| تسجيل عضوية جديدة | استرجاع كلمة المرور ؟
Follow us on Twitter Follow us on Facebook Watch us on YouTube
صفحة 1 من 4 1 2 3 4 الأخيرةالأخيرة
النتائج 1 إلى 10 من 35

  1. #1

    الصورة الرمزية Amr Axel

    رقم العضوية : 41844

    تاريخ التسجيل : 04Jun2009

    المشاركات : 8,706

    النوع : ذكر

    الاقامة : في بيتنا

    السيارة: هوندا سيفيك / بي ام دبليو 316i

    السيارة[2]: سوزوكي التو / رينو لوجان

    دراجة بخارية: جاية في الطريق

    الحالة : Amr Axel غير متواجد حالياً

    افتراضي تعالوا نعرف انواع الحرايق و الطفايات و كيفية استخدامها - Facebook Twitter whatsapp انشر الموضوع فى :

    hasad">

    بسم الله الرحمن الرحيم
    السلام عليكم و رحمة الله و بركاته


    استكمالا لسلسلة أكسل و ضميره ( مين بينده ... يا ريتني افتكرت ربع جنيه كان هيبقاله فايدة عنك )

    و سلسلة تعالوا نعرف اللي زهقتكم بيها من ساعة ما دخلت المنتدي ( يبني انت تزهق بلد مش المنتدي بس ... يبني انت برده محرمتش من العلقة اللي فاتت )

    اقدملكم شرح مفصل لأنواع الحرايق و انواع الطفايات و كيفية استخدامها مع كل حريقة


    اولا : انواع الحرائق

    قبل ما نعرف الانواع لازم نفهم الأول ايه هو الاحتراق او الاشتعال
    الاشتعال او الاحتراق في الأصل هو التفاعل الكيميائي الذي بيحصل بين مادتين هما وقود ( مادة قابله للاشتعال يعني ) ومساعد على الاحتراق ( أوكسجين , الحرارة). ( طب ايه اللي جاب انواع الحرائق للاشتعال ...انت لسه موجود )

    و بتنقسم الحرائق بحسب مصدر اشتعالها لـ6 فئات هم :

    فئة ( A ) حرائق المواد الصلبة : وهي التي تنشأ عن المواد زي :( الخشب ، والمنسوجات ، وورق الكرتون) ، والمواد التي أساسها تشكيلها ذرة الكربون.

    فئة ( B ) حرائق المواد البترولية : وهي الي بتنشأ عن السوائل البترولية القابلة للاشتعال زي الكيروسين و البنزين. ( مش البنزين ده بتاع المولوتف يا اكسل ... أيوة هبقي احطك في ازازة منهم عشان اخلص منك )

    فئة ( C ) حرائق الكهرباء : وهي التي تنشأ من مصادر الكهرباء زي الماس الكهربي .

    فئة ( D ) حرائق المعادن : وتحدث في المعادن القابلة للاشتعال مثل ( الماغنسيوم ، والصوديوم ، والبوتاسيوم) .( خدتها في الكيمياء في ثانوي .....يعني مش فاكر غير الثانوية يا فقري افتكرلنا حاجة عدله )

    فئة ( H ) حرائق الغازات : وهى اللي بتنشأ من الغازات القابلة للاشتعال المختلفة( مثل غاز الميثان ، الايتان ، والبوتان ......الخ) ( بتاع الانابيب .... لا بتاع الكشري دمك بقي يلطش المرة ديه اهدي بقي بدل ما الاعضاء يجروا ورايا مانا اللي هضرب مش انت )

    فئة ( k ) حرائق المطابخ و المطاعم : و ديه اللي بتنشأ عن طريق احتراق الدهون و الزيوت في المطابخ و المطاعم و طبعا خطر


    ثانيا : تركيب الطفايات


    جسم الطفاية : هو الجسم المعدني اللي بيحتوي مواد الإطفاء.
    الخرطوم : هو الجزء اللي بتمر فيه مواد الإطفاء من جسم الطفاية لحد القاذف.
    ( اللي بيرش يعني المادة .. اخرس ياض )
    في بعض الطفايات الصغيرة مش بيبقي فيها خرطوم
    مسمار الأمان : هو حلقة معدنية اللي بتثبيت دراع التشغيل، والي بتمنع انطلاق مواد الإطفاء نتيجة الضغط غلط على دراع التشغيل.
    مقبض الحمل : هو الجزء المعدني الثابت الذي بيتمسك منه الطفاية.
    دراع التشغيل : هو الجزء المعدني الالمتحرك اللي فوق المقبض الحامل ، وهو أداة تشغيل الطفاية وإطلاق مواد الاطفاء.
    مقياس الضغط : هو الجزء الذي بيبين اذا كانت الطفاية صالحه و لا غير صالحة و ده بيبقي موجود في طفايات الماية و المواد الكيميائة

    و عشان نعرف اذا كانت صالحه و لا لأ نبص ع المقياس لو المؤشر في المنطقة الحمرا سواء يمين او شمال يبقي الضغط مش مظبوط يعني عالي او واطي لو المؤشر ع المنطقة الخضرا يبقي الضغط تمام التمام
    اما بالنسبة للطفاية اللي فيها ثاني اكسيد الكربون فديه بنعررف صلاحيتها عن طريق الوزن و الصيانة



    ثالثا : انواع الطفايات و كيفية استخدامها

    قبل ما اقول الانواع عايز اقولكم الاول اسس الاطفاء:

    1- عند استخدام أجهزة الإطفاء لازم نختار مكان قريب من الحريق بحيث يكون الموقع أمن بحيث يسهل منه اننا نرجع عند اللزوم ، والاحسن أن يكون قريب قدر الامكان من الأبواب أو المخارج ، وإذا كان الحريق خارج المبنى فلازم يكون مكان أجهزة الإطفاء أعلى مستوى الريح . ( ينفع اعلي من مستوي نهر النيل ... بس ياض مش ناقصين فيضان كفاية البركان اللي في التحرير)

    2- يعتبر لما الشخص يوطي و هو بيطفي أفضل لأنه بيكون قريب من قاعدة الحريقة .

    3- متقفش عكس اتجاه الريح و انت بتطفي النار ( طب و فيها ايه لما اقف في وش الريح اهو منه هوا و منه عشان محدش يقول علينا عيال بتتهز .... نفسي يا اخي تقف فعلا و يكون في حريقة عشان اخلص منك )

    3- لازم تتأكد ان النار اطفت تماما و الحتة اللي كان فيها الحريقة حرارتها هديت و الا هترجع تولع تاني . ( متقول لنفسك يا فالح مش انت اللي قولتهم في اللجان الشعبية يسيبوا الكاوتش اللي كنتوا موالعينه ميطفهوش كله و يحطوا عليه شوية رمل... عشان اليوم اللي بعده تولع بسهولة من غير قرف يا غبي يا دوب نقلبها هتولع تاني)

    نيجي بقي للأنواع و جنب كل اسم طفاية كات فئة الحريقة اللي بتستخدم فيها

    1- طفاية الماية المضغوطة ( A )


    هي عبارة عن أسطوانة متعبية بالماية تحت ضغط غاز خامل ، و بنستخدمها لإطفاء حرائق الأخشاب والأوراق والنسيج والبلاستيك .. بس خلي بالك .. اوعي تستخدم النوع ده عشان تطفي حرائق الأجهزة والمعدات الكهربائية المتوصلة بالتيار الكهربائي الحي أو حرائق الزيوت والشحوم أو المعادن.
    وطفاية الماية شغلتها انها تخفض درجة حرارة المواد المشتعلة.

    الاستخدام : توجه الماية المندفعة من الطفاية أسفل اماكن النار و تغير الاتجاه في جميع المساحة المشتعل فيها النار ، ولازم تراعي انك تغرق الأجزاء السخنة بالماية بعد ما تطفي الحريق وفى حالة الحرائق التي تنتشر فى اتجاه عمودي فلازم تطفي من تحت لفوق . ( طب ما اطفي من فوق لتحت عشان ابقي سيطرت ع الولعة و يسموني عمرو سيطرة ....بس ياض دول كده هيقولوا عمرو جاهل مش عمرو سيطرة)

    2- طفاية الرغوة( B )


    اسطوانة متعبية بالماية ومواد عضوية بتنتج الرغوة ( بتاعت الكابشتينو اللي بيعمل شنب و تيجي البت تقولك امسح شنبك صح .... لا بتاعت الجيران اتنل اسكت و سيبك من شغل الافلام العربي ده بقي خليني اعرف اشرح للناس ) وبنستخدم الطفاية ديه عشان نطفي حرايق الزيوت والبترول والشحم والأصباغ .. بس خلي بالك لتاني مرة ( يا عم خضتني كل شوية خلي بالك ايه الموضوع هينفجر ... اخرس) .. اوعي تستخدم الطفاية ديه مع حرائق التجهيزات الكهربائية المتصلة بالتيار الكهربائي الحي
    و طفاية الرغوة ديه شغلتها انها تعمل عزل لسطح المادة عن الأكسجين والتبريد لأن الماية يتحاوطه.

    الاستخدام: في حالة ان في سائل ما مشتعل جوة برميل اهم حاجة توجه الرغوة إلى الجدار الداخلي يعني من الاخر بتحوط السائل ( يعني بتعمل كوردون ... الكوردون ده بتاع الشرطة و الجيش يا اهبل) فوق مستوى السائل ده عشان الرغوة تتكون وتنتشر فـوق سطح السائل ده ،
    لو بقي السائل المشتعل ده مش في برميل او مكان ضيق ممكن ترمي الرغوة فوق النار بحيث انها تنزل ع السائل مباشرة ( باراشوت يعني ... فكرني ابقي انا و انت نروح طالعة و ارميك من غير الباراشوت ) و بكده الرغوة تستقر وتعمل طبقة متماسكة ، و اوعي توجه الرغوة مباشرة على سطح السائل لان ده هيخلي الرغوة تنزل تحت سطح السائل المشتعل و بالتالي مش هتبقي مؤثرة بالاضافة ان ممكن السائل يترتش في اماكن تانية و تبقي مصيبة و انا مس مسئول.

    3- طفاية ثاني أكسيد الكربون ( B&C )


    اسطوانة متعبية غاز ثاني أكسيد الكربون بيتم ضغطه وبنستخدمه عشاط نطفي حرايق الزيوت والشحوم والأصباغ والسوائل سريعة الاشتعال ( زي طفاية الرغوة B) بالإضافة إلى حرايق الأجهزة الكهربائية( الفئة C ) .

    و طفاية ثاني اكسيد الكربون شغلتها انها بتخلي غاز ثاني أكسيد الكربون يخنق اللهب وتبرد درجة الحرارة .
    استخدمها : نفس اسس الاطفاء و اهم حاجة اوعي تيجي عسكي اتجاه الريح و توجه لقاعدة اللهب و ده لأنها بتبقي ضعيفة التأثير في الهواء الطلق و بتتأثر من اي ريح و زي ما بيقولوا بتتبدد و تذهب مع ادراج الرياح ( لا بتذهب في ادراج المكتب.... استغفر الله العظيم )

    4- طفاية المواد الكيماوية الجافة ( D )


    أسطوانة متعبية بالمواد الكيماوية الجافة و المواد ديه (فوسفات الامونيوم الاحادي او ثاني كربونات البوتاسيوم او ثاني كربونات الصوديوم ) و بيتم ضغها بغاز النيتروجين ( مش ده اللي بيخلي العربية تجري لما ندوس ع الزر ... لا ده اللي بنملي بيه الكاوتش يا جاهل )
    و بنستخدمها عشان نطفي حرايق الكحول والبترول والأصباغ والمواد سريعة الاشتعال والمعادن ( ماغنسيوم - صوديوم - بوتاسيوم ) ،

    و شغلتها انها بتعمل عزل لسطح المادة المشتعلةو بالتالي بتقضي عليها.

    5- طفاية المطابخ والمطاعم ( K ) :
    ( ياراجل و ديه يا تري بقي جواها دقيق ولا سكر .. لا جواها رز يا لمض اسمع و انت ساكت )

    اسطوانه متعبية بحمض خلات البوتاسيوم , ستيرات البوتاسيوم و بنستخدمها عشان نطفي الحرايق اللي بتحصل في المطابخ و المطاعم واللي الحريقة فيها بتكون حريق الدهون والزيوت .
    و ديه شغلتها بقي انها بتختلط بالبخار اللي طالع من حريق الدهون و الزيوت و تعمل رغوة تقضي عليها
    الاستخدام : توجه المادة لسطح الدهون أو الزيت بحيث تندمج المواد مع البخار و تعمل رغوة صابونية تعزل النار و تطفيها

    6- طفاية الهالون
    (A&B&C&D&K ) :

    و ديه محدش بيستخدمها لأن النوع بتنتج عنه أبخرة سامة وبتأثر على مستخدمها خصوصا في الأماكن المغلقة .لأنه على قاعدة من الكلور والفلور والبروم وكلها غازات سامة.
    و طبعنا مننساش لما من كام يوم حصل تسريب لغاز الكلور في مكان تبع المية و اتخنق فيها عاملين تقريبا لو بتابعوا الجرايد كنتوا هتشوفها في الحوداث
    و لو حد شاف مسلسل the unite علي ام بي سي اكشن من حوالي اسبوعين او اكتر كان في حلقة جابت ان في مجموعة ارهابيين عملوا تسريب لغاز الكلور من محطة المية و ناس كتيير اتخنقت و ماتت منه فهو ده اللي بيحصل فعلا في الحقيقة من غاز الكلور و الغازات المشابهة
    ( ايوة يا عم اعمل اعلان تلاقيهم مكيشنك قرشين حلوين عشان تجيب سيرة الفيلم .. يلا يا يبني روح العب ع جنب )

    و بالرغم ده المواد اللي في طفاية الهالون بطفي كل أنواع الحرايق كويس جدا (A&B&C&D&K ) . لكن للأسف خطر

    الاستخدام : في حالة حدوث حرائق بعبوات تحوى سوائل قابلة للالتهاب أو عندما تنسكب هذه السوائل فوق الأرضيات يراعى توجيه المطفأة ( المسحوق الجاف- ثاني أكسيد الكربون- أبخرة السوائل المخمدة ) تجاه اقرب طرف للنيران ثم تجرى عملية كسح سريعة في اتجاه أبعد طرف وتعاد هذه الحركة حتى يتم إطفاء الحـريق ، أما إذا كان الحريق في سائل يتساقط من مستوى مرتفع فيجب توجيه المطفأة إلى أسفل نقطة ثم تحريكها بسرعة إلى أعلى .

    وعند حدوث حريق بأجهزة وتركيبات كهربائية توجه المطفأة في اتجاه مستقيم ناحية الحريق ، وعندما تكون التجهيزات الكهربائية مغلقة داخل جهاز فتصوب المطفأة في اتجاه الفتحات الموجودة بجسم الغلاف حتى يمكن نفاذها إلى الداخل.

    في حاجة اخيرة بقي احب اذكرها و لو انها مش تبع الطفايات لكن تعتبر من ضمن وسائل الاطفاء و هي :

    - بطانية الحريق:


    و بطانية الحريق ديه بنستخدمها في المطابخ والاوض و الورش
    و بتكون مطبقة جوة علبة معدن و لو حد اتفرج ع فيلم Resident Evil الجزء التاني هيلاقها البطلة خدت بطانية لونها فضي من علبة معدن لونها احمر تداري فيها هي و الاتنين التانين من النار اللي ولعت في المطبخ ( مش بقولك تلاقيهم مكيشنك قرشين حلوين عشان تجيب سيرة الفيلم .. غور ياض بقي بدل ما اتجنن عليك )

    الاستخدام : بتسحب البطانية من العلبة وتفتحها كلها وتغطي بيها الحريق عشان ننمنع الأكسجين عن النار عشان متزدش . و لازم نغطي الحريقة من فوق بشكل كامل عشان مفيش اكسجين يوصلها و ديه عبارة عن عملية اختناق للحريقة. ( زي اللي بيتخنق لما يغرق في المية ... يا ساتر يا رب ده انت اللي فعلا محتاج تغرق )

    جردل الحريق


    و في هنلاقي في بعض البنزينات جرادل معدن فيها رمل لونها احمر و ديه مفيدة في حالة ان الحريقة تبع ماس كهربي
    و قبل كده ولع عندنا عامود نور و مسك في اللي بعده و الارض اتمرمتت كان فعلا المعني الحقيقي للماس الكهربي و لأننا من سساكني المناطق الجديدة جبنا الرمل بسهولة و طفناها الحمد الله

    طبعا في وسائل تانية للاطفاء لكن مش موضوعنا دلوقتي لأن موضوعنا بيتكلم ع الوسائل اليدوية البسيطة

    رابعا : الفحص و صلاحية الطفايات

    اولا لازم تكون متابع دايما صلاحية الطفاية زي ما شرحنا فوق
    ثانيا لازم تعمل صيانة للطفاية كل 6 شهور - سنة
    ثالثا تغيير المادة في الطفاية مرة كل 5 سنوات

    و بما اننا اتعلمنا دلوقتي مكافحة الحرايق
    يبقي لازم نتعلم الاسعافات الأولية
    اتفضلوا لينك الموضوع اللي فيه الاسعافات الأولية

    http://www.nilemotors.net/Nile/215805-a.html

    بس كده

    و اتمني ان ميكونش ضميري زهقكم بس عشان عراف انه غلس انهاردة بس اظاهر الحر مأثر عليه
    هعمل ايه هيفضل ملازمني طول الوقت
    ( هو انا هسيبك وراك لحد ما تقول حقي برقبتي )
    بعد اذنكم بقي لأن شكلي هديله علقة موت
    ( الفيلم الفاشل ده لا بلاش خلينا في سماك داوون ع ام بي سي اكشن ...و بتهرج تاني ماشي يا عم جون سينا تعالي بقي ورينا نفسك )



    الموضوع غير منقول
    و هو اجتهاد شخصي


    و بالتوفيق ان شاء الله


  2. #2

    الصورة الرمزية beshomilan

    رقم العضوية : 83749

    تاريخ التسجيل : 18Dec2010

    المشاركات : 2,361

    النوع : ذكر

    الاقامة : ZAMALEK

    السيارة: /////////

    السيارة[2]: Hyundai Excel 1500

    دراجة بخارية: نفسى

    الحالة : beshomilan غير متواجد حالياً

    افتراضي -

    موضوع جميل ورائع بجد..تسلم ايدك


  3. #3

    الصورة الرمزية A.Saad

    رقم العضوية : 25216

    تاريخ التسجيل : 15Nov2008

    المشاركات : 14,019

    النوع : ذكر

    الاقامة : Haram & My mobile phone

    السيارة: New Accent 08

    السيارة[2]: Picanto 09

    دراجة بخارية: no

    الحالة : A.Saad غير متواجد حالياً

    افتراضي -

    موضوع جميل
    واسمح لى اضيف ان الحريق بيتكون من
    مادة قابلة للاشتعال
    اكسجين
    مصدر للحرارة
    نظرية الاطفاء بتحاول تقلل او تلغى عنصر من دول زى ما Axel قال
    يعنى المياة او الرمل بتعزل الاكسجين
    ثانى اكسيد الكربون نفس الوضع وكمان بيعمل تبريد

    A.Saad


  4. #4

    الصورة الرمزية زينة الله

    رقم العضوية : 62456

    تاريخ التسجيل : 17Feb2010

    المشاركات : 1,812

    النوع : انثى

    الاقامة : مصر

    السيارة: لما نتعلم ع الأولانية

    السيارة[2]: 128

    دراجة بخارية: -

    الحالة : زينة الله غير متواجد حالياً

    افتراضي -

    شكرا على الموضوع المفيد والمهم جدا

    جزاك الله كل خير


  5. #5

    الصورة الرمزية graffittiii

    رقم العضوية : 97030

    تاريخ التسجيل : 30Apr2011

    المشاركات : 1,345

    النوع : ذكر

    الاقامة : Tanta

    السيارة: isa

    السيارة[2]: punto

    دراجة بخارية: Not interested

    الحالة : graffittiii غير متواجد حالياً

    افتراضي -

    مشكور يباشا جدا أوي خالص ...
    أنا من يوم ماأشتريت الطفاية من بفاريا وهي ف الكرتونة حتي مافتحتهاش علشان أعرف شغالة ولا لا ...
    ومكنتش عارف بتشتغل إزاي (( محاولتش يعني )) أكيد لو قعدت أدعبس فيها كنت هعرف ..
    بس مشاركتك وضحت الكتير وجربتها فعلا وشوف المفاجاة بقي :
    طلعت شغااااااااااااااااااااااا ااااااااااالة ههههههههههههههههههههههههه هههههههههههههههههههههههه.
    معقولة اللي أحنا فيه ده .. أشتريت حاجة وطلعت شغالة .. والله دا كتير عليا ...
    هي بس بنبه اللي يستخدمها ان يمسك جامد عشان هي زعلها وحش شوية ...
    وأرجع تاني وأقول مشكووووووررررررر يا axel يامهيب الركن ياجامد ..


  6. #6

    الصورة الرمزية Amr Axel

    رقم العضوية : 41844

    تاريخ التسجيل : 04Jun2009

    المشاركات : 8,706

    النوع : ذكر

    الاقامة : في بيتنا

    السيارة: هوندا سيفيك / بي ام دبليو 316i

    السيارة[2]: سوزوكي التو / رينو لوجان

    دراجة بخارية: جاية في الطريق

    الحالة : Amr Axel غير متواجد حالياً

    افتراضي -

    اقتباس المشاركة الأصلية كتبت بواسطة beshomilan مشاهدة المشاركة
    موضوع جميل ورائع بجد..تسلم ايدك
    شكرا ليك

    نورت الموضوع :)


  7. #7

    الصورة الرمزية Amr Axel

    رقم العضوية : 41844

    تاريخ التسجيل : 04Jun2009

    المشاركات : 8,706

    النوع : ذكر

    الاقامة : في بيتنا

    السيارة: هوندا سيفيك / بي ام دبليو 316i

    السيارة[2]: سوزوكي التو / رينو لوجان

    دراجة بخارية: جاية في الطريق

    الحالة : Amr Axel غير متواجد حالياً

    افتراضي -

    اقتباس المشاركة الأصلية كتبت بواسطة a.saad مشاهدة المشاركة
    موضوع جميل
    واسمح لى اضيف ان الحريق بيتكون من
    مادة قابلة للاشتعال
    اكسجين
    مصدر للحرارة
    نظرية الاطفاء بتحاول تقلل او تلغى عنصر من دول زى ما axel قال
    يعنى المياة او الرمل بتعزل الاكسجين
    ثانى اكسيد الكربون نفس الوضع وكمان بيعمل تبريد

    اولا شكرا ليك

    ثانيا : يا ريس حضرتك ضيف الموضوع كله حتي هههه

    و انا فعلا كاتب الحرارة بين قوسين انها من ضمن اللي بتساعد ع زيادة الاشتعال

    بس للأسف نسيت ازود جزء اللي بيتكلم

    عن النظريات المستخدمة في الاطفاء اعذروني بقي الحر عامل عمايله
    و النظريات ديه هي : التجويع و الخنق و التبريد
    لكن عامة بشكل مختصر

    التجويع : هو ابعاد المادة المشتعلة

    و الخنق : اللي هو حجب الاكسجين و اللي يساعد ع اشتعال النار

    اما التبريد : فهو تخفيض درجة الحرارة


    و النظريات دول اللي بيؤدوا لكسر مثلث النار ( مادة قابلة للاشتعال - اكسجين - حرارة) و الاطفاء

    و نورت يا ريس الموضوع


  8. #8

    الصورة الرمزية Amr Axel

    رقم العضوية : 41844

    تاريخ التسجيل : 04Jun2009

    المشاركات : 8,706

    النوع : ذكر

    الاقامة : في بيتنا

    السيارة: هوندا سيفيك / بي ام دبليو 316i

    السيارة[2]: سوزوكي التو / رينو لوجان

    دراجة بخارية: جاية في الطريق

    الحالة : Amr Axel غير متواجد حالياً

    افتراضي -

    اقتباس المشاركة الأصلية كتبت بواسطة زينة الله مشاهدة المشاركة
    شكرا على الموضوع المفيد والمهم جدا

    جزاك الله كل خير

    شكرا ليكي

    نورتي الموضوع


  9. #9

    الصورة الرمزية Amr Axel

    رقم العضوية : 41844

    تاريخ التسجيل : 04Jun2009

    المشاركات : 8,706

    النوع : ذكر

    الاقامة : في بيتنا

    السيارة: هوندا سيفيك / بي ام دبليو 316i

    السيارة[2]: سوزوكي التو / رينو لوجان

    دراجة بخارية: جاية في الطريق

    الحالة : Amr Axel غير متواجد حالياً

    افتراضي -

    اقتباس المشاركة الأصلية كتبت بواسطة taiwo مشاهدة المشاركة
    مشكور يباشا جدا أوي خالص ...
    أنا من يوم ماأشتريت الطفاية من بفاريا وهي ف الكرتونة حتي مافتحتهاش علشان أعرف شغالة ولا لا ...
    ومكنتش عارف بتشتغل إزاي (( محاولتش يعني )) أكيد لو قعدت أدعبس فيها كنت هعرف ..
    بس مشاركتك وضحت الكتير وجربتها فعلا وشوف المفاجاة بقي :
    طلعت شغااااااااااااااااااااااا ااااااااااالة ههههههههههههههههههههههههه هههههههههههههههههههههههه.
    معقولة اللي أحنا فيه ده .. أشتريت حاجة وطلعت شغالة .. والله دا كتير عليا ...
    هي بس بنبه اللي يستخدمها ان يمسك جامد عشان هي زعلها وحش شوية ...
    وأرجع تاني وأقول مشكووووووررررررر يا axel يامهيب الركن ياجامد ..
    يا نهار الوان ده تهريج ده اهمال ده تسيب جبت طفاية و طلعت شغالة لا حول و لا قوة الا بالله

    ههههههه أكيد يار يس ديه فيها ارواح المفروض يكونوا عارفين بيطلعوا ايه و بافاريا هي الافضل في مصر و تعتبر الوحيدة و مصنعهم في جسر السويس


    هههههه و طالما زعلها وحش يبقي اكيد ضغطها عالي شربها اي سكريات عشان تخفض الضغط هههههه

    بل شكرا ليك كل ده اكسل يا مهيب الركن يا جامد ايه اللقب الجامد ده

    معلش بس ممكن الترجمة هههههه

    نورت الموضوع يا ريس :)


  10. #10

    الصورة الرمزية ecybrarian

    رقم العضوية : 241

    تاريخ التسجيل : 26Apr2007

    المشاركات : 4,325

    النوع : ذكر

    الاقامة : المقطم

    السيارة: SPARK LITE

    السيارة[2]: Tiggo FL

    دراجة بخارية: NA

    الحالة : ecybrarian غير متواجد حالياً

    افتراضي -

    hasad">

    بارك الله فيكم..الموضوع دا مهم جدا جدا..انا مش عارف ازاي فات على كثير من الأعضاء..دا لو كان في الاجتماعي كان زمانه بقى 5 صفحات

    لا حول ولا قوة إلا بالله..متى سيموت الإهمال في مصر



 
صفحة 1 من 4 1 2 3 4 الأخيرةالأخيرة

المواضيع المتشابهه

  1. تعالوا نعرف ازاي نغير سير الدينامو
    بواسطة Amr Axel في المنتدى القــــسم التعلــــيمى
    مشاركات: 21
    آخر مشاركة: 18-02-2017, 09:00 PM
  2. تعالوا نعرف ايه هوا ال gdi .. وليه بنزين 95 الافضل ..
    بواسطة الغزالى في المنتدى كـــــيا
    مشاركات: 38
    آخر مشاركة: 10-09-2016, 12:01 PM
  3. تعالوا نعرف انواع الفتيس و الفرق بينهم و ازاي نسوق بكل واحد منهم
    بواسطة Amr Axel في المنتدى القــــسم التعلــــيمى
    مشاركات: 179
    آخر مشاركة: 24-11-2015, 03:59 PM
  4. تعالوا نعرف ايه هي العلامات المرورية و معناها
    بواسطة Amr Axel في المنتدى القــــسم التعلــــيمى
    مشاركات: 22
    آخر مشاركة: 20-03-2012, 12:53 PM
  5. تعالوا نعرف مع بعض ازاى نحافظ على عربياتنا
    بواسطة OmaR_FekrY في المنتدى المنتــــــدى العـــــــــــام للسيــارات
    مشاركات: 17
    آخر مشاركة: 27-06-2011, 05:44 PM

الكلمات الدلالية لهذا الموضوع

المفضلات

المفضلات

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك
  •  

Content Relevant URLs by vBSEO 3.6.0 PL2