الموضوع: تفاصيل صيانة ال 60 في مركز عصام - صفا

يوم الثلاثاء اللي فات رحت لمركز عصام - صفا علشان اعمل صيانة ال 60 لعربيتي البرسونا 2010 العداد كان عامل 62400 قبلها بيوم رحت علشان اجيب فلتر البنزين و الهواء و الزيت و التيل الامامي و البوجيهات , من عند مكة جبت البوجيهات بوش ب 50 جنيه و فلتر زيت ب 25, و فلتر البنزين جبته بتاع نوبيرا ب 45 من واحد جنب مكة بشوية , محل المدينة جبت فلتر الهواء بوش ب 100 و كلبسات العتب , الواحدة بجنيه , بالنسبة للتيل الامامي جبته من المحل اللي جنب المدينة و نوعه مايلي ب 160 , و طبعا الزيت شيل 5000 ب 118 ,


يوم الثلاثاء رحت لمركز عصام - صفا و كان مطلوب الاتي :
1- صيانة ال 60
2- تغيير مياه الردياتير
3- لمبة تابلوه اللي في الكشاف اتحرقت
4- كان عندي صوت بيطلع من درج التابلوه
5- صوت من تيل الفرامل الخلفي و انا برجع مارشيدير
6- السنتر بتاع الباب الامامي شمال بيفتح لوحده

وصلت الساعة 10.30 دخلت العربية علطول
- كله ركب , فلتر الهواء و سير الادارة و سير الكاتينة و بلية الكاتينة و مياه الردياتير اتغيرت و اللمبة اللي كانت محروقة , و تربيط العفشة و علاج صوت التيل الخلفي , و المهندس عصام راجل محترم اوي بصراحة و كل اللي شغالين هناك , قالي ان التيل الامامي مش محتاج يتغير , و قالي ان فلتر الزيت اللي انا جايبه مش حلو و خايف ان هو ينزل زيت , المهم جبت من عنده فلتر زيت تاني و ركبناه , و طبعا الاصوات اللي كانت موجودة اتحلت و السنتر اتظبط و كله تمام


المهم و انا هناك سمعت صوت في العربية غريب اوي زي مايكون مركب تربو , طلع ان الماننفولد باظ و عايز يتغير و ان البوابات بتاعته فيها حاجة و ده بكام؟؟؟؟؟؟؟ 4500 جندي , المهم المهندس عصام قالي مش لازم يتغير و لو عايز هاته من الحرفيين بس هيبوظ بعدها بشهرين , قلتله خلاص مش لازم ,

و بعدها العربية نزلت زيت فتيس فعرفت ان ده اويل سيل كوبلن , غيرت الاتنين ب 80 جنيه و طبعا جبت زيت باور ب 35

بعدها العريبة جابت بلية شداد و البلية دي ب 1500 جنيه و طبعا ماغيرتهاش و العربية عمالة تصفر من ساعتها و البلية البايظة بتطلع صوت غبي

و اخر حاجة غيرت فلتر التكييف ب 176 جنيه علشان كان انتهي خلاص

الليلة دي كلها خلصت علي الساعة 4

و دفعت الاتي :
176 - فلتر تكييف
35 - زيت باور
80 - اويل سيل كوبلن
10 - 2 لمبة بدون كعب
65 - مياه ردياتير
140 - سير ادارة
314 - سير كاتينة
357 - بليه كاتينة
35 - فلتر زيت
396 - صيانة 60000 اجمالي المصنعية
39 - ضريبة مبيعات 10% علي اجمالي المصنعية
121 - ضريبة مبيعات علي اجمالي قطع الغيار
88 - خصم خاص

1680 - المجموع

و طبعا انا جبت فلتر هواء و بنزين ب 145
تيل - 160
بوجيهات - 50

المشاركة الأصلية كتبت بواسطة ahmad alshaaer

مبروك عليك الصيانه

وربنا يكرمك ويديلك الخير

الله يبارك فيك ,

المشاركة الأصلية كتبت بواسطة mohamed_sabry

السلام عليكم و رحمة الله

بص يا صديقى انا مش عاوز اخوفك بس هاقولك على حاجة بخصوص المانيفولد ده
واحدة زميلة فى الشغل معاها هيونداى فيرنا ، كانت راكنة العربية فى المطار و جات تدور العربية قام حصل انفجار رهيب فى الموتور و الدنيا اتقلبت فى المطار ( افتكروها قنبلة ) ، المهم شالوا العربية ودوها التوكيل طلع ان المانيفولد ده كان بايظ و انفجر ، و كانت تكلفة تغييره فى الفيرنا برضه اكتر من اربعة الاف ، مع العلم انه بلاستيك فى الفيرنا .
انا باحكيلك الحكاية دى علشان تتأكد انه عندنا فى بروتون غير قابل للانفجار و الكلام ده بما انه بايظ عندك .
ربنا يستر طريقنا جميعا .

ربنا يسترها , و علي العموم انا مابحبش اسيب حاجة بايظة في العربية , هحاول كل شهر اشيل مبلغ و هاجيب مانيفولد جديد و امري لله