اقتراح بسيط لكن ممكن يفيد

**Adham_Sabry** · 23-04-2008 05:43 PM

عندي اقتراح بسيط .. كتابه رقم موبايل صاحب العربيه (او من ينوب عنه ) ولصقه علي الزجاج ... وممكن يوضع رقم موبيل للطوارئ مثل رقم تليفون الوالد - الأخ - الزميل - العم ... مع رقم صاحب العربيه
الموضوع ده ممكن يفيد في الحالات التاليه :
- ركنت في مكان مزدحم وقافل علي عربيات ناس تانيه .. ممكن حد فيهم محتاج يخرج وعربيتك منعاه فيتصل بيك والمشكله تتحل
(وان كان طبعا الأفضل عدم الركن بالطريقه دي بس احيانا الظروف بتحكم)
- ممكن تكون راكن في مكان صح بس تيجي عربيه محمله مواد بناء وعاوزين يفرغوا الحموله في المكان اللي انت راكن فيه ...
- حد بيركب تكييف او بيكسروا في حاجه في المبني المجاور لمكان الركن وممكن طوب يجي علي العربيه
- الونش لا قدر الله جاي يسحب العربيه .. ممكن حد من العساكر او الناس الموجوده يتصل بيك تيجي تلحقها قبل ما الونش يشيلها .. بس ابقي افتكرهم (وافتكرني انا كمان) في الحلاوه
-ربنا ما يجيب حاجه وحشه .. بس فيه حراميه بتسرق العربيات وبعد كده يسبوها في مناطق تانيه وبتبقي العربيه مركونه و محدش عارف اصحابها
- ممكن رقم الطوارئ يفيد في حاله الحوادث .. وربنا يسلملنا طريقنا جميعا

انا بالنسبالي عادي ممكن اعلق رقم موبايلي علي العربيه .. بس اعتقد (وخاصه البنات ) ممكن يرفضوا الموضوع ده .... (وان كان من الممكن وضع تليفون الأخ - الوالد ...مكان تليفونها)
انتم ايه رأيكم ؟؟؟؟..

**islamnabil** · 23-04-2008 06:08 PM

والله مش عارف اقولك ايه
هو فعلا موضوع مهم و مفيد بس الواحد يخاف يعمل كده :(
يعني مثلا احنا في الشركة الراجل الامن عنده قائمة بارقام العربيات و ارقام اصحابها
و انا شوفت الكلام ده موجود في الخليج عادي جدا
بس انت عارف بقى ممكن واحد ظريف يتصل يقولك الونش شايل عربيتك و في الاخر يقولك

ههههههه ضحكت عليك

**YoussefMostafa** · 23-04-2008 06:14 PM

اولا احب اقولك انها فكرة ممتازة
بس المشكلة في الناس اللي بتستخف دمها زي ما اخونا اسلام قال

بس انت عارف بقى ممكن واحد ظريف يتصل يقولك الونش شايل عربيتك و في الاخر يقولك

ههههههه ضحكت عليك

طبعا غير المعاكسات والذي منه

**TAG_Turbo0** · 23-04-2008 06:18 PM

جرب انت كده
وقلنا بعد اسبوع كام واحد اتصل بيك واشتغلك؟
انت فى مصر مش فى اوروبا

**Akram** · 23-04-2008 11:28 PM

انا لما بركن في مكان ضيق شوية أو حاسس اني ممكن أكون قافل على حد بعمل كده (و طبعاً في الغالب بكون مضطر إني أركن بالشكل ده) ,
بكتب رقم الموبيل بخط واضح على الكارت الشخصي و بحطه على التابلوه في مكان واضح علشان لو حصل أي حاجة يبقى ممكن حد يتصل بي ..

**دموع الثلج** · 23-04-2008 11:35 PM

اعتقد الفكره دى بالنسبه للبنات مستحيله لانها هتتفهم على محمل سيئ جدا وعلى انها دعايه مش محترمه فصعب تطبيقها اضافه الى ان الشباب برضوه ممكن الناس تقول عنهم انهم بيعملوا دعايه ليهم عشان البنات يتصلوا

**limo** · 23-04-2008 11:59 PM

اقتراح ظريف بس ممكن يعمل مشاكل جامده وخصوصا فى الاشتغلات بتاعت الشعب المصرى
اقتراح لحل الموضوع ده
شركات المحمول تعمل خدمه جديده وهى
عند الركن فى مكان صف تانى
تبعت رساله لشركه المحمول تقوم الشركه بعته لك رقم كودى يوصل للموبيل بتاعك وبعد كده تبعت رساله للشركه تلغى الرقم ده
الرقم ده تعلقه على العربيه
-طبعا الرقم فى كل مره بتغير
-الرقم ده تبعت منه رساله فقط ومش اتصال تكون نصها واحد
مثل على مالك السياره رقم ....... التوجه الى مكان السياره للاهميه
-فى حاله الارسال الكاذب يعنى مفيش حاجه مجرد المعاكسه فقط
يتم الاتصال بالشركه وتم تحرير غرامه تخصم من رصيد الملبغ وعلى المرسل عليه اثبات الارسال الكاذب
طبعا الكلام ده كله احلاااااااااااااااااااااا ااااااااااااااااااام
مره حصل معايا موقف كنت بركن لقيت عربيه تانيه ركنت صف تانى وقفلت عليا وصاحبها نزل وادانى رقم موبيله ومشى عادى خالص