مطلوب المساعدة....ازاي ادفع رشوة
السلام عليكم ورحمة الله وبركاته
انا بقالى يومين عايز اجدد رخصة العربية في مرور السلام وبكرة اليوم التالت وده لأني مش بعرف ادفع رشوة او بستحي اني ادفع رشوة كنت فاكر ان الموظفين اتغيروا مع الثورة او اخلاقهم اتغيرت ...لكن تقريبا الثورة طلعت نتايجها وقتية غير سارية المفعول...ويمكن فيه ناس موصلهاش ان الشعب عمل ثورة....انا امبارح رايح علي الشباك اول واحد في مرور السلام الساعة 8 الصبح كل ورقي جاهز الموظفة اخدت مني الرقم بتاع العربية علشان تجيب الملف بتاعها وخدت منها تقدير الضريبة روحت دفع وجيت استني الملف وفضلت مستني ...مستني.....مستني ( كل ده واقف قدام الشباك) لغاية ما دخلت الساعة في 11 فين يا حاجة الملفات ...اصله بيدور عليه. واخذت الرقم ييجي 7 مرات واديته للعسكري...فيه ناس جم بعديا خلصوا ورقهم ومشيوا وانا واقف ومعايا اتنين تانيين..دخلنا للظابط بتاع الوحدة...كتب الأرقام في ورقة واداها للعسكري و قاله 5 دقايق لو الملفات مطلعتش هخشلك بنفسي ومعلش يا جماعة انا عاذركم اصل امين المخزن امه ماتت ومش موجود!!!....فضلت واقف ومفيش حاجة جت ...رحت طالع لرئيس المجمع ...هو نفس الظابط الموجود من 3 سنين...قاللى انزل للظابط...يافندم نزلتله...انزله تاني...نزلتله قاللى ابعتلي الموظفة ....رجعت للشباك تاني لقيت واحد واقف طلع ابن خالة الموظفة جابتله الملف بتاعه في 10 دفايق حتي الورقة اللى كتبت فيها رقم عربيته رفضت تكتب رقمي فيه...لقيته اداها 3 اجندات...وخلص ورقه ويقوللي انا هنا من 9:30 ( يا عمي ده انا اللى فاتح المرور)...من كتر الوقفة كنت حاسس انه هيغمي عليا روحت مروح..وبكرة هاروح اخلص بالرشوة علشان مش عايز اقف تاني الحاجة اللى استنتجتها ان الناس مش بتتغير الا بتغير دينها..واي تغيير من نوع اخر بيبقي تغيير وقتي...المفروض الشعار بتاع متدفعش رشوة يتغير ويبقي اسمه متاخدش رشوة..علشان واحد زيي ميقعش في الحرج..قولولي بقي الرشوة الواحد بيديها ازاي.