الموضوع: عاوز دكتور سنان محسش عنده بأى ألم ( انا عندى عقده من السنان )

السلام عليكم يا جماعه

انا من زمان جدا وانا بكره دكاتره السنان ( طبعا مش كره شخصى ليهم ) .. عمرى ما حبيت اروح ل دكتور سنان ودايما بخاف

انا من صغرى والله العظيم فاكر غايت دلوقتى رحت انا وماما واختى ل دكتور السنان وخليت اختى تخش الاول وبعدها بعد اللى شفته طلعت اجرى وده كنا اطفال ف ابتدائى لسه ومن ساعتها عمرى ما رحت ل دكتور سنان مع انى رحت بعدها كتير مع صحابى وكده وبشوفهم دايما العمليه بتبقى معقده وعمرها ما كانت سهله ابدا لأى حد

ف انا بطلب طلب يمكن صعب شويه

لانى بجد متبهدل ( عندى ضرس العقل عاوز عمليه جراحيه ) وضرس تانى اللى جوه خالص الناحيه المقابله ل ضرس العقل جواااااااه حفره !! وقريب هيخش على العصب

ف عاوز الحق نفسى

حد ينجدى عاوز دكتور اروح عنده يدينى بنج ينيمنى اصحى الاقيه خلص او اى حاجه

ياريت لو يكون فى مدينه نصر - حدائق القبه - مصر الجديده .. او اى حته قريبه مش هنختلف ولو مفيش نروح بعيده برضه

بصوا يا جماعة انا ليا تجربة مع الاسنان قعدت فيها سنتين و دى الخلاصة
1-اولا اذا هتشيل ضرس يستحسن تشيله بالنهار (على قدر الامكان) علشان لو شلته بالليل طول الليل هينزف و مش هتعرف تنام ابدا و هتبقى ليلة مطينة
2-ماتكسلش ابدا لو سنة او ضرس فيهم مشكلة لانك كل ما بتاجل الموضوع بيتفاقم و الخسارة بتكون افدح و ممكن تروح تلاقى حاجة جديدة بايظة انت مش حاسس بيها فتلحقها
3-اهم حاجة فى دكتور الاسنان و ده اهم من دكتور مابيوجعش زى حضرتك ما بتقول النظافة ثم النظافة ثم النظافة لانى و بدون مبالغة اعرف ناس كتير جدا جالهم الفيروس الكبدى سى اللى غالبا بيدمر الكبد و السبب الاول و الاهم فى الاصابة بيه هو دكتور الاسنان لو ماكنش نظيف و بيعقم العدة كويس و اعرف ناس كتير جالهم المرض ده بسبب دكتور الاسنان و منهم عمتى و ماتت بسبه و خالتى و غيرهم الكتير فالافضل انك علشان تفهم ان دكتور الاسنان عنده ضمير و بيعقم ادواته كويس المفروض ان الواحد لما يروح العيادة بتاعته مايلاقيش ناس كتير قاعدة مستنية بره لانه المفروض الدكتور بعد ما بيخلص مع عيان العدة اللى اشتغل معاه بيها بيحطها فى تلاجات تعقيم و علشان التعقيم يبقى صح لازم وقت التعقيم لا يقل عن ساعتين للعدة الواحدة و بالتالى هو بيكون جايب كام عدة على قد مثلا تلتين الناس اللى بتزوره يوميا و بالتالى لما تروح لدكتور اسنان الصح تروح تلاقى واحد او اتنين مستنيين بالكتير مش عشرة لانه المفروض بيدى مواعيد تبعا لانتهاء عملية التعقيم لكل عدة
4-و للعناية بالاسنان السليمة لازم الواحد يعمل الاتى يغسل اسنانه مرة كل يوم على الاقل و لازم لازم بعد ماتاكل او تشرب اى شئ ماعدا الماء طبعا لازم تمضمض بقك كويس بعد كل اكلة او شرب و ماتخليش بقايا اكل جوه بقك بالسعات لان البقايا دى هى القنبلة الموقوتة اللى بتقعد تربيها جوه بقك و بتتخمر و تبتدى الميكروبات و البكتريا تشتغل الله ينور

و اخيرا بالنسبة لنطاق سكنك ارشحلك احسن حاجة و هى مستشفى كيلوباترا فى صلاح الدين و ناس نظاف جدا و اجهزة على اعلى مستوى و دكاترة كلهم شاطرين و متنقيين صراحة و عن نفسى اللى عالجنى دكتور وائل و ده كان مواعيده من تلاتة الظهر الى ستة و ده بيتهيالى مناسب لحالتك لو هتخلع و مواعيده الاحد و الخميس و الجمعة