موضوع مهم لكل الايبيزاوية ويا ريت الكل يشارك

**egman** · 24-05-2011 11:53 AM

السلام عليكم ورحمة الله وبركاته

انا فكرت يا شباب اننا نعمل موضوع ويسمى مثلا قائمة باحسن الميكانيكة فى سيارات الايبيزا
انا شوفت الفكرة ده فى اقسام تانية ونخليها ازاى بقى كل واحد يكتب تفاصيل الميكانيكي الى بيرتاح فى الشغل معاه وبيعمل عنده كل حاجة وبيخرج العربية تمام من تحت ايده ويكون القائمة فيها العناصر الاتية :

اسم صاحب المكان .
عنوان المكان بالتفصيل والوصف .
مستوى المهارة فى العمل .
مستوى المعاملة المادية .
الضمير والاخلاص فى الصنعه .
هل يعمل بايده ولا يعتمد على الصنايعيه الصغار .
نوع الشغل الى بيعمله فى الايبيزا هل صيانات بس ولا تسقيط مواتير وفتايس وكده .
هل يوجد امكانية الانقاذ فى حالة التعطل فى اى مكان .

الموضوع ده لو نجح وقدرنا نحط بيانات وليكن 10 ميكانيكية كويسين هيكون انجاز هام لكل واحد فينا وهيكون فى اختيارت كتيرة امام كل واحد فينا مش مجبر على واحد بس فى الشغل ولما فعلا نضع حوالى 10 من الميكانيكية هنكون نجحنا فى القائمة ده ونعمل بعد كده واحدة للكهربائية والعفشة ومراكز ضبط الزوايا ، اية رايكم يا جماعه وانا بعد ما كل واحد يحط بيناته هجمع الكلام ده واحطه فى ملف اكسيل مثلا وننشرة على المنتدى .

**meeg** · 24-05-2011 12:36 PM

تصدق فكره جامده
متابع

**matrix012** · 24-05-2011 12:43 PM

انا معاكو انا تعبت من الاشتغالات بتاعت الناس ديه وعاوز فعلا حد ثقه علشان ابقى مطمن

**waelms3** · 24-05-2011 02:30 PM

فكرة جامدة جدا وعاجبنى تنسيقك يا باشا

**ehab_mansour** · 24-05-2011 03:06 PM

فكرة رائعه
ومنتظرين الاستكمال
انا معرفش حد في القاهرة للأسف

**macgiver30** · 24-05-2011 05:21 PM

ياجدعااان عاوز ابيييزا 94 حالة جيدة جدا

**ahmedtunning** · 24-05-2011 06:21 PM

ورشة ابراهيم و اسماعيل
المكان في امبابة ورا المطابع الاميرية قدام البوسطة عند موقف امبابة
هما 5 صنايعيه 2 شغالين في التوكيل 3 شغالين في الورشة
كهربائي
3 ميكانيكا
عفشة و فرامل
فلوسهم رخيصة لو معاكش مبيتكلموش
وفهميييييييييييين فاحت
وبشتغلوا في الالماني بس ما عدا البي ام و المرسيدس مجموعة فولكس بس
ولو بيتدور علي حاجة ومش لاقيها هما بيجبوهالك بنفس سعرها في الميكانيكا

**ashoub** · 24-05-2011 10:35 PM

الموضوع فعلا جامد جدا وانا كنت عاوز اعمله فى البولو
بالنسبك للمكانيكا والعفشه رضا عمر الى فى الحرفيين ده ممتاز جدا والصنايعيه الى عنده فاهمين شغلهم وعندهم ضمير واساميهم طارق ومحمود وعمرو واحمد وهانى وكلهم كويسين وبالنسبه للمكان امام بلوك 8 فى الحرفيين خلف ورشه المهندس رشاد واسعارهم فى المعقول وعندهم ضمير فى شراء قطع الغيار ولو انت جايب حاجه مش مظبوطه او بايظه هما بيرجعوها ويجبولك الاحسن وطبعا الاسطى رضا بيبقى متابعهم ولو فى حاجه صاعبه او واقفه قدامهم هو الى بيشتغل بصراحه الناس كلها متعاونه

**egman** · 24-05-2011 11:24 PM

الحمد لله على التفاهم والمشاركة الفعالة وعلى فكرة الموضوع ده لونجح يا جماعه هيوفر علينا اشتغالات كتييير اوى لان هيكون قدام الناس اختيارات كتيرة وانا هقول على الميكانيكي بتاعى :

إسم صاحب المكان :

محمد الزعيم

عنوان المكان :

165 ش جسر السويس - أمام نادي الشمس بوابة رقم 5 خلف الشرقاوى بتاع قطع غيار اليابانى الى فى جسر السويس .

الموبايل :

0113991219
مستوى المهارة فى العمل :

محمد الزعيم من الناس الى بيهتم بشغله جدا جدا وبالزبون بتاعه جدا جدا ومهارة ودقه متناهية وبيعامل الناس بمنتهى الادب والتواضع مش تنك زي كتيير من الناس فى المجال ده .

المعاملة المادية :

متوسط برده فى المعقول بالنسبة لدقة الشغل .

الراجل بيشتغل بايده فى كل حاجة والصناعيعه الى عنده مش اكتر انهم يفكوا او يربوطوا او بعض الصيانات البسيطة بس تحت مراجعته طبعا لكن اى شغل صعب او غير صعب بيعمله بنفسه .

نوع الشغل الى بيقوم بية :

من اول الصيانات الدورية حتى تسقيط المواتير بكل انوعها وفى مختلف اناوع الفولكس فاجن والفتايس وتحويل السيارات الى اتوماتيك كما يوجد لديه كهربائي سيارات وكمان هو بيقوم بأعمال كافة انواع العفشة لأى عربية فى الالماني ويقوم بالكشف على السيارات فى حالة الشراء او البيع وكمان بيوفرلك قطع الغيار .

فى حالة الأعطال فى اى مكان لا قدر الله :

الراجل على استعداد تام انه يجيلك وبنفسه لاى مكان انت عطلان فيه ده طبعا لما بتكون زبون الورشة ويعرفك .