موضوع جميل،
الحقيقة وبكل أسف أنا بيتحرق دمي في كل خطبة جمعة تقريبا في المنطقة بتاعتي ..
المشكلة ببساطة من وجهة نظري ان كثير من الخطباء دول واخدينها وظيفة ومهنة أكثر من أي شيئ آخر.
وبما إننا في مصر بعد الثورة او قبلها مش هتفرق، الموظف غالبا لازم يقصر في عمله !!
الأخ الخطيب قواعد اللغه عنده في الغالب على مستوى طالب الإعدادية بالكتير !
أما بقى الموضوعات والتجهيز ليها، فحدث ولا حرج،
وكأنه عمره ما فكر يستعد بجد قبل الخطبة وكل ما يقوله من ذاكرته التي أكل عليها النسيان وشرب ..
أما القضايا، فغالبا مش موجوده اصلا، وانما نقدر نقول وعظ وتنبيه، وحتى من نوع اتقوا الله وخافوا الله واتبعوا حدود الله ،
طيب وأنا ايه مش عاجبني في الكلام ده؟
مش عاجبني التعميم والخوف دوما من الصراحة.
الخطيب في غالب الأمر ليس عنده شجاعه أن يوصف للناس كيف تكون التقوى أو كيف يكون البعد عن الحرام،
ويا سلام بقى لما يستفيض في حكاية ويبدأ يصرخ في عبارات عجيبة كده زي ما يكون مستني اللي وراه يقول "الله الله يا عم الشيخ !!"
وفي مرة قلت بلاش سلبية وأتكلم مع الراجل شكله طيب وهيسمع مني،
وفعلا انتظرت لما الناس مشيت وذهبت اليه ، وقلت له بإبتسامه أني بس كان عندي مجرد اقتراح،
"حضرتك الناس ممكن متكونش عارفه التقوى دي ازاي وممكن تكون بتعمل حاجات غلط ومش منتبهه زي الربا مثلا أو زي انها تترك بناتها او زوجاتها تلبس ضيق او شفاف وفيه سلوكيات كتيره غلط يمكن الناس محتاجه تتواجه بيها"
الشيخ الكريم قالي الناس عارفة كل حاجه ...
وبس، ولم يتغير قيد أنملة..
ولا حول ولا قوة الا بالله.