مع طريق السويس ... تطلع من نقرة تدخل على دحديرة !!

**abo_lamar** · 27-05-2011 11:16 PM

السلام عليكم يا شباب

أنا واحد من الناس اللي بيعانوا الأمرين من طريق القاهرة السويس الدولي .

طبعا الناس عارفة المطب اللي قبل الكيلو 4.5 واتكلمنا عنه وعن الزحام الشديد اللي بيسببه صباحاً وانا بعاني منه وانا رايح شغلي الصبح , مش حنتكلم كمان عن التريلات و المقطورات اللي بتسد علينا الهوا والنور بالذات لما مقطورتين يمشوا جنب بعض و1000 طظ في الناس اللي وراهم , ظهرت حاجة جديدة في الطريق اللي زي العسل ده , بركة مياه عند مدخل الرحاب اتكتب علينا نعدي عليها كل يوم , طبعا العربيات والمقطورات واقفة قبلها بكيلو والله وساعات 2 كيلو وكله بيعدي عليها بالراحة ....وعطله وقرف وتأخير عن مواعيد الشغل والنعمة مفيش في الدنيا طريق بالقرف ده ... يعني الاخوة المسئولين اللي في العسل ماسمعوش عن المشاكل اللي في الطريق ده ؟؟ ماسمعوش عن بركة المياه دي ولا حاولوا يشوفوا سببها ايه ؟ والله احنا لينا الجنة

**Ashraf_Ibrahim** · 28-05-2011 09:35 AM

دي اتعملت امتى بركة المياه دي؟!
انا كنت في الرحاب من اسبوع تقريبا والحياة كانت كويسة يعني !

**A_H_M_A_D** · 29-05-2011 09:11 AM

أنا إمبارح رحت الشروق في مشوار , وكان البنزين معايا قرب يخلص , قلت مش مشكلة أمون و أنا راجع

المفاجأة بقى إني ملقتش محطات بنزين خالص على طريق السويس و أنا راجع القاهرة من الشروق , بجد طريق غريب جدا

أنا حسيت إن العربية هاتقف مني بس ربنا ستر ومونت في موبيل الميرغني على أخر لتر معايا

ده طريق الإسماعلية فيه محطة بنزين كل 5 كيلو , أنا مش عارف الطريق ده عامل كده ليه

**alaasaid** · 29-05-2011 11:01 AM

المشاركة الأصلية كتبت بواسطة a_h_m_a_d

أنا إمبارح رحت الشروق في مشوار , وكان البنزين معايا قرب يخلص , قلت مش مشكلة أمون و أنا راجع

المفاجأة بقى إني ملقتش محطات بنزين خالص على طريق السويس و أنا راجع القاهرة من الشروق , بجد طريق غريب جدا

أنا حسيت إن العربية هاتقف مني بس ربنا ستر ومونت في موبيل الميرغني على أخر لتر معايا

ده طريق الإسماعلية فيه محطة بنزين كل 5 كيلو , أنا مش عارف الطريق ده عامل كده ليه

السلام عليكم ,

كان فى بنزينة أويل ليبيا على مدخل مدينة الشروق من ناحية طريق السويس بس هى مغلقة للتجديد , و مفيش بنزينة تانية (شل تقريبا ) غير عند الكيلو 4.5 و فى بنزينة وطنية بس فى الاتجاة الاخر و انت رايح الشروق .

**A_H_M_A_D** · 29-05-2011 12:17 PM

المشاركة الأصلية كتبت بواسطة alaasaid

السلام عليكم ,

كان فى بنزينة أويل ليبيا على مدخل مدينة الشروق من ناحية طريق السويس بس هى مغلقة للتجديد , و مفيش بنزينة تانية (شل تقريبا ) غير عند الكيلو 4.5 و فى بنزينة وطنية بس فى الاتجاة الاخر و انت رايح الشروق .

أنا شفت وطنية بس فعلا كانت على الناحية التانية و عشان ألفلها كان هايبقى مشوار طويل , بس مشفتش حاجه عند الكيلو 4.5 , هو الكوبري و المطب , يمكن كانت تحت الكوبري

**massoh** · 29-05-2011 01:45 PM

بركة المياه دى كانت دايما موجودة من فترة كبيرة جدا بس كانت المياه بنسبة صغيرة بس دلوقتى اصبحت كمية المياة لا تحتمل وممكن تؤدى لحوادث كثيرة لا قدر الله...اما موضوع المطب الصناعى حد يقولى بالزمة ده كلام ينفع على طريق سريع ... هو معمول ليه؟ ممكن اعمل كوبرى أو نفق مشاة ده لو كان معمول اصلا علشان الناس تعدى الشارع بس ده طريق سريع يا ناس حرام اللى بيحصل ده ، طب احنا عارفين ان فيه مطب وحنهدى السرعة بس فيه ناس مش عارفة وفيه شباب طايش...حتعمل ايه لما تكون فى حالك وجاى طاير عليك سيارة من الباب للطاق علشان بيجرى وماشفش المطب او عمل حسابه صح والفرامل والدركسيون فلتوا....حسب الله ونعم الوكيل

**dr.hazem** · 29-05-2011 02:34 PM

لا حول ولا قوة الا بالله العلي العظيم

فكرتوني بسواقين الميكروباصات على طريق جسر السويس
في كل محطه بيقفو لحد صف رابع ويقفلو الطريق
ولو مش السواقين
المشاه اللي بيرمو نفسهم قدام اي حد ولازم تقف
مش فاهم ثقافة جسور المشاة مش موجوده ليه في البلد كلها

وللعلم بالشئ
حتى وان كانت موجوده (كمثال نفق مشاة عمارات العبور صلاح سالم)
هتلاقي الناس برضو بتعدي من صلاح سالم مع انه طريق سريع (المفروض)

في البلاد اللي جنبنا (الاردن والسعوديه مثلا)
بيتعمل جسر المشاة في الشوارع الخطره على المشاة وبيتعمل اكثر من واحد
وعشان يضمنو ان الناس متعديش من الشارع بيحطو سياج بين الطريقين

فياترى ناويين نتطور امتى؟؟؟

تحياتي