منور والله يا ابو حميد ليك وحشة كبيرة انشالله تكون بخير وربنا يباركلك انت كمان يا حبيب قلبى عقبال عربيتك..
احمد انا كنت فى نفس موقفك لما حجزت البريليانس وطلعت مش موجودة وفقدت الامل فى انى الاقيها وبدأت افكر فى بديل والمشكلة انى كنت على خلاف شديد مع المدام لانها بتعرف تسوق وبتهتم شوية بالعربيات فكان ليها نصف القرار فى الاختيار .. المهم بدأنا نفكر فى بدائل زى البروتون ساجا مثلا ولكن هى كانت رافضة الام 11 لمجرد انها اسبيرانزا ولما استقرينا على الساجا (ولو انها عربية محترمة) ولكن لما حجزتها حسيت بقبضة شديدة فى قلبى وعدم ارتياح فظيع وكنت مضايق اوى وفى يوم قررت بينى وبين نفسى اقنعها اقناع تام بالام 11 وفعلا وصلت للمراد وقدرت اقنعها واتصلت بالمعرض غيرت الحجز ومدير مبيعات المعرض قالى اختيارك سليم وهتعجبك اكتر من الساجا ومش هتصدق انى ساعتها حسيت بارتياح فظيع لما استقريت على الام 11 وسبحان الله اجراءات البنك ساعتها خلصت هوا واستلمت فى يوم وليلة..
بص يا احمد لازم تلاقى ناس كتير بتعادى العربية دى والغريب ان معظمهم مش معاهم العربية ومش فاهم ليه بيحاربوها وبعضهم معاهم العربية ولكن حظهم فيها طلع وحش وجتلهم منها عقدة وعلى النقيض هتلاقى ناس زييى بتشكر فيها وبالرغم من انى اشتكيت من كذا حاجة واكيد انت شوفت موضوع الملاحظات بتاعى اللى المفروض ان اى عربية زيرو متكونش فيها كل ده .. ولكن انت عارف انى حيادى فى حكمى على العربية وزى مابقول مميزاتها بقول عيوبها او مشاكلها اللى ظهرت معايا والحمد لله معظمها اتحل بعد اول صيانة..
العربية مفيش غبار على ادائها كأداء موتور وثبات على الطريق ودول اكتر حاجتين يهموك وان كان فيه بعض العيوب فمن خلال تجربتى او الى سمعته من الناس انها راجعة للتقفيل المصرى وليس عيب فى مكونات العربية اكيد فاهم اقصد ايه يعنى مثلا لما تستلم العربية وتلاقى دربكة فى العفشة او صوت تكة او او فمش معنى كده ان مساعدينها اى كلام او مقصاتها ورق وانما لما تلاقى الاصوات دى اختفت بعد تربيط العفشة فى الصيانة هتعرف انه عيب تقفيل ايدى المصريين وقس على ذلك حاجات كتيرة..
انا شايف يا احمد ان العربية بصراحة جميلة وشيك وادائها جيد جدا يمكن هتكون مثلا محتاج تحسس وتحافظ عليها لان هيكون عندك هوسهوس الصينى اول ما تجيبها زى ما انا حصلى ومن كتر اللى الناس بتقوله هتحس دايما ان عربيتك فيها عيوب ويتهيألك وانت ماشى لو فيه صوت طالع من عربية جمبك او حتى بعيدة عنك يتخيلك انه طالع من عندك انت وقفل الكاسيت وتهدى وتتاكد انه مش منك وكأن الشيطان راكب فوق ودانك وبيقولك "دى عربية صينى زى ما قالولك سامع الصوت ده من عندك" هههههههههه والله كان بيحصلى كتير الكلام ده ومازال بيحصلى..
اتكل على الله وصلى استخارة واستفت قلبك وان افتوك (اللى بيقولك هات ام 11 ولا هات لوجان ولا هات فيرنا ولا ساجا ولا ولا مش هو صاحب القرار ومش هو اللى هيدفع الفلوس ومش هو اللى هيشيل الهم لو طلع الاختيار فى محله) فاعتقد انك سألت عن العربية وسمعت تجارب كتيرة فمش باقى غير اتخاذ القرار وربنا يصلحلك ويصلح لينا الحال ويوفقك للاختيار الصحيح ايا كان اللهم امييييييييين..
تقبل تحياتى وشكرا حبيبى لمرورك