سيريون ولا تيريوس

**mornbeam** · 23-04-2008 01:14 PM

يا جماعة أرجو منكم المشورة ..

أنا بحب أوي السيارة التيريوس .. جداً يعني .. بموووت فيها ..

المهم .. أنا كنت قررت أني أشتري سيارة سيريون 150 سي سي بالقسط ..

بس بعد كده قررت أني أشتري التيريوس الهاف أوبشن .. ب 119 ألف .. بس سعقت بعد ما عرفت الحاجات اللي ناقصة فيها .. مثلاً .. الكاسيت الأصلي (مش عارفة سعره كام) .. الجنوط (9 ألاف).. الفانوس الأمامي المفروض فيه 2 لامبه .. الهاف أوبشن فيه لامبة واحدة بس ..

وأنا مش فارق معايا ال 4*4 أصلاً .. وسرعتي مش هتزيد على 100 كم ..

و للعلم .. لما قررت الأول أجيب سيريون .. كنت عاملة حسابي أجيب السيريون وبعدها التيريوس .. إيه رأيوكوا ..؟
أجيب التيريوس على طول هاف أوبشن .. وأبقى أكمل الحاجات اللي ناقصة بعد كدة .. ولا أخليني في السيريون وخلاص ..

**mornbeam** · 23-04-2008 01:15 PM

مع العلم .. إن فيه رفهيات تانية كثير مش موجودة .. بس أنا ذكرت أهم الحاجات اللي مش موجودة ..

**SEATLOVER** · 23-04-2008 01:28 PM

لا طبعا توكلى على الله فى التيريوس وكل الحاجات الناقصة دى و غيرها ممكن تعمليها بعد كدة براحتك

**أبو عبدالله** · 23-04-2008 03:54 PM

ده بيعتمد عليك انت

يعني التيريوس عجباك يبقى اشتريها علشام متجيش تقول بعد كده يا ليتني

**mornbeam** · 23-04-2008 04:24 PM

المشاركة الأصلية كتبت بواسطة SEATLOVER

لا طبعا توكلى على الله فى التيريوس وكل الحاجات الناقصة دى و غيرها ممكن تعمليها بعد كدة براحتك

أيوة بس فيه حاجة مهمة في التريوس الهاف أوبشن .. مفيهاش فرامل ABS
هل ديه حاجة شديدة الأهمية .. مع الأخذ في الإعتبار إن أنا لا يمكن أعدي ال 100 كم في أي حال من الأحوال ..

في حين .. إن السيريون فول أوبشن .. وفيها كل حاجة ..

يبقى كده .. التيريوس أفضل لأنها كبيرة وأشيك وأنا حباها أكثر .. ولا السيريون لأنها كاملو وأكثر أمان؟

**أبو عبدالله** · 23-04-2008 06:19 PM

بصراحه هيا الأوبشن تستاهل بجد
خصوصا الـ Abs , Ebd

فعلا بتحس بالأمان خصوصا لو على رمل او ميه لما تيجي بضرب فرامل بتحس بالأمان لأن العربيه مش هتتزحلق
ده غير الجنوط وباقي الكماليات

**SEATLOVER** · 23-04-2008 07:17 PM

هل ديه حاجة شديدة الأهمية .. مع الأخذ في الإعتبار إن أنا لا يمكن أعدي ال 100 كم في أي حال من الأحوال ..

دى من ضمن الحاجات القليلة قوى اللى بختلف فيها مع اخويا و حبيبى ابو عبد الله
انا رآيى انها مش مهمة ..على الاقل فى ظروفك انتى بالذات

**hazem_khidr** · 24-04-2008 04:15 AM

اتي العربيه اللي ترتاحي لشكلها علشان ما تندميش
السيريون حلوه و التريوس حلوه ف اختاري انت
اما بالنسبه لل abs و ال ebd
ما اعتقدش ان ليهم لازمه بالنسبالك لان شكل سواقتك هاديه
و بعدين يا ستي ما احنا بقالنا كام سنه بنسوق من غيرهم ما حسيناش بفرق.
السواق الصح بيعرف يسيطر علي عربيته و ما بيحتاجش الحاجات دي