أشعر بالذنب والخجل من نفسى.

**Frozen_Pain** · 30-05-2011 11:16 PM

بسم الله الرحمن الرحيم

اللهم صل على محمد وعلى آله وصحبه أجمعين

السلام عليكم ورحمة الله وبركاته

تحية الى شباب الثورة - تحيا جمهورية مصر العربية

منذ شهر يناير وانا متردد فى كتابة هذا الموضوع.

البداية كانت يوم الثلاثاء 25 يناير الساعة 2 ظهراً،،،، فى اليوم ده انا كنت فعلا فى القاهرة وكنت بالعربية فى وسط المظاهرات من أول وزارة الشباب والرياضة فى المهندسين وحتى شارع جامعة الدول امتداداً الى شارع البطل أحمد عبدالعزيز وصولاً الى شارع التحرير بالدقى.

مظاهرة مثل أى مظاهرة حدثت،،، كل الجديد فيها كان عدم وجود إشتباكات بين الشعب و أفراد الشرطة (فى بداية اليوم فقط) ونهاية اليوم كانت حصيلته كالتالى:

1- قطع الفيس بوك وتويتر عن مصر.

2- غلق ميدان التحرير بداية من كوبرى قصر النيل.

3- عدم وقوف المترو فى محطة انور السادات ( التحرير).

مر يوم 26 و 27 مرور الكرام،،، ثم كان الحدث الاكبر عالميا الحدث الذى غير تاريخ جمهورية مصر العربية،،، يوم الحرية والاستقلال،، يوم إسترداد الكرامة،،، يوم جمعة الغضب فى الـــ 28 من يناير عام 2011.

أقسم لكم بالله بانى لم أكن أتوقع أن يكون هذا هو يوم النصر،،، أكتب لكم هذا الموضوع لشعورى الشديد بالندم على عدم نزولى لهذا اليوم،،، تمنيت يوم أن يكون لى أولاد ان اقول لهم بكل فخر أن والدكم قد كان ضمن ثوار جمعة الغضب،،، أشعر بالاسف على مرور هذا اليوم بحياتى ولم اقدم لمصر شيئاً.

أخجل من نفسى وألوم نفسى كل يوم على عدم مشاركة الثوار فى يوم إسترداد الكرامة المصرية،،،، تمنيت ان يعود بى الزمان الى الخلف حتى أتمكن من الذهاب الى ميدان التحرير،،، تمنيت ان أكون شهيداً من شهداء الثورة،،، تمنيت لو حتى نلت شرف مقابلة شهداء الثورة والثوار.

أنا لا أقل عن ثوار يوم الجمعة شيئاً - لقد شارك كبارالسن،، شباب ،،، أطفال ،،، نساء ،،، فتيات - فى المظاهرات بينما أنا شاهدت أتابع الحدث وألوم نفسى لا أكثر.

أقسم لكم أنى أعشق تراب مصر،،، أفتخر كونى عربياً مصرياً.

لا أجد مبرراً حتى أسامح نفسى على هذا الخطأ الذى أرتكبته فى حق مصر وحق نفسى

لا أملك إلا أن أقول

عذراً مصر فلم أكن المصرى الذى أعطيته الأمان

عذراً مصر فلم أكن المصرى الذى أعطيته لقب مصرى

عذراً مصر فلم أكن المصرى الذى تمنيتى أن يشاركك فرحة الثوار

أقولها لكى من كل قلبى عذراً يا مصر ،،، عذراً يا أم الاوطان ،،، عذراً يا أم الدنيا

عذرأ شهداء الثورة لقد تمنيت أن أكون معكم،،، لقد نقشتم اسمائكم فى قلوب كل المصريين والعالم كله

عذرأ شباب الثورة لقد تمنيت أن أشاركم يوم تحرير مصر ،،، لقد سطرتم التاريخ من جديد

والسلام عليكم ورحمة الله وبركاته

[youtube]http://www.youtube.com/watch?v=ibV9CELN97Q&feature=related[/youtube]

**HOSSAM99** · 31-05-2011 12:01 AM

و عليكم السلام و رحمة الله
اللهم صلي علي نبينا الكريم

عادي متضايقش نفسك دي كانت حاجه زي فرض الكفايه كده ناس تثور و الباقي يؤيد و يتمني نجاح ثورتهم دا لو كل الناس اللي بتحب مصر كانت نزلت كنا رحنا جبناه من القصر
ما فعلته بتأييدك كاف

كلامك علي فكره قوي جدا
و من أول (أقسم لكم أنى أعشق تراب مصر،،، أفتخر كونى عربياً مصريا) جسمي قشعر جدا

**youssefmustang** · 31-05-2011 04:11 AM

انا عملت زى ما انت عملت بس الفكرة انى انا نزلت يوم 29 لاقيت شوية عيال هابلة كتير والمحترمين اللى فعلا بيحبو بلدهم قلة محدوده طبعا ما ينفعش اقول كلام زى ده عشان مش مستعد اسمع كلمة من حد ينتقدنى
واللى خلانى اقول كده ان شباب كتير نازلة ومعاها حشيش وقاعدين على الارض وعمالين يضحكو ويقولو (انتو تعرفو الثورة دى سببها ايه !!! سببها الحشيش ) وضحك بطريقة عربجية وقذرة وده اللى خلانى ارجع بيتنا على طول وقولت فى سرى بلد بنت .......... تيييت وكنت زعلان على الشباب والناس والبنات المحترمة اللى فعلا نازلة عشان خاطر البلد لكن للأسف معرفش انزل مكان زى كده وفى شوية خنازير لانى ممكن ارتكب جناية والمشكلة ان الحكومة او الجيش ساعتها حيحسبو عليا بنى ادم ويحبسنى
خدها من قاصرها وروحت وما تندمش كان ممكن تستشهد ولا يجرا حاجة وانت عندك اولاد وزوجة

**Frozen_Pain** · 31-05-2011 10:52 AM

المشاركة الأصلية كتبت بواسطة hossam99

و عليكم السلام و رحمة الله
اللهم صلي علي نبينا الكريم

عادي متضايقش نفسك دي كانت حاجه زي فرض الكفايه كده ناس تثور و الباقي يؤيد و يتمني نجاح ثورتهم دا لو كل الناس اللي بتحب مصر كانت نزلت كنا رحنا جبناه من القصر
ما فعلته بتأييدك كاف

كلامك علي فكره قوي جدا
و من أول (أقسم لكم أنى أعشق تراب مصر،،، أفتخر كونى عربياً مصريا) جسمي قشعر جدا

متشكر جدا على ردك يا حسام والله انت خففت عنى كتير،،، عارف والدى الله يرحمه كان واحد من أبطال حرب أكتوبر ،، كان دايما يحكيلى عن ايام الجيش وهو فخور جدا بمصر ،،، عارف لما انت بتكبر فى السن وحبك لمصر يكبر معاك،،، والله احساس جميل جدا

**Frozen_Pain** · 31-05-2011 10:54 AM

المشاركة الأصلية كتبت بواسطة youssefmustang

انا عملت زى ما انت عملت بس الفكرة انى انا نزلت يوم 29 لاقيت شوية عيال هابلة كتير والمحترمين اللى فعلا بيحبو بلدهم قلة محدوده طبعا ما ينفعش اقول كلام زى ده عشان مش مستعد اسمع كلمة من حد ينتقدنى
واللى خلانى اقول كده ان شباب كتير نازلة ومعاها حشيش وقاعدين على الارض وعمالين يضحكو ويقولو (انتو تعرفو الثورة دى سببها ايه !!! سببها الحشيش ) وضحك بطريقة عربجية وقذرة وده اللى خلانى ارجع بيتنا على طول وقولت فى سرى بلد بنت .......... تيييت وكنت زعلان على الشباب والناس والبنات المحترمة اللى فعلا نازلة عشان خاطر البلد لكن للأسف معرفش انزل مكان زى كده وفى شوية خنازير لانى ممكن ارتكب جناية والمشكلة ان الحكومة او الجيش ساعتها حيحسبو عليا بنى ادم ويحبسنى
خدها من قاصرها وروحت وما تندمش كان ممكن تستشهد ولا يجرا حاجة وانت عندك اولاد وزوجة

أكيد هتلاقى الكويس والوحش

مع نهاية كل صلاة بدعى طبعا لوالدى ووالدتى واخواتى وكل المسلمين،،، بس أهم دعوة ليا

اللهم انى اسألك أن أموت شهيداً فى سبيل دينك وسبيل الحق

**Ralliart** · 31-05-2011 11:10 AM

والله العدد كان كفاية وزيادة في الشوارع بس كان ناقص التوفيق وده جه عن طريق التأييد والدعاء بتاع الشعب

**Frozen_Pain** · 31-05-2011 12:23 PM

المشاركة الأصلية كتبت بواسطة ralliart

والله العدد كان كفاية وزيادة في الشوارع بس كان ناقص التوفيق وده جه عن طريق التأييد والدعاء بتاع الشعب

كان نفسى والله اكون معاهم

**hobiko** · 31-05-2011 12:47 PM

المشاركة الأصلية كتبت بواسطة frozen_pain

أقسم لكم بالله بانى لم أكن أتوقع أن يكون هذا هو يوم النصر،،، أكتب لكم هذا الموضوع لشعورى الشديد بالندم على عدم نزولى لهذا اليوم،،، تمنيت يوم أن يكون لى أولاد ان اقول لهم بكل فخر أن والدكم قد كان ضمن ثوار جمعة الغضب،،، أشعر بالاسف على مرور هذا اليوم بحياتى ولم اقدم لمصر شيئاً.

لا تخجل أبدا من نفسك و ماتقولش كده ..... ده كفاية شجاعتك فى كتابة الموضوع ده على الملأ و الله دى بتعادل شجاعة اى حد كان فى الميدان

بس الجملة اللى أنا مقتبسها دى ..... كانت بتراود أحلامى على طول ..... ان ابنى لما يكبر و يدرس فى المدرسة ثورة 25 يناير العظيمة ...... حيبقى من حقه يقول انا والدى شارك فيها و اضرب من الأمن المركزى و ضربهم برضه :))))))

حاجة من الحاجات اللى ممكن الواحد يفخر بيها قدام ابنه

**mahmoud5777** · 31-05-2011 12:53 PM

انا برضو منزلتش لسبب بسيط انى مكنتش فى القاهرة كنت فى الصعيد
وانا حتى هذه اللحظة مستاء من كل التعليقات اللى اتكتبت على الصعيد على القطارات وحجات تانية كتير
انا مثلا من اسيوط وعمرى حاجة وتلاتين سنة مافتكرش ان فى مرة حطيت اسيوط او اي بلد من الصعيد بمقابلها فى الوجه البحرى وخدت حقها فى الاعلام هاهاها ده حتى فترة قريبة مكانوش بيجيبوا درجة الحرارة بتاعتها فى النشرة بينطوا من فوقيها كأنها موش موجودة مافيش فى مرة فرحونا بافتتاح حاجة مثلا فى التليفزيون
ولما كنت اقابل حد من القاهرة ويعرف انى من اسيوط بشوف فى عينه نظرة غريبة مبفهمش ايه هيه ولما اسأله مالك يقلى ابدا هاهاهاها
ومع الوقت بتتعود انك عايش فى عالم والناس التانية فى عالم تانى وتبطل تقرا جرايد علشان اللى فيها ميخصكش وبرضو متشوفش النشرة ولا الحوارات برضو علشان اللى فيها ميخصكش ودلوقت بعد الثورة الحمد لله جامعات مصر ثبتت المؤقتين والحياه اتغيرت وبقت حلوة واحنا فى اسيوط لسه فى اجراءات التثبيت زى ما بيقولوا ومعاهم كمان لشهر سبعة يعنى زى ماحنا

بقولها من كل قلبى انا بعشق صعيد مصر بناسه وبألامه المنسية
معلش صدعت دماغكم

**زينة الله** · 31-05-2011 12:54 PM

هون عليك يا أخى الكريم

أنا زيك كان نفسى أنزل المظاهرات لكنى لم استطع فكنت دائمة الصلاة و الدعاء لهم و متابعة الأخبار لدرجة إن وزنى نزل حوالى 5 كجم فى أسبوع الثورة

و بعدين الجايات أكتر من الرايحات زى ما بيقولوا و مصر محتاجة منا الكتيييييييييييييييييييير
إن ما كنش فى ميدان التحرير و الثورة يبقى فى ميدان العمل والانتاج والتصحيح والعمل التطوعى كمان

عندما كان يعود الرسول (ص) من الغزوات كان يقول " رجعنا من الجهاد الأصغر إلى الجهاد الأكبر " :: جهاد النفس فى كل أمور الحياة ،،

وعندك كمان أعظم الجهاد " كلمة حق فى وجه سلطان جائر " و أكم من سلطوين جائرين فى مناحى حياتنا

و ربنا يرزقنا جميعا الشهادة والمرد غير المخزى وحسن الخاتمة

الموضوع: أشعر بالذنب والخجل من نفسى.

LinkBack

أدوات الموضوع

عرض

أشعر بالذنب والخجل من نفسى. - انشر الموضوع فى :

-

-

-

-

-

-

المواضيع المتشابهه

نفسى افهم ...... نفسى اعرف

الاحساس بالذنب

هل تشعروا بالتصعيد الشديد من كل الأطراف كما أشعر الآن ؟؟

اد ايه الدولة علي اسس دينية ديه تسبب الاحراج والخجل جدا جدا

انا نفسى

الكلمات الدلالية لهذا الموضوع

المفضلات

المفضلات

ضوابط المشاركة