الموضوع: أول مرة

اول مره دي ديما اصعب مره
انا لما دخلت كليه الطب كنت خايف من المشرحه بس لما دخلت كانت عاديه
و قلت المشرحه زيها زي اوضه العمليات
و بابا قالي بعد معديت سنه اولى هتخش معايا اوضه العمليات يا ابو حميد
ابو حميد قال اشطه و زي ماكون رايح السينما مع واحده حلوة
العيانه اتخدرت
الحج اتعقم و سمى بالله و مسك المشرط و بيفتح البطن
هو بيفتح البطن من هنا
و ابو احميد الارض لفت بيه
و اغمى عليه ابو حميد
و اخر حجه سمعتها قبل مروح في الغيبوبه بابا بيقول طلعوا الواد ده بره
و العاملات و التمريض بيفوقوني و انا هاتك يا ترجيع و قرف
و لما فقت سمعت بابا بيهزر و بيضحك عليا و الواد الخرع و هيبقى دكتور ازاي ده
و دكتور التخدير هاتك يا تريقه
لما بابا خلص قعد معايا و قالي دي حاجه كل الدكاتره مرت بيها نادر لما تلاقي دكتور ماغماش عليه اول مره
تاني مره كانت عاديه و دلوقتي و انا في سته طب و كل ماخش اوضه العمليات التمريض و دكتور التخدير و العاملات فاكر اول مره يا دكتور احمد

انا اول يوم رحت فية الجامعة طبعا كنت زي الاهبل مش عارف حاجة في اي حاجة وكان معايا واح بس من شلتي ايام الثانوية وكان هو كمان طينة خالص المهم قعدنا نلف وندور في الكلية عشان نعرف هانروح فين شوية وربنا رزقنا بواحد رزل من بتوع سنة رابعة المسئولين عن الرحلات ومش عارف اية والانشطة الطلابية. الاخ فضل يقنع فينا اننا نشترك في المجموعة بتاعتة وهايبقي لبنا كارنية عضوية والكلام دة بس ندفع لة 3 جنية وصورة شخصية، وفعلا احنا زي الهبل دفعنا الفلوس وبعد ساعة جالنا الكارنية ومن ساعتها ادي وش الضيف ولا شفت الولد دة تاني حتي اخر سنة في رابعة تربية لم اراة قط كانة فص ملح وداب.

الموقف التاني اللي حصل في حياتي اني بعد ما اتخرجت من كلية التربية قسم لغة انجليزية لسة ما كنتش اتعينت في الوزارة. المهم اخويا صاحب الموجة العام بتاع اللغة الانجليزية في البلد فقالة عاوز اخلي محمد (انا يعني) يشتل بالاجر وهو يتسلي لحد ما يتعين. المهم الراجل ما اتاخرش وجاب لي مدرسة تجاري مشترك. رحت اول يوم اعطوني فصول 3 ثانوي تجاري كلها لاني كنت الوحيد المتخصص لغة في المدرسة. اول ما دخلت الفصل لاقيت ما شاء الله شباب اطول مني وبنات علي وش جواز بل يمكن كان فيهم بنات متجوزة ومخلفة. المهم اول يا هادي الاقي تسبيلة، ابتسامة، ورد في دفتر التحضير، وكلام من دة والعيال الصبيان قاعدين هايموتوا مني تخيلوا ان بنت منهم ابدت اعجابها بالقميص اللي كنت لابسة (اسف لو كلامي فية حاجة خارجة). المهم انا بقي عاوز انهي الليلة علي خير فبدات اشتغل واشرح لهم وطبعا كل اللي قاعدين بهايم ( اعزكم الله). تاني يوم دخلت فلاقيت شوية عيال صبيان عاوزين يقلبوها ضحك ولعب من غير شغل، فوقفت شوية انظر لهم بغضب لحاد ما انكتموا خالص. قومت واحد منهم وطلبت منة يقرا، لاقيت الواد بيقولي (ماعرفش وكمان ما عنديش كتاب) طب اللي جنبة يقرا (نفس الرد). رحت مطلعهم موقفهم جنب باب الفصل وفي غمضة عين رحت ماسك الباب ورازعة فيهم من ورا راحوا مرميين علي الارض وانا بالشلاليت والبونيات راحوا قاموا وهاتك يا فكيك وانا وراهم ورحت ناطط السور زي العيال الصغيرة وطيارة وراهم في الغيطان.

من ساعتها بقيت اسمي الاستاذ الفتوة في المدرسة ادخل الفصل كلة قاعد زي الكلاب

- أول يوم في ابيتدائي فاكروا كنت ثابت بس من كتر عياط الأولاد حواليا ابتديت أدمع فلاقيت البنت اللي جنبي بتبتسم و بتمسك إيدي و أبويا فرحان علشان بيتهديني
قلت فنفسي (البنت دي عبيطه و لا إيه ما هو كل الولاد بيعيطوا . . عادي يعني).
- أول يوم في الكلية كنت فرحان جدا و كنت عايز و انا راجع أعدي علي الوالد و أوريلو الأهمية اللي ابنه فيها و معايا المسطرة T و جالي اسهال و من الكلية للبيت علي الحمام علي طول.
- أول يوم في الجيش . . . بلاش أحسن

المشاركة الأصلية كتبت بواسطة turboman

اول مرة شفتها كنت راكب الاوتوبيس و رايح الكلية و تاني مرة كانت بعدها في المدرج و دلوقتي بعد مرور 10 سنين .........هي تبقى زوجتي ام عمر و باسل ربنا يشفيها يا رب

يا رب يشفيها و يخليها ليك و لولادها.. اللهم تقبل يا رب.