الموضوع: أستشارة بخصوص تكييف السيفيك 93

المشاركة الأصلية كتبت بواسطة waelemam2008

خالد باشا هوه محمد سعيد ده جنب on the run اللى فى المعادى .؟؟ انا معرفش اسم الميدان بس هوه قريب من البنزينه ... واللى قالك عليه محمود بتاع الهوندا ...... لو هو ده انا روحتله قبل كده واحبطنى احباط السنين قالى الكباس بايظ وكشفت عند واحد تانى قالى سليم . بجد موضوع التكييف ده موضوع محير جدااا ..... انا ان شاء الله افضى بس كده من الامتحانات وانزل اكشف عند كذا واحد ...
بص حضرتك فيه 3
الصعيدى ورا بنزينة موبيل اللى فى الطيران ( جامع رابعه ) وفيه واحد وراه اسمه العفريت
وفيه برضه مركز مقار المركز بجوار مسجد ال رشدان امام ارض المعارض
بعنى ممكن حضرتك تكشف عند كام واحد من دول وشوف ايه النتيجه وان شاء خير يا كبير
تحياتى : )

تمام كده يا باشا, كل كلام حضرتك صح, بنا يوفقك إن شاء الله

المشاركة الأصلية كتبت بواسطة semsem kane

عموما اى واحد يحب يريح نفسة يقولك حاجة من الاتنين ياما الكباس بايظ , او العربية دية التكييف بتاعها كدة

طيب حلو اوى وبقيت عربيات الهوندا دية تكييفها ماشاء الله علية فلتة يعنى ولا اية ولا اسبيشيال اوردر

شوفوا ياجماعة من الاخر اللى عايز يظبط تكييفة وعارف انة معندوش اى عيب بس التبريد ضعيف يعمل الاتى :

1- التأكد من عدم وجود تسريب فى دائرة التكييف

2- فك الكويل الموجود اسفل التابلوة ونظافتة عن طريق وضعة فى المياة كاملا بعد ضغطة بالهواء للتاكد من عدم وجود اى ثقوب ثم تنظيف الريش الخارجية بخرطوم مياة ضغط خفيف الى ان تجد الريش بدأ لونها يبقى ابيض , ثم تنظيف الصندوق الاسود الذى يركب فية جيدا

3- فك مروحة التكييف الموجود اسفل درج التابلوة وتنظيفها بالهواء فقط مع حذر ادخال مياة لها , ثم وضع كمية بسيطة جدا من زيت الماكينات على البلية الخاصة بها

4- فك السربنتينة وتنظيف المروحة الخاصة بها , ثم يتم وضع خرطوم مياة داخل السربنتينة وتنظيفها جيدا ستجد اولا نزول سائل الفريون مع المياة الا ان تجد الماء ينزل منها نظيفا , وبعد ذلك يتم تنظيف ريش السربنتينة بضغط مياة منخفض , ثم اعادة تنظيفها من الداخل مرة اخرى

5- التاكد من سلامة الكباس وعدم وجود تسريب بة , واذا كان بة خشونة فى البلية يتم تغيرها ب35 جنية , ثم يتم التاكد من منسوب الزيت الخاص بة , واذا وجد ناقصا يتم تزويدة بزيت الباور

6- يوجد حساس يتم تركيبة على قميص السربنتينة وهو حساس ضغط الفريون يتم تنظيف توصيلاتة وتنظيف جزء الاستشعار الموجود بة من الصدأ لكى يتم قراءة الضغط بطريقة سليمة

7- يجب ان يكون الار بى ام عند 850 لفة وعند تشغيل التكييف يجب ان لايتعدى 900 لفة ولا يكون اقل من 850 لفة لضمان عمل الكباس بطريقة صحيحة

8- يجب ان تكون حرارة السيارة فى وضعها الطبيعى

9- التاكد من عدم وجود التواءات فى المواسير خصوصا عند الضغط المنخفض والمرتفع

10 - واخيرا بعد التوصيل يتم ضغط دورة التبريد بالهواء وتركها ساعة الا ربع على الاقل , واختبار الكبس مع الضغط البسيط على البنزين

11- يتم تفريغ الهواء كاملا من الدورة مهم جدااااااااااااااااا , ثم وضع فريون made in united kingdom , poland

ويتملى كويس جدا وان شاء الله تلاقوا اللى التكييف اللى تتمنوة

بالفعل يا سمسم باشا الصعيدى قالى الصيف اللى فات أن الكباس بايظ مع أنى كنت لسه مغيره, ودلوقتى محمد سعيد قالى مفيش فايده, أنا إن شاء الله ناوى أعمل كل اللى حضرتك قولت عليه ده , بس كنت محتاج أعرف أشترى منين المجفف و الأكسبانشن و حساس الضغط ؟ و جزاكم الله خيرا جميعا

انا كنت عاوز أغيرهم من باب الصيانة و تحسين الأداء, لكن أنا مش عارف اذا كانو بايظين ولا لأ, لكن مجيبش الحاجات دى جديدة ؟ الأستيراد أحسن يعنى ولا أيه يا باشا, و أزاى أعرف انهم سلام ولا بايظين ؟ و لك ألف شكر