الموضوع: 10طرق فى القاهرة والجيزة يتوقف فيها الزمن

المشاركة الأصلية كتبت بواسطة aboelsoud

انا مش بيتضايقني الزحمه طب ما هي طوكيو و نيويورك زحمه زيينا
انما اللي بيضايقني طريقه الوقوف في الزحمه يعني الحاره بتاعتك و المساحه ما بينك و ما بين اللي قدامك و اللي وراك
يعني تلاقينا 5 عربيات واقفه في مساحه تكفي عربيه واحده
انما بره تلاقي ما بين كل عربيه و التانيه مساحه تكفي عربيه نقل :)
طبعا هي هي الزحمه بس لما تبقى واقف مرتاح و المنظر من حواليك واسع اكيد هتبقى نفسيتك مرتاحه اكتر من لما تبقى واقف و تلاقي اللي في العربيه اللي جنبك قاعدين معاك جوه عربيتك :)

طوكيو ونيويورك ولندن ونيودلهي كمان كلهم زحمة بس اتفرج سعادتك بقي
كلها بلاد غنية بما فيهم الهند العربية مكيفة ومفيس تسول حواليك يكرهك في عيشتك ويجبرك تقفل زجاجك في حين ان الجو حار جدا جدا انا عربيتي مكيفة بس بجد نار الشمس اقوي من التكييف لدرجة اني النهاردة قفلته لأني حسيت اني بستهلك بنزين علي الفاضي والبلاد دي عاملة حلول للزحمة في توقيت قفل وفتح الاشارات التي تعدل الكترونيا بناء علي مجسات في الارض تحسب سرعة تدفق العربيات في جميع الشوارع المؤدية للاشارة ومن ثم تقفل في الناحية الماشية وقت اطول من الناحية الواقفة عشان تعمل شوية انسياب
مش احنا بقي
تخيل معايا انك جاي من عند مديرية امن الجيزة في شارع مراد ورايح فيصل
هتدخل من جمب المديرية في الشارع المكسر دة وتقف في اشارة جنينة الاورمان
هذه الاشارة ملتقي شارع المديرية سالف الذكر وشارع الدقي وشارع ثروت وكل دوول اضربهم في 2 عشان الراجع
تلاقي ساعدتك عشوائية في توقيت فتح وقفل الاشارة وياسلام لو الي قدامك حابب يشتري الجرنان وهو واقف والاشارة راحت فاتحة او واحد تلم متشعلق في شباك العربية الي قدامك عايز ياخد نص جنيه وراحت الاشارة فاتحة والراجل مش عارف يمشي بسبب الغلس الي متشعلق في عربيته وتقوم الاشارة قافلة بعد نص دقيقة بسبب العشوائية

وتقولي طوكيو ونيويورك ؟؟؟؟؟؟؟؟؟؟

ياباشا دي ناس بتقدر بعض مش احنا تبقي الدنيا زحمة وحر وكمان ممكن تلاقي حرامي في الاشارة راح ناتش الموبايل ولا شنطة واحدة ست ولا في الزحمة يقوم موتوسيكل جميل صيني مركب كاسيت وانذار وانوار عجيبة معدي من علي يمينك او شمالك ولاطش مرايتك الكهربا ام 600 جنيه مدغدغها

والله المستعان
،
،