الموضوع: يا ريت لو غلطان أعرف غلطان فى ايه؟؟؟

السلام عليكم و رحمة الله و بركاته

انا اسمى اسامة ابراهيم و شغال "IT Manager" فى فندق سياحى فى جنوب سيناء معلش حطول عليكم بس المعلومات دى تخص الموضوع مش رسم.

المهم فى شهر 10-2010 تم عرض مشكلة فى اجتماع يومى و هى ان الفندق عنده سيارة نيسان خليجى 4×4 موديل 97 دوبل كابينه "نص نقل" ميعاد ترخيصها فى 16-1-2011 و عايزه تتظبط لأنها فى دهب "550 كيلو" و معندناش ورش محترمه .
و ده شكل العربيه

اللى جه فى دماغى مش حلاقى حد يراعى ربنا فيا غير اخواتى فى المنتدى ثم هما أولى من الغريب .
و كمان كنت لسه مسمكر باب عربيتى نيسان صنى فى الحرفيين عند العقيد خالد و أحمد قدورة و كان الشغل فوق الممتاز و تكلفه بسيطة جداً و وقت قليل و ناس محترميين جداً فوق الوصف.
الهم فى الإجتماع كان فى رأيين :

• العربية ترووح التوكيل و زى ما تصرف علشان ترجع حالة 90%.
• أو نبعت العربية الشركة المالكة و هى اللى تتحمل مسئولية تصليح العربية "أصول ثابته"

قمت انا طارح رأى ثالث الا و هو ان العربيه ترووح الحرفيين عند ناس محترمين و أهل ثقة و تتكلف نص التكلفة و أنا ضامنهم برقبتى و يبقى توفير فى الوقت و الفلوس.
بعد نقاش حوالى ساعة الحمد لله الإدارة كاملة وافقت على اقتراحى و سرعة التنفيذ
قمت على طول مكلم العقيد خالد و حكيتله القصة كاملة و الراجل رحب و اتفقنا على ان العربية تروح الحرفيين بس منقوله على عربيه كبيرة "علشان سلامة السواق لأن العجل ممسوح و العفشة بايظة و مينفعش يسافر بيها مسافة طويلة زى دى"
المهم اتفقنا مع عربية كبيرة 4/3 نقل و تم النقل و الحمد لله وصلت سالمة يوم الأحد 24-10-2010 و يومها كان وصل فى نفس التوقيت الحرفيين الأستاذ عماد مدير المشتريات و دفع العربون 5000 جنيه
و أول أجازة ليا كانت حوالى 19/12 بس دى انا مش فاكر توقيتها بالظبط عديت على العقيد خالد كانت العربية متفورة و الماتور مفكوك عند الميكانيكى و الصندوق مفكوك و إجراءات الشغل المعتادة و قمت بدفع 10000 جنيه تحت الحساب و العقيد خالد قالى انه اشترى للعربية 4 أبواب و تابلوه استيراد و بالنسبة للحاجة القديمة وضعها ايه علشان واخده مكان فى الورشة فقلت له يشوف لهم بيعه كده كده مش حشيلهم لحد دهب و بعد كده ابيعهم بس أكدت على العقيد خالد ان فاضل شهر على الترخيص بتاع العربية و كان رده ان قطع الغيار مش موجودة و انا بدوخ عليها و العربية لوحدها و مفيش حد معاها علشان يجيب الحاجة بتاعتها و رديت على العقيد خالد ان ظروف الشغل انى فى آخر الدنيا و بنزل اجازة حوالى 10 ايام و المشكلة انى داخل على موسم راس السنة و الكريسمس فكان من الصعب تواجدى فى القاهرة و 95% من اللى شغالين فى الفندق من الأقاليم و الصعيد .
و اللى زاد و غطى 25 يناير الثورة و اللجان الشعبية و حظر التجول و اعمال البلطجة اللى البلد كلها مرت بيها و دى طبعاً عطلت الموضوع زياده و انا كنت مقدر لأن دى ظروف البلد كلها مرت بيها و كنت متعاطف مع العقيد خالد جداً لأنى لو كنت فى مكانه دى امانه و البلد بتتسرق و تولع.
اسف للإطالة بس فضلنا فى اتصالات متواصلة و لما ألاقى حد من صحابى نازل أجازة القاهرة اقوله يعدى على العقيد خالد بصفة ودية .
لحد ما وصلنا لشهر مارس كانت العمليه بقت خلاص وصلت لمرحله صعبة الشركة المالكة عملت جرد أصول فى شهر يناير و كانت العربية مش موجودة فى الجرد "قلنالهم العربية بتتصلح فى القاهرة"
من أول شهر مارس فضلوا شبه يومياً فاكسات و ايميلات و تليفونات بيسألوا على العربية لأنها من الأصول الثابته فبعت رسالة على الخاص للعقيد خالد بقوله فيها على الوضع و ان الموضوع كده بقى فيه احراج جامد جداً ليا فى الشغل رد عليا العقيد خالد فى ساعتها و قالى انه ان شاء الله يشد حيله و حيخلص العربية فى اسرع وقت الكلام ده كان فى 20-3.
المهم تم تحويل بالبريد مبلغ 15000 جنيه بالبريد على 3 مرات .
و فى آخر شهر مارس و أول شهر ابريل تم إرسال احد سواقين الفندق مأموريه 10 ايام بعد ضغط منى على رئيسه علشان يساعد العقيد خالد فى شراء مستلزمات السيارة.
من ساعة ما طارق السواق ما نزل القاهرة و كل يوم مشكلة و خناقة من مختلف الأنواع من ناحية المواعيد و من ناحية تخليص الشغل لأن السواق ده مش من القاهرة ده من المنوفيه يعنى بيسافر يومياً للحرفيين علشان يشترى حاجات من باسوس أو من الوكالة أو من التوفيقة و انا طبعاً كل يوم تليفون سواء من العقيد خالد بيشتكى من طارق أو من طارق بيشتكى من العقيد خالد بس ربنا يشهد انى لأخر لحظة و انا فى صف العقيد خالد.
المهم و اخيراً 6-5-2011 العقيد خالد كلمنى و قاللى العربية خلصت
فعلى ما رتبت مع المدير المسئول عن السواقين بعت محمد سواق ثانى من المنصورة علشان يستلم العربية و يرجع دهب فى نفس اليوم .
10-5-2011 السواق نزل من دهب للقاهرة و راح يستلم العربية لقى الأتى :
1. الريداتير الجديد بينقط ميه و تم لحامه فى ساعتها.
2. العربية متلته فالميكانيكى قال ده عيب كربراتير فقام معلى العربية علشان السواق يعرف يسافر بيها.
3. العربية كانت واخده غرز فكانت مكلبشه فى الأرض و لما تكسر بالعربية شمال أو يمين العربية تطق طق فعرضوا العربيه على العفشجى فقال ده كوبلن شمال مكسور فالسواق طلب تغييره فرد عليه العقيد خالد و قال له هات الكوبلين و انا اغيرهولك.
4. عداد السرعه مش شغال.
5. لمبة فرامل اليد منوره على طول.
المهم لقيت السواق بيتصل بيا الساعه 8 بالليل و قاللى على المشاكل اللى عنده و ان العقيد خالد مصر على تسليم العربية نظراً لطول المده و لازم العربيه تتسلم النهارده و لحسن الحظ كنت لسه واصل القاهرة قبلها بيوم قمت نازل من الهرم للحرفيين مع الزحمه مع الاتصال بالعقيد خالد انه يفك حظر السواق علشان يلحق مواصلاته للمنصورة و انا يا سيدى جاى استلم العربيه .
لما وصلت الساعة حوالى 11 كان محمد السواق مشى و لقيت العقيد خالد فى انتظارى رحنا عند العربيه و اول ما ركبت العربية فكيت الغرز بتاع العربية و خدتها لفة يمين و شمال مفيش صوت خالص فقلت له ده مش كوبلين ده غرز
المهم اخدت منه الرخصة و المفتاح علشان استلم العربية على اساس انى جاى بكره الخميس علشان اظبط الكربراتير علشان السواق يعرف يسافر مع شكر العقيد خالد على المجهود مع اعتزار العقيد خالد عن التواجد تانى يوم لوجود ظروف عائلية مرضيه .
قبل ما امشى العقيد خالد قاللى على ان ليه باقى فلوس 1700 جنيه قولت له مش مشكله هاتهم فقاللى حبعتهم لك فى البريد؟؟؟؟؟
المهم تانى يوم الأربعاء 11-5-2011 رحت الحرفيين بعربيتى و ركنتها و ركبت عربية الشغل و رحت على ورشة العقيد خالد علشان الملاحظات اللى فى العربية السابق ذكرها + الكنبه اللى ورا مبتقفلش + العربية السوست اللى ورا عاليه جداً فالعربية ماشيه بتنط المهم وصفولى راجل بتاع سوست قلل ارتفاع السوست شويه مع تغيير الأربع كاوتشات بتاعت السوست الورق و خد 270 جنيه و رحت اشتريت دواسات للعربية + كفر للدركسيون و شويه حاجات للروشنة 135 جنيه
و رجعت على الورشة علشان الكنبه اللى مبتفلش فبعتوا جابوا السروجى فقال ده مش شغلى ده شغل بتاع الكوالين فكانت النتيجة كالتالى على ايد السمكرى

و برضو الكنبه مقفلتش؟؟؟؟
الوقت اتأخر و السواق لازم يسافر فقلت الحق الراجل بتاع الكربراتير "مركز الصفا" رحته عن طريق راجل محترم و فعلاً مركز محترم جداً أول ما دخلت المركز قال لى العربية دى متلته فنضف البوجيهات العربية اشتغلت تمام فقلت له بالمره اكشف على الكربرتير فوصل العربيه على جهاز كده فى الشكمان و طلعت القياسات ان العربية بتاكل بنزين فقالى العربية لأزم تبات علشان الساعة بقت خمسه و نص ؟؟؟؟؟ و المركز بيقفل 6 .
يوم الخميس 12-5-2011 رحت الحرفيين على مركز الصفا على الساعة 2 عصراً كانت العربية جاهزة بعد تغيير بكات الكربراتير و تغيير البوجيهات "لسه متغيره من يوم واحد فقط" .
المهم قابلت السواق و عملنا ظبط زوايا للعربية على اساس انه يسافر المنصورة أولاً علشان يخلص باقى الحاجة "الفنش" و بعون الله يسافر السبت 14-5-2011 بعد عمل محضر بفقد الرخصة "لأن الرخصة خلصت من 16-1-2011 "


النتيجة النهائية للسيارة

يتبع....