انا الجمعة قبل اللى فاتت روحت توكيل اللى فى العجوزة بس للاسف ماعرفتش ادخل لان المسئول ما كنش موجود كان قافل الباب زى مل يكون بيصلى مع انى كنت شايف كل حاجة من الازاز و النور جوا كنا منور و لما سألت زميله اللى فى سيتروين اللى جانبه قالى دا ماشى بادرى علشان عنده ظروف (بس بصراحة حاسس انه كان بيحور) على العموم مش مهم على الأقل شفت الجين 2 الأسود الميتاليك المعروضة من برة فعلا اللون ده حلو عليها و أعتقد كمان ان مش ده الاسود اللى كان بينزل قبل كده.
المهم بعد كده رجعت على البيت انا ساكن جنب المصرية اللى فى مدينة نصر قولت ادخل ابص و سبحان الله اول مرة اشوفهم عارضين جين 2 و كمان نفس اللون بصراحة ركبتها و ما كنتش عايز انزل انا بقالى حوالى سنتين بقرا عن العربية هنا و بشوفها فى الشارع بس عمرى ماكنت ركبتها (ركبت مرة البيرسونا لكن مدة صغيرة جدا مع واحد معرفة) حاسيت ان الصالون حلو و محندق كده و كل حاجة ملمومة و قريبة منى و بصراحة الخامات اللى فى الطابلوه و بمعنى اصح البلاستيك انا شايفها عادية و مش لدرجة تعور ولا حاجة هى متوسطة لو اتقارنت بالزيها الأكسنت ولا الافيو او الأوبترا و يمكن تكون شوية زى الياريس غير كده كل حاجة فى مكانها و زى الفل الدريكسون فعلا واطى شوية بالرغم انه ممكن يتحرك هو و كرسى السواق و حاولت اعدلهم كده شوية بس برده فضل واطى بس دى مش حاجة وحشة قعدت ورا و الحمد الله واسعة و الميل اللى فالسقف مش مشكلة برده (انا طولى 180) و كله فدا الأيرودينامك بتاعت الجين برده و الشنطة ما شاء الله و اسعة متفرقش كتير اوى عن حاجة سيدان بالعكس انا بانسبالى دى ميزة انها تكون ليفت باك وواسعة و بشنطة زى دى و فى نفس الوقت عربية حلوة مش كبيرة اوى و ابعادها مش صعبة ماعدا حاجتين الرويا من ورا ضايعة علشان الليفت باك و السبليور (زى الياريس برده فى الحتة دى) بس محلولة لان فيه باركينج سينسور و تانى حاجة المرايات اللى فى الجانب كانوا المفروض يكونوا اكبر شوية
اما بقى قلقى الأكبر من العربية و هو الفرامل طبعا مأ قدرش احكم عليه لانى اكيد ما سقتهاش و لا حتى دورتها بس و كان معايا ساعتها واحد صاحبى و اقعدت احكيلوا على كل حاجة انا قريتها هنا عن العربية و بالذات موضوع الفرامل ده قالى انت كده كده فى الاول مش هتجرى بيها و بعدين كله تعود بس لصراحة برده لسة مقلق
اخر حاجة بقى سألت بكام الكاش و كنت فاكر ان المصرية بيبيع بس قسط بس قولت برده اسأل قالى 92.5 طبعا الاوتو انا بقى هنا عندى سؤال اشترى من انى احسن مع العلم ان فى التوكيل ب 93 بس المصرية داه فى العمارة اللى قدامى و كمان مش عارف ممكن و قت الدفع ينزلى كمان فيها انتوا ايه رأيكوا
فى ميرزة كمان فى المصرية ان العربية عنده جاهزة يعنى مش زى التوكيل لسه هاحجز و كل شوية يماطلوا زى اى توكيل فى مصر و انا بصراحة عاوز اخلص
اخر سؤال هو اللون الفيرانى بتاع الجين 2011 لانى بصراخة بشوف صور على النت لون فيرانى كانه رمادى غامق بس فيه برده لون تانى كده تحس انه بين السيلفر و الارزق الفاتح و ده بردة بتقال عليه فيرانى انا بصراحة كان نفسى اشف الفيرانى ده على الحقيقة بس مش بشوف غير اللون الغريب اللى انا و صفته دلوقتى و علشان كده انا هاختار ما بين الأسود و السيلفر