محتار ما بين الساجا الاوتوماتيك والبيكانتو اوتوماتيك وال اي 10 اوتوماتيك

**amryounis2000** · 29-05-2011 07:14 PM

بجد انا متشكر جدا على ارائكم القيمه
ان شاء الله انا رايح للراي بتاع الساجا لانها فعلا عربيه كبيره وواسعه مقارنتا بالبيكانتو والاي 10
هي زي ما قلت لكم العربيه لزوجتي فكان مهم جدا انها تكون اوتوماتيك وكمان الجزئية بتاعة اعادة البيع مش مهمه لان السياره سوف تستمر معاها مش اقل من 7 ولا 8 سنين ان شاء الله
انا النهارده ذهبت الى عز العرب بالطريق الصحراوي وقابلت مدير المبيعات هناك وحجزت ساجا
بس يا ريت اعرف منكم عن امكانية توافر قطع الغيار خارج التوكيل
وهل التوكيل بيوفر جميع قطع الغيار ولا بيبقى فيه شيئ ناقص
على فكره انا عندي عربيه كيا سيراتو 2010 وهي مريحاني جدا على عكس ما يشاع عنها
والف شكر على المساعده

**mememsaid** · 30-05-2011 11:59 AM

الف مبروك علي الساجا
وخبي بقي السيراتو اليومين دول عشان بتتسرق

**Mustafa_Farouk** · 30-05-2011 02:37 PM

السلام عليكم،

اللي عرفتو، إن فيه محل اسمو المدينة ومحل اسمو مكة ودول موجودين في شارع دمشق اللي في مصر الجديدة وبيبعو حاجات بروتون، ممكن تسأل فيهم.

**eymofouad** · 30-05-2011 10:37 PM

السلام عليكم:
احب اولا ان اعرفكم بنفسى انا أيمن عنابى من السويس ، بصراحه انا اكتشفت وبعد بحث طويل بالمنتديات والمواقع ان العربية البروتون ساجا عربية محترمه جدا.
انا كان معايا عربية كيا برايد كورى اصلى تقفيل خليجى العربية جابت اخرها فبعتها بس كانت ممتازة جدا والله المهم بعد طووول بحث ودراسة متعمقه عشان اشترى عربية جديدة في حدود من 60 الف الى 75 الف قررت اشترى الساجا والحمد لله اشترتها ولونها ابيض ( اشد لون فيها مع انى مش بحب الابيض) بس اللون ده جامد في الساجا المهم عشان تنوى تشترى عربية لازم توضع نقاط مهمه جدا وهى:
اولا: السعر معاك كام
ثانياً: الجوده
ثالثا: قطع الغيار والصيانه
طبيعى السعر اللى معاك يحكمك فى شريحه معينه من السيارات فبالتالي نختار من الشريحه دى اللى يناسبك انت وظروفك يعنى الكيا البيكانتو متنفعش غير لبنت او مدام بس مع احترامى للشباب مالكى البيكانتو لانها عربية حريمى بناتى اكتر.
اما لو حضرتك شاب ومقبل على الزواج وتكوين اسره فمش هتنفعك البيكانتو خاااالص ( طبعا ضيقه وغير عائلية ) .... الساجا شبابيه عائليه جداا .....
نيجى بقي للفيرنا ( الفره) مع احترامى لماليكهاعربية كورى وحلوه الشكل لكن موتورها قوى اكتر من الازم عليها وهى مش ثابته خالص مع السرعات وصاج ضعيف ( اغلب الحوادث وده كلام حقيقي لازم يكون فيها فيرنا ) وصالونها ضيق جدا .... اجلس بصالون الساجا وانت تلاحظ الفرق والراحه .....
اما الاخت اللوجان فهى عربية كويسه وصاج متين جدا وعاليه عن الارض بس سحبها وقوة ماتورها ضعيف جدا بالنسبة للساجا الخطيره الاقوى سحب ومتانه موتور ده بخلاف انا اللوجان فرنسي لكن تقفيل مغربي .
دى بعض المقارنات والملاحيظ بين تلك الشريحه من السيارات بس احب اقولكم ان الساجا مميزاتها وعن تجربه وكلام اكيد من مواقع مختلفه وهى :
قوة سحب عاليه جدااا ، قوة موتور الخاص بشركة لوتس الانجليزية طبعا عرفين عربيات الفورميلا ، شكل جذاب جدااا ، شاسيه الساجا وده كلام اكيد شاسيه من الحديد الصلب ، ماكينة الفيتيس الاوتوماتيك ماركة متسوبيشى لانسر اليابانيه الاطول عمراً ، الجنوط الاسبور ، والعفشه الرياضيه ، طبعا بخلاف باقى الكماليات الجميله انتو عارفنها .
دى وجه نظرى وتحليلى من البحث الطويل جدا قبل شرائي لها .
من عيوبها اللى شفتها طبعا الدريكسيون مش خفيف زى باقى العربيات بس ده مش عيب لأنه هينفعك اوى لما تكون سايق على سرعات عاليه ( تحكم عالى جدا ).
مجال الريموت للمفتاح صغير 4 متر بس .
شفتوا طبعا مميزاتها وعيوبها اللى ناوى يشتريها يتوكل على الله وبجد مش هيندم ابداااااااا .

**falloutboy** · 30-05-2011 11:29 PM

الساجا وعن تجربة عربية محترمة وفعلا Best value for money في المجموعة اللي في سعرها ... العربية موتورها اكتر من ممتاز بالنسبة لوزنها وصاجها قوي وبيستحمل والعربية بتاع سفر ومشاوير ومش بتقول لا وثابتة علي الطرق بعكس العربيات التانية الصغيرة ومناسبة اكتر جوا المدينة ... الساجا قدام عيني جابت 165 مرتاحة والعربية في منتهي الثبات ... طبعا سمعت انها جابت اكتر بس انا مش باحب اتكلم غير علي حاجة جربتها وشوفتها بنفسي عشان في ناس كتير بتقول بالسمع وده انا بعتبره غلط عشان احنا عارفين اننا شعب بيحب يزود شوية من عنده هههههه

بالنسبة انك لو مش هاتجري او مش هاتسافر بالعربية مثلا عشان حضرتك بتقول دي للمدام ... ده مايمنعش انها ميزه برضه عشان انتا ممكن تكون في ظروف مثلا عربيتك في الصيانة الدورية وتحتاج العربية التانية فيبقي معاك تحت ايدك عربية ممتازة عائلية بتشيل 5 افراد والشنط بتاعتهم ... موتور ممتاز وبتاع شغل ... العربية برضه الفرامل بتاعتها حلوة وياما طلعتنا من مواقف ومطبات من اللي بتظهر فجأة دي بس محتاجة شوية تعود وده بيحصل في الفترة بتاع التليين يعني مافيش قلق ... انا بصراحة بحب العربية لانها مع زميلي في السكن وسوقتها كتير ... العربية فوق الممتاز بالنسبة لسعرها لاني اول ماشوفتها معاه مكنتش مصدق سعرها ... بس برضه للامانة ... لازم تشوف زوجتك رأيها ايه عشان هي ممكن تكون محتاجة عربية صغيرة عشان ماتتعبهاش في الركن او الزحمة وتكون مثلا اغلب احتياجاتها جوه البلد مافيهاش سفر كتير ... انما غير كده توكل علي الله وربنا يباركلك فيها ...