ازاى اروح الاماكن دى من موقف العاشر

**mezokg** · 25-05-2011 12:40 AM

السلام عليكم ورحمه الله وبركاته

يا جماعه انا عايز اروح الاماكن دى من موقف العاشر

اولا عايز اروح استاد القاهره
ثانيا عايز اروح حديقه الازهر
ثالثا عايز اروح الحسين
رابعا عايز اروح الحديقه الدوليه
خامسا عايز اروح جامع الازهر
سادسا عايز اروح جامع عمرو بن العاص

ارجو الرد بسرعه

**eng.m7md.ali** · 25-05-2011 12:46 AM

بسم الله ماشاء الله
بص يا سيدي واحدة واحدة
اولا معاك عربية ولا تقصد مواصلات؟

**sayed911** · 25-05-2011 01:13 AM

بص رتبهم من الأقرب لبعضهم !! يعني مثلا الحسين جنب الأزهر بارك ودول مش محتاجين مواصلات دول لو كنت عند اي واحد فيهم تاكسي بـ 5 جنيه ها يويديك للمكان التاني في لحظات !!
وهكذا بقى يا فندم

**eng.m7md.ali** · 25-05-2011 01:28 AM

بص انا هقولك لو معاك عربية هتعمل ايه...
اولا الاستاد : هتيجي من ناحية موقف العاشر وداخل على القاهرة تطلع الكوبري بتاع الحرفيين هتنزل الناحية التانية وهتلاقي المطار على ايدك الشمال
هتفضل ماشي هتلاقي في وشك الطريق داير للشمال هتمشي برده زي مانتوعلى يمينك الكلية الحربية هتدخل يمين مع الكلية وكدة انت بقيت في صلاح سالم
هتفضل ماشي كتييييييييييير لحد ماتلاقي كوبري الجلاء هتطلعو وتنزل تكمل عادي وشوية هتلاقي نفق العروبة هتنزل وتكمل عادي وشوية تاني هتلاقي كوبري الفنجري قاطع الطريق فوقيك كدة بقى انت قربت اوي هتمشي من تحته وتاخد اول يوتيرن اللي هو تحت الكوبري اللي بيوديك ناحية المقطم وكدة وتلف وترجع هتتاكد ان مشروع المترو الخط التالت على ايدك اليمين
وتدخل يمين وتمشي مع الكوبري هتمشي شوية هتلاقي قاعة ارض المعارض على ايدك اليمين وهتلاقي الاستاد على ايدك الشمال

**eng.m7md.ali** · 25-05-2011 01:32 AM

ثانيا حديقة الازهر:
نفس الوصف اللي فات بس لحد ماتوصل لكوبري الفنجري في صلاح سالم هتطلع على الكوبري اللي المفروض تلف من تحتيه
وتكمل علطول هتلاقي مسجد الشرطة على ايدك اليمين تكمل وتطلع الكوبري وتمشي تمشي هتلاقي نزلة نفق الازهر
ختخلي النزلة على ايدك اليمين وتكمل لقدام
اول مايخلص السور ده هتلاقي حديقة الازهر على ايدك اليمين بعديه

**eng.m7md.ali** · 25-05-2011 01:35 AM

ثالثا الحسين :
نفس الوصف بتاع حديقة الازهر بس الفرق انك هتمشي من جمب نزلة نفق الازهر وهتبقى النزلة شمالك
هتلاقي الطريق بيلف لليمين هتمشي معاه شوية لحد اخر الشارع ده وتدخل شمال مع الطريق في يمين هتلاقي الحسين وخان الخاليلي على ايدك اليمين

**eng.m7md.ali** · 25-05-2011 01:44 AM

رابعا الحديقة الدولية :
ودي بقى عايزك تركز فيها اوي
المهم هتيجي من الموقف هتطلع كوبري الحرفيين وتلاقي المطار على ايدك الشمال هتفضل مااااااااااشي كتير لحد ماتلاقي الطريق بياخد شمال والكلية الحربية وتمشي شوية بس الفرق انك هتكمل علطول مش هتدخل يمين من جمب الكلية
المهم هتمشي شوية وتلاقي كوبري المطار قاطع الطريق فوقيك وتاخد اول يوتيرن وبعدين اول يمين وكدة انت في اول الاوتوستراد
هتمشي علطوووووووووووووووووووووو وووووووول مع الطريق وبعد حوالي 5 كيلو هتلاقي كوبري اسمه (4.5 كيلو ) هتمشي عليه انت كدة لسة في الاوتو ستراد
وبعد النزلة هتلاقي الطريق لافف يمين وهتلاقي النادي الاهلي في وشك قبل ماتلف مع الطريق
ختمشي مع الطريق ويبقى النادي على ايدك الشمال وهتفضل ماااااااااااااااااااااشي كتير لحد ماتلاقي بنزينة مصر على ايدك الشمال هتبقى على ناصية شارع عباس العقاد وده معروف اوي علشان لو لاقدر الله توهت
المهم لو لقيت البنزينة دي هتاخد اول يوتيرن والبنزين هتبقى على يمينك هتدخل من جمبها كدة انت بقيت في عباس العقاد
تمشي علطوووووووووول لاخر الشارع ده هتلاقي الترام قاطع الطريق وكدة تعرف ان انت في مصطفى النحاس
المهم هتمشي يمين مع الطريق لان مينفعش شمال وتاخد او يوتيرن وترجع تاني وتمشي في امتداد عباس العقاد يعني هتدخل او فتحة يمين
هتدخل الشارع ده وهتمشي شوية هتلاقي الحديقة الدولية على يمينك وجمبها وندرلاند
وبس كدة

بس بالنسبة لخامسا وسادسا مقدرش افتي فيها هههههههههه

**mezokg** · 25-05-2011 07:48 AM

الف الف الف شكر على الردود الجميله دى وجزاك الله خيرا على الشرح الوافى ده

وممكن تقولى لو مواصلات اركب اه من موقف العاشر او ممكن من المرج او رمسيس انا ممكن اوصل الى الاماكن دى واركب منها عادى

والف شكر مره تانيه

**mohamed_selim** · 25-05-2011 01:53 PM

من موقف العاشر فى ميكروباصات توصلك المرج و رمسيس

اولا عايز اروح استاد القاهره: من موقف العاشر اركب السيده عيشه و تنزل عند الاستاد

رابعا عايز اروح الحديقه الدوليه : هتركب برضه السيده عيشه او رابعه او اول عباس و تنزل اول عباس و تعدى الشارع تاخد ميكروباص من عند البنزينه (بيقوا اخر الشارع) هينزلك عند الحديقه الدوليه

ثالثا عايز اروح الحسين
خامسا عايز اروح جامع الازهر

هتركب السيده عيشه و تقول للسواق نزلنى عند العربيات اللى بتروح الحسين ... هينزلك بعد نادى المقاولين بمحطتتين هتلاقى بيجو 7 راكب و ميكروباصات صغيره كده بجنيه النفر هتعدى على الحسين فى طريقها لوسط البلد .... الجامع الازهر قصاد الحسين (مجرد تعدى الشارع)

ثانيا عايز اروح حديقه الازهر : من الحسين او الازهر تاكسى ب 3 او 5 جنيه يوديك ... لو بتحب المشى هتاخدها فى نص ساعه

سادسا عايز اروح جامع عمرو بن العاص: برضه تركب سيده عيشه و من هناك تاخد اى حاجه رايحه جيزه (مش منيب علشان ميطلعش دائرى ... جيزه من المنيل) و قله نزلنى قبل نفق الملك الصالح ... هيكون بينك و بين جامع عمرو 3 دقايق مشى

**mezokg** · 26-05-2011 07:00 AM

الف شكر يا محمد وجزاك الله خيرا على الشرح السهل ده

الموضوع: ازاى اروح الاماكن دى من موقف العاشر

LinkBack

أدوات الموضوع

عرض

-

-

-

-

-

-

-

المواضيع المتشابهه

ازاى اروح الاماكن دى بالترتيب من رمسيس او التحرير

ازاى اروح سوق العصر ودمياط من موقف العاشر ؟

ازاى اروح من العاشر من رمضان الى العين السخنه

ازاى اروح العاشر من المنصورة عن طريق السنبلاوين ؟

ازاى اروح المنيل مواصلات من موقف العاشر او من موقف مسطرد

الكلمات الدلالية لهذا الموضوع

المفضلات

المفضلات

ضوابط المشاركة