يوم فى مرور بين السرايات

**beshomilan** · 24-05-2011 11:39 PM

ازيكم يا اخواتى

انا حبيت انقل الموضوع بامانة وعشان احاول اساعد اى حد عشان ميتعبش زيي

رحت انقل رخصة العربية باسمى عشان فاضلها شهرين وطبعا عندى فحص (العربية مرور العجوزة باسم المالك القديم) وانا ساكن فى شبر ا مصر يعنى تبع مرور عبود اصلا وامتلك عقد مسجل

رحت على 8.30 اشتريت الورق بتاع الترخيص والفحص ب 40 جنيه بالدوسيه

رحت على مصر للتامين امنت سنتين ب 238 جنيه (العربية اكسيل 1500 مو 96)

قلت اطلع المخالفات بعد ما استنيت ييجى ساعة قالك السيستم وقع..قمت خدت العقد وارخصة اللى كان واخدهم بتاع المخالفات ونزلت افحص

وطبعا اشتريت الطفاية ب 121 والمثلث والشنطة ب 75

ودخلت الفحص وخد بصمة الموتور فى دقيقة وجه مهندس بص عالطفاية وكله تمام ورحت للمهندس اللى قاعد وخلصلى الورق وبصراحة محدش طلب فلوس او لمح لكده

رجعت تانى للمخالفات وبعد خناقات وتنفيض استمر ل 3 ساعات من الموظفين والسيستم الواقع دائما

طلعت المخالفات ب 305 وهى مخالفة واحده وسالت قالولى دى مخالفة رادار ودفعت 5 جنيه كمان عشان استلم الورقة نفسها

نزلت عشان ادفع الضريبة واعمل الرخصة الجديده لقيت الموظفة بتقولى انت مش تبعنا اصلا والمفروض ترخص العربية تبع مرور عبود بتاعك!!!!

قلتلها طب ليه محدش قاللى من الاول قالتلى معرفش ونفضتلى وخدت واحد تانى

قلت مابدهاش وطلعت لمدير العلاقات العامة فى المرور

مقدم شخصية محترمة وسمعنى وقاللى فعلا عندها حق وقاللى مهندس الفحص مبصش على بطاقتك وهو بيفحص قلتله لا قام سكت وقاللى بص انزل قلهم ادفع الضريبة واخد ورقة انى هرخص فى عبود وانى خلصت هنا كل حاجة وقاللى لو فى حاجة قولى وانا ابعت حد من رجالتى معاك

نزلت وفضلوا يرمونى من موظف للتانى وميردوش

ورجعتله تانى بعتلى حد شكله فاهم واعتقد ظابط او ماشابه

وحكيتله على المشكله وقاللى هتروح عبود عادى وكل الورق هيمشى عادى ولو رسيت هتشترى ورق الفحص بس وادخل لمدير الوحده وخليه بس يطابق لك الفحص الفنى بتاع هنا لهناك وبص ومتقلقش وطمنى
قلتله مش نقل ملف العربية بياخد وقت وكده قاللى لالا ده كان زمان دلوقتى كله بالكمبيوتر بيدخل البيانات يطلعله ملف العربية كلها لاننا كلنا سيستم واحد

والمفروض بكره انزل اروح مرور عبود واشوف هيحصل ايه..وهبلغكوا بالاخبار

**elbeheri** · 24-05-2011 11:57 PM

مفيش فايدة

**ahmedhilmy** · 25-05-2011 12:15 AM

ان شاء الله ميكنش في مشاكل و بعدي اليوم علي خير بس ازاي فتتك انك لازم ترخص في عبود؟

**modo88** · 25-05-2011 02:37 AM

ان شاء الله خير وصحيح فاتتك ازاي موضوع الاقامه دا ووحدة المرور اللي تابع ليه

**احمد المصرى** · 25-05-2011 12:16 PM

بس انت مقلتش ان دفعت قد ايه فى نقل الملكيه يا باشا

**beshomilan** · 26-05-2011 11:48 PM

مفيش فايدة

مصر مصر مصر
يعني مدام السيستم واحد مش ده يخلي الواحد يخلص حاجته في أي مرور ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟

فعلا..عمار يامصر

ان شاء الله ميكنش في مشاكل و بعدي اليوم علي خير بس ازاي فتتك انك لازم ترخص في عبود؟

ان شاء الله خير وصحيح فاتتك ازاي موضوع الاقامه دا ووحدة المرور اللي تابع ليه

مكنتش اعرف اطلاقا ومحدش قاللى ولا عبرنى هناك والبطاقة محدش عبرها هناك ولا بص فيها..وانا كنت فاكر ان نقل الورق بياخد 6 شهور زى ماسمعت ولازم طلب استعجال ففتكرت انى ممكن اكمل ترخيص هنا وبعدين انقل الورق

بس انت مقلتش ان دفعت قد ايه فى نقل الملكيه يا باشا

كانوا 356 جنيه فى الشهر العقارى

**sayed911** · 26-05-2011 11:59 PM

حاسس معاملة الضباط معاك مختلفة ؟؟؟؟؟ سيبك من الموظفين دول بيشربوا روتين على غيار الريق فعلا والله ولكن الضباط وضعهم ايه من كلامك حاسس انك مرتاح لطريقتهم في التعامل

**beshomilan** · 27-05-2011 12:02 AM

اكملكوا قصة الترخيص فى عبود

رحت مرور عبود على 8 ونص
دخلت للموظفة بتاعت تجديد الرخصة وكانت شخصية ممتازة ومبتسمة فوشى وهرجت معايا ووريتها الورق وشرحتلها الوضع وساعدتنى جدا وقالتلى ادخل لمدير الوحده يأشرلك على الورق..ودخلت واشرلى ورجعتلها وكملت شغلها بسرعة وبحترافية وقالتلى روح لمهندس الفحص وشوف هتطابق الفحص ولا لا..
رحتله كان الجو فراغ وقلتله قاللى اشترى ورقة الفحص بس وتعالى..اشترتها ب 4 جنيه ورجعتله دقيقة الراجل بص على العربية وطابق الرقم وجالى واحد بص على الطفاية وشنطة الاسعافات والمثلث ومضى الورق وشكرا

رجعت للموظفة كملت الورق واديتنى وصل دفع الضريبة 571 جنيه ووصل استلام اللوح ودفعت الضريبة ورجعت استنيت ييجى نص ساعة واستلمت الرخصة ورحت بيها استلمت الارقام الجديده مكان القديمة وركبتهم وروحت بيتنا على 11.30

بصراحة مرور رائع واتمنى ان كل الوحدات المرورية تكون زى كده فى معاملة الناس والنضافة والتنظيم والسهولة واليسر

ملاحظات:
مرور عبود فيه اماكن ظل كتير متغطية للراحة وكراسى وشجر كتير مزروع يهدى تعب الانتظار..بينما فى بين السرايات اماكن محدوده والناس رايحة جايه عليك زى سوق الجمعة
مرور عبود فيه ناس بتشتغل بجد وبضمير وبيقابلوك بابتسامة وكذا حد واقف جنبى فى كذا شباك سمعته بيشكر فيهم ويقولهم ربنا يباركلكم ويدعيلهم ..بين السرايات كل اللى سمعته خناقات بين المواطنين والموظفين يا اما تطفيش يا تنطيش
مرور عبود تروح تفحص تخلص بدون عقد او كلاكيع وبدون تشدد وبسرعة..بين السرايات بتخلص بس مش بنفس سرعة عبود ولا سهولته

وربنا يسهل لكم اموركم وانا تحت امركم فى اى استفسار

**beshomilan** · 27-05-2011 12:05 AM

حاسس معاملة الضباط معاك مختلفة ؟؟؟؟؟ سيبك من الموظفين دول بيشربوا روتين على غيار الريق فعلا والله ولكن الضباط وضعهم ايه من كلامك حاسس انك مرتاح لطريقتهم في التعامل

بصراحة استاذ سيد كان المقدم المسئول عن العلاقات العامة فى بين السرايات متعاون جدا وفمنتهى الاحترام وبيسمعك بدون ملل وساعدنى جدا وبعتلى حد عرفنى اعمل ايه وعرفنى كل المعلومات اللى غايبة عنى وكنت محتاج اعرفها وفعلا طلع كلامه كله صح واللى قاله فعلا انا عملته بالظبط..وحسيت بالصدق فكلامهم وانهم مش بيوزعونى