اقتباس المشاركة الأصلية كتبت بواسطة yousef1978 مشاهدة المشاركة
والله يا جماعة أنا بأستغرب جدا من ناس بتتلون بطريقة عجيبة

يعني الدكتور يحي الجمل ونجيب ساويرس والدكتور أبو المجد وغيرهم كانوا أكتر ناس بيطالبوا المتظاهرين بإنهم يكتفوا بهذا القدر في كل مرحلة من مراحل الثورة

وأكتر ناس كانوا بيروجوا إن لابد من إحترام الرئيس والحفاظ على كرامته لأنه رمز مصر وكانوا بيرفضوا بشدة مطالب الناس اللي عايزه محاكمة سيادة سمو الرئيس

ولما حسني مبارك فال إنه هيعمل لجنة لتعديل الدستور
يحي الجمل والباقيين على قنوات او تي في والحياة هللوا وقالوا كدا وصلنا لكل مطالبنا وكفاية لغاية كده وأهم شئ هو إلغاء المادة ستة وسبعين والريس مش هيعدل المادة دي لكن هيعدل كمان خمس مواد وده يكفي جدا لضمان حياة سياسية وإنتخابية نزيهة

ودلوقتي نفس الأشخاص بيضغطوا بكل صور الضغط من أجل إلغاء نتيجة الإستفتاء وأن يكون الدستور اولا وتعيين مجلس رئاسي يعني نقول للجيش ارجع ثكناتك وسيبنا إحنا نتعامل مع الشعب براحتنا ونحجم الإسلاميين وبعد ما نظبط البلد حسب أهواءنا وأفكارنا نبقى نعمل إنتخابات نيابية ورئاسية

خلينا نتكلم بصراحة شوية

فيه ناس دلوقتي عاملين نفسهم وطنيين وأحرار وحكماء وهم أكتر ناس استفادوا من عصر مبارك - ولازم نحط تحت الكلمة دي عشرين مليار دولار خط لأن مبارك ما كانش بيحدف كتاكيت وخلاص - والناس دول رغم وقوفهم في صف مبارك وتأليهه وإن مبارك أبونا وأمنا ولازم إحترام رمز الدولة التعيسه الأشخاص دول مش عايزين البلد تهدا وييجي فيها ناس عندهم نزاهة سواء كانوا إسلاميين أو غيره لأن الجميع عارف إن الإسلاميين لن يمثلوا أكثر من خمسة وعشرين في المائة من مجلس الشعب ولجنة الدستور الجديد يعني باقي أعضاء مجلش الشعب الخمسة وسبعين في المائة واللي هيكون في إيديهم الدستور الجديد والتشريعات الجديدة والإشراف على البلد ومحاكمة الفاسدين هيكونوا غير إسلاميين لكن بالتأكيد أغلبهم وطنيين وعندهم نزاهة ولا أحد فوقهم غير الله ثم الشعب اللي لسه ما نامش والثورة مازالت تجري في دمه

وده مش في مصلحة الفئة المليارية دي

وعلشان كده بنشاهد لأول مرة في التاريخ ناس بيدعوا الوطنية والديمقراطية وبيطالبوا بتأجيل إنتخابات نزيهة - وبيطالبوا بتعيين مجلس رئاسي - وبيطالبوا بإعداد دستور جديد من خلال مؤتمر يتحكم فيه مجموعة لا تمثل الشعب - وبيطالبوا بضمان عدم تمثيل أي جماعة أو مجموعة لا تأتي على هواهم

الفئة دي عايزه تصورلنا إن مصر بعد ما وقفنا السرقة والنهب هتنهار إقتصاديا وهتفلس
والثورة هي السبب في أزمة البوتاجاز اللي كل سنة بتتكرر
والثورة هي السبب في الإنفلات الأمني
ووووو

خلونا نحد الأمور عند نصابها ونتكلم بكل وضوح

ويا ريت نشوف على اليوتيوب فيديوهات تمثل مراحل التطور والتلون لهؤلاء الأشخاص

وتحياتي للجميع
+111111111111

والله العظيم يا أخي الفاضل ، أنا كنت من الناس اللي لا بتحب ولا بتكره الإخوان ، بل كنت بنتقد بعض التصرفات من بعض المنتمين لجماعة الإخوان ، لكن فعلا حبيتهم بعد الهجوم الشرس الغير مبرر سواء من الناس أو الإعلام.

ببساطة الأحزاب الليبرالية خايفين ، بل مرعوبين من الإخوان ، لأن لو حضرتك تفتكر الإخوان خدوا كام مقعد في 2005 بالرغم من التزوير والاعتقالات ... فما بالك في انتخابات نزيهة هيعملوا ايه؟ يا جماعة هم ما خدوش شعبية بالسلاح ولا نزلوا أجبروا الناس تنتخبهم عافية... الناس دي ليها أنشطة كتير وخدمة فقراء ومساكين وعلاج مجاني وتقديم دعم للشباب ، وشوفوا المحافظات التانية الإخوان شغالين ازاي... يا ريت الأحزاب الكرتونية التانية تعمل ربع اللي بيعمله الإخوان وساعتها هيلاقوا شعبية ممكن ينافسوا بيها الإخوان
ملحوظة : أنا لست من الإخوان

تقبل تحياتي