@hotmail.com

و جزاكم الله خيرا على الاهتمام :)